Yesus fyarkor manfamyan ḇyesi bo doḇe dunya ine nya si ḇa ḇaido sima na saksowarpu ro dunya ine ḇa. (Yohanes 15:19) Inja rosai nari sifrur kaku ya? Nari sakwaira faro fandun oso ro fararur polotik ma mamamun ḇero dunya ine ḇa. Fama fafisu ono ido, rya samswen fa koso roi dor nane. Imbude nari skoryae ko kukro komewer kakfrur roi ine. Inja moḇsa na kowaira faro oso ḇa ma kosoasuser pdef faro Yahwe I rai?

1. Moḇsa snonggaku Kristen sya smam pamarenta ḇero dunya ine rai?

Snonggaku Kristen ḇekaku sesyowi kaku pamarenta sya. Yesus doḇe kofrur roi ine kuker ’koḇak faro Kaisar rosai kobuk faro Kaisar’. Wos nane ḇyeḇair kosouser sasoser pamarenta ḇero moḇ koḇarek ro ya. Rupa ra sor ko fa koḇak som ido, nari koḇak na. (Markus 12:17) Refo ya doḇe pamarenta snonggaku ḇero dunya ine sya sepoik kukro Yahwe iso ḇebuk swaf ḇe si fa sepoik ya. (Roma 13:1) Inja, kofawi pamarenta sya papoik sena naba syadi ro Manseren Allah papoik Ḇyena ḇa. Kokyar Allah ma Karajan Ḇyedi ro nanggi derer monda nari ḇepyos samswen ḇekur snonggaku koine.

2. Rariso kofasnai koma kowaira faro oso ḇa?

Raris Yesus i, kaksowarpu ro fararur polotik ya ḇa. Fafisu kawasa sya smam Yesus ifrur mujisat, sisewar fa skanow i ḇe raja sedi, fama Yesus imewer. (Yohanes 6:15) Rosai ḇefnai fa imewerdi? Kukro manggundi ikofen bo doḇe, ’Karajan ayedi isya ro supswan ine ḇa.’ (Yohanes 18:36) Snar koinema Yesus manfamyan ḇyesiko, inja na kowaira faro oso ḇa ma kofasnai na ro kenem koḇena. Rupa ra, na kakso ro mamamun ya ḇa. (Kowasya Mikha 4:3.) Koḇesyowi kakop sbukiḇair er oso, raris barbar ya, ḇape na kopok kokanow koḇrasna ḇa kukro inema imnis ra kosyom i. (1 Yohanes 5:21) Na kopampum partai polotik oso ḇa ḇaido kopampum ḇa kako snonggaku ḇeyek fa ḇesmai papoik ya, ma na kowaira faro oso ḇa kako. Kofrur roi nane kada, koisya kofasnai koma kosoasuser monda faro Manseren Allah pamarenta Ḇyedi, isoine Karajan Ḇyedi.

 SWEWAR KAKU WER

3. Snonggaku Kristen ḇekaku sima siwaira faro oso ḇa

Yesus ma manfamyan ḇyesi sfasnai nyan ḇepyum ḇe ko. Kowasya Roma 13:1, 5-7 ma 1 Petrus 2:13, 14. Mura komam VIDIO raimnai kawos fakfuken suine.

• Rosai ḇefnai fa koḇesyowi pamarenta ḇero dunya ine?

• Moḇsariso kofasnai kosouser faro pamarenta sya?

Fafisu er ri suru sumamun, er ḇese soḇe na siwaira er oso ḇa, fama sisaramper er ḇemamun ansuya. Siwaira faro er oso ḇa ido, rosai na sifrur kaku ya? Kowasya Yohanes 17:16. Mura komam VIDIO raimnai kawos fakfuken ine.

• Kowaira faro oso ḇa ido rosai na kofrur kaku ya?

Rosai na kofrur kaku rofyor pamarenta sor ko fa kofrur roi Allah imewer na? Kowasya Farfyar 5:28, 29. Mura komam VIDIO raimnai kawos fakfuken suine.

• Sasoser snonggaku ono naisya nasrow ḇa kuker Allah parenta Ḇyena ido, mansei na kosouser ya?

• Ro fafisu ḇerariso snonggaku Kristen sipok sisouser pamarenta sya sasoser sena ḇa?

 4. Kowaira faro oso ḇa ro rosai kokara ma rosai kofrur na

Kowasya 1 Yohanes 5:21. Mura komam VIDIO raimnai kawos fakfuken suine.

• Ro vidio insanja, rosai ḇefrur fa Ayenge dun wos oser fa imewer daksowarpu ro fararur polotik ḇaido upacara fa sisyom barbar ya?

• Kwara ido, roi ifrur nane napyum ke?

Ro fafisu risai wer na samswen fa kowaira faro oso ḇa? Komam VIDIO, raimnai kawos fakfuken ri kyor skoine.

• Moḇsa na kowaira faro oso ḇa rofyor komam fanandi olahraga ma ḇefnak sya sramaker er ḇese?

• Moḇsa kofasnai koma kowaira faro oso ḇa rofyor kofawi ḇeyuf papoik sya roi sifrur na nari nafnai samswen ḇaido nbuk payamyum ḇe ko?

• Rosai ḇefnai fa abar komam ma korower ro radio, televisi, ma Internet ḇaido ro bati koḇesya nafrur samswen ko fa kowaira faro oso ḇa?

 FARKARKOR ḆYENA

Snonggaku Kristen sima sisewar kaku fa siwaira faro fararur polotik oso ḇa ro rosai skara, rosai sawos, ma rosai sifrur na.

Waswarepen Kaḇer

• Moḇsa snonggaku Kristen sya smam pamarenta snonggaku ḇero dunya ine?

• Rariso kofasnai kowaira faro fararur polotik oso ḇa?

• Ro fafisu ḇerariso samswen fa kowaira faro oso ḇa?