Yesu ye an kalan ko ale nɔfɛmɔgɔw “tɛ diɲɛ taw ye”. (Yuhana 15:19) N’a fɔra ko an kana an ni don nin diɲɛ kow la, o kɔrɔ ye ko, an kana an ni don nin diɲɛ politikikow ani a kɛlɛkow la. Tiɲɛ na, o kɛli man nɔgɔn tuma bɛɛ. Mɔgɔw bɛ se ka u ɲagaribɔ an na ka d’a kan an tɛ an ni don o ko suguw la. An bɛ se ka mun de kɛ walisa an kana an ni don nin diɲɛ kow la ani ka to kantigiya la Jehova Ala kɔ?

1. Krecɛn lakikaw bɛ Hadamadenw ka gofɛrɛnɛmanw ye cogo di?

Krecɛnw bɛ bonya da gofɛrɛnɛman kan. An bɛ kow kɛ iko Yesu y’a fɔ cogo min na ani ka “masakɛ ta sara masakɛ ye”. O de la, an bɛ jamana sariyaw labato i n’a fɔ minnu b’a ɲini an fɛ an ka nisɔngɔw sara. (Marka 12:17) Bibulu b’a fɔ ko Hadamadenw ka gofɛrɛnɛmanw bɛ ka mara kɛ ka d’a kan Jehova y’a to dɔrɔn u ka mara kɛ. (Romɛkaw 13:1) An b’a faamu ko se sugu dɔ de bɛ Hadamadenw ka gofɛrɛnɛmanw bolo walima ko se min bɛ u bolo dan bɛ o la. An bɛ an ɲɛsin an ka Ala ani a ka sankolola Masaya ma diɲɛ gɛlɛyaw ɲɛnabɔli ko la.

2. An bɛ se k’a jira cogo di ko an tɛ an ni don nin diɲɛ kow la?

Iko Yesu cogo, an tɛ an ni don politikikow la. Tuma min na mɔgɔw ye Yesu ka kabako kɛlenw dɔ la kelen ye, u y’a ɲini ka a kɛ u ka masakɛ ye dugukolo kan, a m’a to u ka o kɛ. (Yuhana 6:​15) Mun na? Ka da a ka nin kumaw kan: “Ne ka masaya tɛ nin diɲɛ ta ye.” (Yuhana 18:36) Ikomi an ye Yesu ka kalandenw ye, an b’a jira cogo caman fɛ ko an tɛ an ni don nin diɲɛ kow la. Misali la, an tɛ taa kɛlɛw kɛ (Mise 4:3 kalan.) An bɛ bonya da jamana taamashyɛnw kan, i n’a fɔ darapow, nka an tɛ darapow fo, bawo o ni darapo batoli bɛɛ ye kelen ye. (1 Yuhana 5:​21) Wa an tɛ an sen don politiki parti si la, an tɛ jɔyɔrɔɲinina si kɔkɔrɔdon, wa an tɛ u kɛlɛ fana. O kow la, ani ko wɛrɛw fana la, an b’a jira ko an ye kantigiw ye ko bɛɛ la ka ɲɛsin Ala ka gofɛrɛnɛman ma, o min ye a ka Masaya ye.

 DƆ FARA I KA DƆNNIYA KAN

3. Krecɛn lakikaw tɛ u ni don nin diɲɛ kow la

Yesu ni a ka kalandenw ye o misali di an ma. Romɛkaw 13:​1, 5-7 ani 1 Piɛrɛ 2:​13, 14 kalan. O kɔ, a’ye WIDEYO lajɛ ani ka baro kɛ nin ɲininkaliw kan:

• Mun na an ka kan ka bonya da Hadamadenw ka gofɛrɛnɛmanw kan?

• Sira minnu fɛ an b’a jira ko an kololen bɛ u ye, olu dɔw ye jumɛnw ye?

Kɛlɛw waatiw la, jamana dɔw bɛ se k’a fɔ ko olu sen tɛ kɛlɛ la, nka jamana fila minnu bɛ ka ɲɔgɔn kɛlɛ u bɛ olu bɛɛ dɛmɛ. N’a fɔra ko i kana i ni don nin diɲɛ kow la, o kɔrɔ ye mun ye tiɲɛ yɛrɛ la? Yuhana 17:16 kalan. O kɔ, a’ye WIDEYO lajɛ ani ka baro kɛ nin ɲininkali kan:

• N’a fɔra ko i kana i ni don nin diɲɛ kow la, o kɔrɔ ye mun ye?

I bɛ mun de kɛ ni gofɛrɛnɛman dɔ b’a fɛ i ka ko dɔ kɛ min bɛ Ala ka sariya sɔsɔ? Kɛwalew 5:​28, 29 kalan. O kɔ, a’ye WIDEYO lajɛ ani ka baro kɛ nin ɲininkaliw kan:

• Ni Hadamadenw ka sariya ni Ala ka sariya bɛ ɲɔgɔn sɔsɔ, an ka kan ka sariya jumɛn de kan minɛ?

• Ko minnu na krecɛnw tɛ an kunna fangaw kan minɛ, olu dɔw ye jumɛnw ye?

 4. Kana i ni don nin diɲɛ kow la i ka miiriliw ani i ka kɛwalew fɛ

1 Yuhana 5:​21 kalan. O kɔ, a’ye WIDEYO lajɛ ani ka baro kɛ nin ɲininkaliw kan:

• Wideyo kɔnɔ, mun na Ayenge y’a latigɛ ka ban ka a sen don politiki parti la walima ka ban ka a sen don jamana ko dɔw kɛli la, i n’a fɔ darapo foli?

• Yala i hakili la, a ye latigɛli kɛ ni hakilitigiya ye wa?

Ikomi an tɛ an ni don nin diɲɛ kow la, ko wɛrɛ jumɛnw de bɛ se ka o kɔrɔbɔ? A’ye WIDEYO lajɛ, o kɔ aw ka baro kɛ nin ɲininkaliw kan:

• An bɛ se ka mun kɛ walasa an kana an ni don jamanaw ni ɲɔgɔn cɛ ka ɲɔgɔndan ɲɛnajɛw la ni an bɛ ka u lajɛ?

• An bɛ se ka ban cogo di ka an ni don nin diɲɛ kow la hali ni politiki mɔgɔw ka latigɛliw bɛ ko jugu walima nafa lase an yɛrɛw ma?

• An bɛ fɛn minnu mɛn kunnafoniw la ani an jɛɲɔgɔnw fɛ, olu bɛ se ka nɔ bila cogo di an ka latigɛli la, o min ye ka ban ka an ni don nin diɲɛ kow la?

 BAKURUBAFƆLI

Krecɛnw bɛ baaraba kɛ walasa u kana u ni don politikikow la u ka miiriliw, u ka kumaw ani u ka kɛwalew fɛ.

Seginnkanni

• An ka kan ka mun de kɛ ka ɲɛsin Hadamadenw ka gofɛrɛnɛmanw ma?

• Mun na an tɛ an ni don politikikow la?

• Ikomi an tɛ an ni don nin diɲɛ kow la, ko jumɛnw de bɛ se ka o kɔrɔbɔ?