IRUẸMWI 45
Vbe Ima Khian Ya Rhie Ẹre Ma Hẹ Wẹẹ Ima I Re Ọkpa Vbe Agbọn Na?
Jesu keghi gi erhuanegbe ẹre rẹn wẹẹ, ọ ma khẹke ne iran gha re ọkpa vbe “agbọn na.” (Jọn 15:19) Odẹ ọkpa ne ima gha ya sẹtin rhie ẹre ma wẹẹ, ima i re ọkpa vbe agbọn na, ọre ne ima ghẹ gha mwẹ obọ vbe otu azẹ kevbe okuo na khọn. Ọghe ne ẹmwata, ọna i re emwi nọ khuẹrhẹ. Emwa sẹtin ya ima gha gbogiẹ. Vbe ima khian ya gele sẹtin rhie ẹre ma hẹ wẹẹ, obọ ọghe Osanobua ne Jehova, ẹre ima ye?
1. De aro ne Ivbiotu e Kristi ọghe ẹmwata ya ghee arriọba emwa nagbọn?
Ivbiotu e Kristi wa rhie ọghọ ne arriọba. Ma keghi “rhie emwi nọ re ọghe Nọgbaisi nẹẹn,” zẹvbe ne Jesu wẹẹ ne ima gha ru ẹre. Ọni nọ wẹẹ, ma lele uhi ọghe ẹvbo ne ima ye. Vbe igiemwi, ma ha igho uhunmwu. (Mak 12:17) E Baibol gi ima rẹn wẹẹ, e Jehova ẹre ọ kue yọ ne arriọba emwa nagbọn gha khaevbisẹ. (Rom 13:1) Ọna ya ima rẹn wẹẹ, ọdakha ọghe Osanobua, ẹre ọ hin usi sẹ ọghe arriọba emwa nagbọn. Osanobua ẹre ima ya aro kọ, nọ do ya Arriọba ọghẹe sọfurre ye ọlọghọmwa ọghe emwa nagbọn.
2. Vbe ima khian ya rhie ẹre ma hẹ wẹẹ ima i re ọkpa vbe agbọn na?
Vbe na ghee Jesu, ma i mwẹ obọ vbe emwamwa otu azẹ. Vbe ẹghẹ ne emwa te ya gha hoo ne iran ma e Jesu ọba, rhunmwuda emwi ọyunnuan ọkpa nọ ru, Jesu ma kue yọ. (Jọn 6:15) Vbọzẹ? Rhunmwuda emwi ne Jesu ghi tobọre ta, vbe ọ khare wẹẹ, ‘Arriọba mwẹ i re ọghe agbọn na.’ (Jọn 18:36) Zẹvbe erhuanegbe Jesu, odẹ ughughan ẹre ima ya rhie ẹre ma wẹẹ, ima i re ọkpa vbe agbọn na. Vbe igiemwi, ma i mwẹ obọ vbe okuo. (Tie Maika 4:3.) Aro nọ ghaan ẹre ima ya ghee ama na ya rẹn otọ ẹvbo, vbe na ghee afiala. Sokpan, ma i rhie uyi nọ khẹke Osanobua ne iran. (1 Jọn 5:21) Ma i vbe sinmwi oseghe ne otu azẹ rhọkpa, ra emwa ni suan ye ukpo. Odẹ vbenian kevbe odẹ nibun ọvbehe, ẹre ima ya rhie ẹre ma wẹẹ, Arriọba Osanobua ọkpa ẹre ima yẹrike.
GUALỌ OTỌ RE SAYỌ
Gia ziro yan emwi eso nọ gha sẹtin yae gha lọghọ, ne ima ya rhie ẹre ma wẹẹ, ima i re ọkpa vbe agbọn na, kevbe odẹ ne u gha ya sẹtin ru azẹ nọ gha ya ẹko rhiẹnrhiẹn e Jehova.
3. Ivbiotu e Kristi ọghe ẹmwata i re ọkpa vbe agbọn na
Jesu kevbe erhuanegbe ẹre rhie igiemwi yotọ ne ima. Tie Rom 13:1, 5-7 kevbe 1 Pita 2:13, 14. Iyeke ọni, kpee VIDIO na, ne uwa ziro yan inọta ni lelẹe.
-
Vbọzẹ nọ na khẹke ne ima gha rhie ọghọ ne arriọba emwa nagbọn?
-
De odẹ eso ne ima ya rhie ẹre ma wẹẹ, ima họn ẹmwẹ ne iran?
Vbe ẹghẹ okuo, otọ ẹvbo eso sẹtin ba gha ru vbe na miẹn wẹẹ, iran i mwẹ obọ ne iran ye, sokpan iran ghi gha hie erhẹn yọ. Odẹ vbo? Iran ghi gha ru iyobọ ne ẹvbo eva nii, ni khọn okuo. Vbe a gele yae kha, vbe a gha wẹẹ, ai mwẹ obọ na ye? Tie Jọn 17:16. Iyeke ọni, kpee VIDIO na, ne uwa ziro yan inọta nọ lelẹe.
-
Vbe a yae kha, vbe a gha wẹẹ, ima i re ọkpa vbe agbọn na?
De emwi ne ima gha ru, vbe arriọba emwa nagbọn gha wẹẹ ne ima ru emwi ne uhi Osanobua gbodan yi? Tie Iwinna 5:28, 29. Iyeke ọni, kpee VIDIO na, ne uwa ziro yan inọta ni lelẹe.
-
Arriọba emwa nagbọn gha wẹẹ ne ima ru emwi ne uhi Osanobua gbodan yi, de uhi ne ima gha ghi lele vbọ?
-
De emwi eso ne uwẹ roro wẹẹ, ọ gha ya Ivbiotu e Kristi kha wẹẹ, iran i khian lele uhi arriọba?
4. Gi iziro ruẹ kevbe uyinmwẹ ruẹ gha rhie ẹre ma wẹẹ, u i re ọkpa vbe agbọn na
Tie 1 Jọn 5:21. Iyeke ọni, kpee VIDIO na, ne uwa ziro yan inọta ni lelẹe.
-
Vbe vidio na, vbọzẹ ne Ayenge na wẹẹ irẹn i deba otu azẹ? Vbọzẹ nọ ma na vbe tuẹ afiala?
-
Uwẹ yayi wẹẹ ẹwaẹn rre emwi nọ ru nii ra?
De emwi ọvbehe nọ gha sẹtin yae gha lọghọ, ne ima ya rhie ẹre ma wẹẹ, ima i re ọkpa vbe agbọn na? Kpee VIDIO na, iyeke ọni, uwa ghi ziro yan inọta ni lelẹe.
-
Vbe ima khian ya sẹtin rhie ẹre ma hẹ wẹẹ, ima i mwẹ obọ ne ima ye, vbe otọ ẹvbo ughughan ghaa ku iku isasegbe?
-
Vbe ima khian ya sẹtin rhie ẹre ma hẹ wẹẹ, ima i re ọkpa vbe agbọn na, deghẹ arriọba nọ rre ukpo na ru emwi eso nọ yẹẹ ima, ra emwi eso nọ ma yẹẹ ima?
-
Iyẹn ne ima họn vbe ugha iyẹn, ra emwa ne ima gu mu obọ, gha sẹtin yae gha lọghọ ra, ne ima ya rhie ẹre ma wẹẹ, ima i re ọkpa vbe agbọn na ra? Vbua gu kha vberriọ?
De odẹ eso ne Ovbiotu e Kristi gha ya sẹtin rhie ẹre ma wẹẹ, irẹn i re ọkpa vbe agbọn na, vbe emwi nọ mu roro kevbe uyinmwẹ ọghẹe?
ỌMWA SẸTIN NỌ WẸẸ: “Vbọzẹ ne u i na tuẹ afiala, ra ne u i na so ihuan na ya sinmwi oseghe ẹvbo?”
-
De ewanniẹn ne u gha rhie ne ọmwa vberriọ?
OLIKA ẸMWẸ
Ivbiotu e Kristi wa hia ne iran gha rhie ẹre ma vbe odẹ ne iran ya roro emwi, vbe ẹmwẹ ne iran ta kevbe uyinmwẹ iran wẹẹ, iran i mwẹ obọ vbe otu azẹ.
Ogbewerriẹ
-
De emwi nọ khẹke ne ima gha ru ne arriọba emwa nagbọn?
-
Vbọzẹ ne ima i na mwẹ obọ vbe otu azẹ?
-
De emwi eso nọ gha sẹtin yae gha lọghọ, ne ima ya rhie ẹre ma wẹẹ, ima i re ọkpa vbe agbọn na?
RUẸ SAYỌ
De emwi eso ne ima gha sẹtin sẹrae, ne ima ya rhie ẹre ma wẹẹ, ima i re ọkpa vbe agbọn na?
Emwi eso sẹtin yae gha lọghọ, ne ima ya rhie ẹre ma wẹẹ, ima i re ọkpa vbe agbọn na. De emwi ne ẹgbẹe gha ru, ne iran ya mu egbe yotọ khẹ edanmwẹ vbenian?
Emwa eso keghi roro ẹre wẹẹ, uyi nọ ghi sẹ, ne ọmwa gha sẹtin gha mwẹ, ọre na sinmwi oseghe ne otọ ẹvbo na ke rre. Ẹmwata ẹre ọna khin ra?
Ghee vbene u khian ya rhie ẹre ma hẹ wẹẹ, u i re ọkpa vbe agbọn na vbe u ghaa ru azẹ nọ dekaẹn iwinna.
“Dọmwadẹ Ọghẹe Ẹre Ọ Ra Mu Ihẹ Egbe Ẹre” (The Watchtower, March 15, 2006)
You May Also Like
AVBE INỌTA NE EMWA MỌBỌ NỌ
Vbọre Iruẹmwi Ọghe Baibol?
Gualọ otọre, nu miẹn ewanniẹ ọghe avbe inọta ni dekaan emwamwa iruẹmwi e Biabol ọghọhẹ ọghomwa.
