ISAMBILILO 45
Ifyo Cipilibula Ukukanaitumpa mu fya Calo
Yesu asambilishe abasambi bakwe ukuti tabalingile ukuba aba “muli ici calo.” (Yohane 15:19) Mu kukanaba aba muli ici calo mwaba no kukanaitumpa mu fikansa fya calo nelyo ukulwako inkondo. Ukulanda fye icishinka te lyonse canguka ukukanaitumpa mu fya calo. Inshita shimo kuti batupumya pa mulandu wa kukanaitumpa mu fya calo. Nomba finshi tufwile ukucita pa kuti twilaitumpa mu fya calo no kutwalilila ukuba aba cishinka kuli Yehova Lesa?
1. Bushe Abena Kristu ba cine bamona shani amabuteko ya bantunse?
Fwe Bena Kristu twalicindika ubuteko. Tulakonka ifyo Yesu alandile ukuti “peeleni ifya kwa Kaisare kuli Kaisare.” Kanshi tulomfwila amafunde ya buteko pamo ngo kulipila imisonko. (Marko 12:17) Baibolo isambilisha ukuti ico amabuteko ya bantunse yatekela ni co Yehova e wayasuminisha. (Abena Roma 13:1) Nomba twalishiba ukuti amabuteko ya bantunse tayakwata amaka ya kucita ifintu fyonse. E ico twacetekela ukuti Lesa akabomfya Ubufumu bwakwe ubwa ku muulu pa kufumyapo amafya fwe bantunse tukwata.
2. Kuti twalanga shani ukuti tatuitumpa mu fya calo?
Nga filya Yesu ashaleitumpa mu fikansa fya calo, na ifwe tatuitumpa mu fikansa fya calo. Ilyo abantu bamwene icipesha amano cimo ico Yesu acitile, balefwaya ukuti abe imfumu yabo pano isonde, lelo alikeene. (Yohane 6:15) Cinshi akaanine? Yesu alandile ukuti, “Ubufumu bwandi te bwa pano calo.” (Yohane 18:36) Apo tuli basambi ba kwa Yesu, tulalanga ukuti tatuitumpa mu fya calo mu fintu ifingi. Ku ca kumwenako, tatulwako inkondo. (Belengeni Mika 4:3.) Kwena tatwasuula ifishibilo fya calo pamo nga flagi, lelo tatufipeela umucinshi uo tulingile ukupeela Lesa. (1 Yohane 5:21) Na kabili tatutungilila akabungwe ka fikansa fya calo nangu kamo nelyo intungulushi ya fikansa fya calo. Nga tulecita ifi twalandapo e lyo na fimbi ifilanga ukuti tatuitumpa mu fya calo, tulanga ukuti tuli ba cishinka ku Bufumu bwa kwa Lesa.
SAMBILILENI NA FIMBI
Moneni fimo ifingacitika ifingalenga camukosela ukukanaitumpa mu fya calo, e lyo ne fyo mwingacita pa kuti musalepo ukucita ifingalenga Yehova ukusekelela.
3. Abena Kristu ba cine tabaitumpa mu fya calo
Yesu na basambi bakwe tabaleitumpa mu fya calo. Belengeni Abena Roma 13:1, 5-7 na 1 Petro 2:13, 14. Lyena tambeni VIDIO no kulanshanya amepusho yakonkapo.
-
Mulandu nshi tulingile ukulacindikila ubuteko?
-
Ni muli finshi fimo umo tulangila ukuti tulanakila ubuteko?
Ilyo kuli inkondo, ifyalo fimo ifitila tafilelwako filatungilila ifyalo ifilelwa. Bushe ukukanaitumpa mu fya calo kwalola mwi? Belengeni Yohane 17:16. Lyena tambeni VIDIO no kulanshanya icipusho cakonkapo.
-
Bushe ukukanaitumpa mu fya calo kwalola mwi?
Kuti mwacita shani nga ca kuti ubuteko bwamweba ukucita ifintu ifyapusana ne fyo amafunde ya kwa Lesa yalanda? Belengeni Imilimo 5:28, 29. Lyena tambeni VIDIO no kulanshanya amepusho yakonkapo.
-
Nga ca kuti amafunde ya mabuteko ya bantunse yapusana na mafunde ya kwa Lesa, mafunde nshi mulingile ukukonka?
-
Bushe kuli na fimbi ifyo muletontonkanya ifingalenga mwakaana ukumfwila amafunde ya buteko?
4. Mwilaitumpa mu fya calo mu fyo mutontonkanya na mu fyo mucita
Belengeni 1 Yohane 5:21. Lyena tambeni VIDIO no kulanshanya amepusho yakonkapo.
-
Muli vidio twatamba, cinshi calengele ba Ayenge basalepo ukukanaingila mu kabungwe ka fikansa fya calo, nelyo ukucitako ifintu ifyali no kulenga bapeela umucinshi balingile ukupeela Yehova ku fintu fimbi, pamo ngo kupika salyuti kuli flagi?
-
Bushe mulemona ukuti ifyacitile ba Ayenge fyali fye bwino?
Fintu nshi fimbi ifingacitika ifingalenga catukosela ukukanaitumpa mu fya calo? Tambeni VIDIO, lyena lanshanyeni amepusho yakonkapo.
-
Kuti twacita shani pa kuti twilaitumpa mu fya calo ilyo tuletamba ifyangalo umuba ababutuka ulubilo lwa kucimfyanya abafuma ku fyalo ifingi?
-
Finshi tufwile ukucita pa kuti twilaitumpa mu fikansa fya calo nangu ca kuti ifyo intungulushi sha fikansa fya calo shipingwile kuti fyalenga twalacula nelyo twanonkelamo?
-
Bushe amalyashi tukutika pa filimba na pa TV, ayo tubelenga mu nyunshipepala, e lyo na yo tumfwa ku banensu kuti yalenga shani catukosela ukukanaitumpa mu fya calo?
Finshi Umwina Kristu ashilingile ukucita pa kuti taitumpile mu fya calo mu fyo atontonkanya na mu fyo acita?
BAMO KUTI BAIPUSHA ABATI: “Cinshi mushipikila salyuti kuli flagi nelyo ukwimbako ulwimbo lwa cishipa?”
-
Kuti mwabasuka shani?
IFYO MUSAMBILILE
Abena Kristu balesha na maka ukukanaitumpa mu fya calo mu fyo batontonkanya, mu fyo balanda, na mu fyo bacita.
Ukupitulukamo
-
Bushe tufwile ukulamona shani amabuteko ya bantunse?
-
Mulandu nshi tushi-itumpila mu fya calo?
-
Finshi fimo ifingacitika ifingalenga catukosela ukukanaitumpa mu fya calo?
ISHIBILENIPO NA FIMBI
Finshi nalimo twingacita pa kuti tatuitumpile mu fya calo?
Finshi aba mu lupwa bengacita pa kuipekanishisha ku fintu ifingacitika ifingalenga cabakosela ukukanaitumpa mu fya calo?
Mulandu nshi twingalandila ukuti ukucingilila icalo cesu te cintu icacindamisha ico tulingile ukucita?
Belengeni ifyo mwingacita pa kuti mwiba “aba muli ici calo” ilyo mulesala incito mwingabomba.
“Umo na Umo ali no Kusenda Icipe Cakwe Umwine” (Ulupungu lwa kwa Kalinda, March 15, 2006)
Nalimo Kuti Mwatemwako ne fi
AMEPUSHO ABANTU BEPUSHA SANA
Bushe Isambililo lya Baibolo E Cinshi?
Amasuko ku mepusho pe sambililo lya Baibolo ilyabula ukulipilisha.
