Sɛˈɛ Zezwii ˈɲɛ a˗a ˈɔ ˈwʋ˗bhlinɩwaa ˈdɩ nɩɩ, “aˈa ˗bhöaˈa mäˈä ˈpɩwʋ a ˈyize a ˗nʋä.” (Zaa 15:19) Mii sɛɛ zɛmö nɩɩ, waˈaa ˗kä wa ˈkä mäˈä ˈpɩwʋ a politikö ˗ɲɛ tʋʋ ˈsɔ ˈmö plɛ. ˈLɩlɩlɩ a dɔˈwʋ, nɩkpɛ ˈkä nɩɩ ɔ ˈnaa ˈkä mäˈä ˈpɩwʋ a ˗li ˈmö plɛ a dɔˈwʋʋ, ˈmö yɩ ˈtɛɛ teɲii. Nɩkpa bhɛnɩ wa ˗kaɲɩ yɩ za nɛpɔ. ˈSaa ˗kaɲɩ ɔ kwänɩ ˗a tɩa ˈpɩwʋ a ˗lii ˈmö plɛ nzɩ ˗a ˗ɲɛ Lagɔ ˈsɔ ˈkä ˈkwädlɩ ˈwʋ ˗wʋnɩ ˈyize ˈnɩ?

1. Sɛɛ ˗tiamö a Klɩtɩɛwaa yɩlɩ ɔ nɩkpa a ˈkämanɔɔ ˈwʋ ˈnɩ?

Klɩtɩɛwaa kä ˈkämanɩwaa a ˈklʋkpa. Zezwii ˈa wɛlɩɩ ɔ bhïla ˈn ɔ yiɛ nɩɩ, “˗yɩ glɩnɩɛ Sezaa a ˗lii a nɩ ˈɲɩ Sezaa yowʋ,” ˈmö wa ˗gänɩɛ ˈn wa zʋä bhlɩ wa glɩɛ ˈmö a ˗lɔɔ ˈklʋkpamö. Mii kää ˈŋlɩ nza wa ˈpɛnɩɛ lapoo. (Maakö 12:17) Biblë lɛ nɩɩ, Zoova mɔɔ ˈtatinɩɛ nɩkpaa ˈyi nza wa ˈkämanɩɛ. (Ghlɔɔmö a ˗nʋa 13:1) ˗A ˗yi sɛ nɩɩ, nɩkpa a ˈkämanɔɔ kä ˈbhlenɩdɛ. ˈTɛɲɩke ˈmö wa ˈkämanɩɛ ˗bhlɛ, Lagɔ ˗ɲɛ ˈɔ ˈKämanɔɔ ˈsɔ ˗wʋ ˗wʋä ˗mä zlɩ ˈmöö, wʋ ˈkä bhla mäˈä pɩwʋ nɩ ˈwʋ a ˗lii ˈwuë ˈwlu gïganɩ.

2. Sɛɛ ˗a ˈkä ɔ tula nɩɩ ˗aaa politikö ˈmö ˗wʋ ˈnɩ?

Zezwii a saa, ˗aa plɛ politikö a ˗lii ˈmö. Dɛɛ Zezwii ˗wʋ a˗a mäˈä dʋdʋ ˈwʋʋ, ˈɔ zɩzɛ ɔ pää, nɩkpaa ˈyɩɛ yɩ glaˈmö a ˗nɛ ˗bhlʋ ˈylɩmöö, wa yɩbhä a˗a wa ˈkɔ ˈwa ˈbhlɩlowli ˈwʋ ˈzʋa, ˗maa ɔˈɔɔ ˈwʋ ŋlu. (Zaa 6:15) ˗Yɩ kä ɔ ˈŋlɩ ˈnɩ? Bhla, sɛˈɛ ɔ ˈɲʋa ˈdɩ nɩɩ, “ˈna ˈKämanɔɔ ˈnɩ ˗bhö mäˈä dʋdʋ ˈwʋ a ˗lu.” (Zaa 18:36) Sɛɛ ˗a glɩnɩɛ Zezwii a ˗nʋa a za, ˗a tula ˈki a ˗bɛ ˈmö nɩɩ ˗aaa mäˈä ˈpɩwʋ a ˗lii ˈmö ˗wʋ, ˈn ˗aaa gwɩ tʋ. (Zɛlɩ Michée 4:3 ˈmö) ˗A zʋ bhlɩɩ ˈmö a ˗lii ˈklʋkpamö, dlapo a sɛ a ˗lii, ˗maa ˗a ˈniɛ bʋbɔ. (1 Zaa 5:21) ˗Aaa politiközɩkpö nimï ˗wʋ, ˗aaa politikönɩkpa ˗wa yɩbhää wa ˈkä ˈkämanɩwa ˈzʋ nimï ˗wʋ, ˈn ˗a ˈnʋa ˈyɛ ˗gblɩ. ˗A ˗kä ˗sɩbhä ˈzʋ, ˗a tula nɩɩ Lagɔ ˈa ˈKämanɔɔ a ˈyize mö ˗a ˗wʋä nimï.

 ˈCƖƐ ˗LII ˗MIMII

3. ˗Tiamö a Klɩtɩɛwaa ˈnɩ plɛ politikö ˈmö

Zezwii ˗ɲɛ ˈɔ ˈwʋ˗bhlinɩwaa ˈsɔ, wa slʋnɩɲɩ sɛɛ ˗a ˈkää ˈwa gbäpöö ˗gänɩ. Zɛlɩ Ghlɔɔmö a ˗nʋa 13:1, 5-7; ˈn 1 Piɛlɩ 2:13, 14.ˈmö. Bhla, ˈzʋ ˗lɛ VIDEO ˈn a nɩ yɩlɩ nimïyɩbhäkïbhï ˈlɛ yɔwʋ.

• ˗Yɩ kä ɔ ˈŋlɩ ˈn ˗a kä ɔ ˗a ˈkä nɩkpa a ˈkämanɔɔ ˈklʋkpamö ˈzʋ ˈnɩ?

• ˗Lii ˗mi ˈmö ˗a tula ɔ nɩɩ ˗a kä ˈkämanɩwaa a ˈklʋkpa ˈnɩ?

Tʋ ˗kä bhlɩ ˗mɛmɛɛ ˈmö bhlii, bhlɩ ˗mɛmɛɛ ˈmö ˗a ˗nʋa lɛ nɩɩ, waˈaa ˗mä tʋ ˈla a ˗lii ˈmö ˗wʋ. ˗Maa ˈlɩlɩlɩ a dɔˈwʋ, wa wʋa nimï. Nɩkpɛ ˗kä nɩɩ ɔˈɔɔ mäˈä ˈpɩwʋ a ˗lii ˈmö ˗wʋ, ˈsaa wa laa ɔ ˗tiamö ˗sɩbhä ˈnɩ? Zɛlɩ Zaa 17:16 ˈmö. Bhla, ˈzʋ ˗lɛ VIDEO ˈn a nɩ yɩlɩ nimïyɩbhäkïbhë ˈlɛ yɔwʋ.

• Nɩkpɛ ˈnɩ mäˈä ˈpɩwʋ a ˗lii ˈmö ˗wʋ, sɛ yɩ sɛ ɔ zɛmö ˈnɩ?

Sɛɛ ˈkämanɩwaa gbää ˗a nɩ ˈzʋ, yɩ ˗ɲɛ Lagɔ ˈa gböö ˈnɩ yɔwʋ mönɩɩ, sɛɛ ˗a ˈkä ɔ ˈzʋ ˈnɩ? Zɛlɩ Nʋnʋlii 5:28, 29 ˈmö. Bhla, ˈzʋ ˗lɛ VIDEO ˈn a nɩ yɩlɩ nimïyɩbhäkïbhï ˈlɛ yɔwʋ.

• Nɩkpa a ˗lɔ ˗ɲɛ Lagɔ ˈa ˗lɔ ˈsɔ ˈnɩ yɔwʋ mönɩɩ, ˗mu ˗a kä ɔ ˗a ˈkä ˈklʋkpamö ˈzʋ ˈnɩ?

• ˗Li ˗mi ˗yɩɲɩ dɔˈwʋ Klɩtɩɛwaa bhɛnɩ ɔ wa ˈkä ˈkämanɩwaa a ˗lɔ ˈklʋkpamö ˗sɛ ˈnɩ?

 4. ˗Mä ˗aˈa dlɩpäsaa ˈn ˗aˈa nʋnʋlii ˈmö ˗a nɩ tɩ mäˈä ˈpɩwʋ a ˗lii ˈmö plɛ

Zɛlɩ 1 Zaa 5:21 ˈmö. Bhla, ˈzʋ ˗lɛ VIDEO ˈn a nɩ yɩlɩ nimïyɩbhäkïbhï ˈlɛ yɔwʋ.

• Video ˈlɛ ˈmö, Ayezɩ ˈnɩɛ ˈyɩbhä ɔ ˈkä politiközɩkpa ˈmö plɛ, ɔˈɔɔ ˈyɩbhä ɔ ˈkä bhlɩɩ ˈmö a ˈfɛtlie ˗mimii ˗sɛmö, ˈn ɔ ˈkäˈɛ dlapo bhälɩ. ˗yɩ kä ɔ ˈŋlɩ ˈn?

• ˗Na dɔˈwʋ, ˈsaa ɔ ˗sɛ ˗lɛ nɛnɩ bhä ˗a?

˗A ˈnɩ politikö ˈmö plɛɛ, ˗lii a ˗mi bhɛnɩ ɔ yɩ ˗kaɲɩ kɛˈmö ˈtɛɛnɩ ˈnɩ? ˈZʋ ˗lɛ VIDEO, ˈn a nɩ yɩlɩ nimïyɩbhäkïbhï ˈlɛ yɔwʋ.

• ˗Mä bhlɩɩ ˈwuë ˗gömö wa ˗kä balɔɔ ˈpä dɔˈwʋ ˗wʋ, ɛ ˗käˈɛ ˗sɩbhä a ˗lii ˗mimii, sɛɛ ˗a ˈkä ɔ tula nɩɩ ˗aaa nɩkpɛ nimï ˗wʋ ˈnɩ?

• ˗Mä bhlɩɩ ˈmö a ˈkämanɩwaa a nʋnʋlii ˗kä ˗aa ˗li a ˗lii ˈmö ˗kää, yɩ nɩˈɛ ˗aa ˗li a˗li ˈmö ˗kä aˈbhë ˗kë, sɛɛ ˗a ˈkä ɔ tula nɩɩ ˗a ˈnʋa nimï ˗wʋ ˈnɩ?

• ˈSaa bhlɩɩ ˈmö a ˈkämanɩwaa nʋä, ˗a ˗kä yɩ tɩtɩɩ ˈnʋʋ, ˈsaa yɩ bhɛnɩ ɔ yɩ ˗kaɲɩ ˈwlu nʋ ˈnɩ?

 DƐSƐKÄKÏBHÏ

Klɩtɩɛwaa, teɲii wa ˈtɛmanɩɛ ˈyli yɔwʋ wa tɩa politikö a ˗lii ˈmö plɛ, ˗mä ˈwa dlɩpäsaa ˈmö, ˈwa bhïlabhïlasaa ˈmö ˈn ˗mä ˈwa nʋnʋlii ˈmö.

ˈWʋligbanɩkïbhï

• Nɩkpa a ˈkämanɔɔ a dɔˈwʋ, sɛɛ ˗aˈa nʋnʋlii kä ɔ yɩ ˈkä ˗wʋ ˈnɩ?

• ˗Yɩ kä ɔ ˈŋlɩ ˈn ˗aa ɔ ˗kä ˗a ˈkä politikö a ˗lii ˈmö plɛ ˈnɩ?

• ˗A ˈnɩ ˈyɩbhä ˗a ˈkä politikö ˈmö plɛɛ, ˗lii a ˗mi bhɛnɩ ɔ yɩ ˗kaɲɩ kɛˈmö ˈtɛɛnɩ ˈnɩ?