Jesus a apasa pwe chókkewe mi tapweló mwirin rese “pop seni ei fanüfan.” (Johannes 15:19) Weween resap angolong lón mwékútúkútún ei fénúfan, resap fiti pekin politics, me maun. Ren enletin, epwe wor atun epwe weires ach sisap angolong lón mwékútúkútún ei fénúfan, me eli aramas repwe esiitakich ren ach féri ena. Ifa usun sisap angolong lón mwékútúkútún ei fénúfan me sipwe akkamwéchú ach tuppwél ngeni Jiowa Kot?

1. Epwe ifa ekiekin Chón Kraist mi enlet usun mwúún aramas?

Chón Kraist ra súféliti mwúún aramas. Sia álleasochisi alon Jesus ei ach sipwe “ngeni Sisar mine än Sisar,” weween sipwe álleasochisi allúkún ewe fénú sia nóm ie, áwewe chék ren kamétiwen takises. (Markus 12:17) Ewe Paipel a áiti ngenikich pwe mwúún aramas ra chék tongeni nemenem pokiten Jiowa a mut ngeniir ar repwe nemenem. (Rom 13:1) Iwe, sia weweiti pwe a aúkúk án mwúún aramas nemenem. Sia lúkúlúk wóón Kot me an we Mwú lón láng an epwe ataweei ach kewe osukosuk.

2. Ifa usun sipwe pwári pwe sise angolong lón mwékútúkútún ei fénúfan?

Sise angolong lón politics usun chék Jesus. Atun ekkewe aramas ra kúna án Jesus féri eú manaman, ra mochen seikaatá an epwe néúr king wóón fénúfan, nge ese tipeeú ngeni. (Johannes 6:15) Pwata? Pún iei met a erá mwirin och fansoun, “mwüi esap pop seni ei fanüfan.” (Johannes 18:36) Pokiten kich néún Jesus chón káé, iwe sia pwári pwe sise angolong lón mwékútúkútún fénúfan ren ach sise féri ekkeei fitu mettóch. Áwewe chék, sise fiti maun. (Álleani Mika 4:3.) Sia súféliti ekkewe mettóch aramas ra aúcheani lón mwúúr we, áwewe chék ren ekkewe filáik, nge sise kan pini ngeniir. (1 Johannes 5:21) Sise pwal pekini eú pekin lón politics are emén mi ssá ngeni eú wis. Lón ekkena esin mettóch me pwal ekkewe ekkóch, sia pwári pwe sia unusen tuppwél ngeni án Kot we Mwú.

 KÚTTAFICHI

3. Chón Kraist mi enlet rese angolong lón mwékútúkútún ei fénúfan

Jesus me néún kewe chón káé ra isetiw ngenikich eú leenien áppirú. Álleani Rom 13:1, 5-7 me 1 Petrus 2:13, 14. Mwirin, fichi ei VIDEO me pwóróusfengen wóón ekkeei kapas eis.

• Pwata a lamot ach sipwe súféliti mwúún aramas?

• Ifa usun sipwe pwári pwe sia álleasochisiir?

Lón fansoun maun, ekkóch mwú ra erá pwe rese peni epek, nge ra álisi ekkewe ruu pekin mi maunfengen. Met weween án emén esap fókkun peni epek? Álleani Johannes 17:16. Mwirin, fichi ei VIDEO me pwóróusfengen wóón ei kapas eis.

• Met weween ach sisap angolong lón mwékútúkútún ei fénúfan?

Met sipwe féri ika ewe mwú a allúkú ngenikich ach sipwe féri och mettóch mi ú ngeni án Kot allúk? Álleani Föför 5:28, 29. Mwirin, fichi ei VIDEO me pwóróusfengen wóón ekkeei kapas eis.

• Ika án Kot allúk me án mwúún aramas allúk ra ú fengen, án ié allúk sipwe álleasochisi?

• Ineet atun Chón Kraist resap álleasochisi án mwúún aramas allúk?

 4. Sisap angolong lón mwékútúkútún ei fénúfan lón ach ekiek me féffér

Álleani 1 Johannes 5:21. Mwirin, fichi ei VIDEO me pwóróusfengen wóón ekkeei kapas eis.

• Lón ewe video, pwata Ayenge ese fiti eú pekin politics are fiti chienan kewe chón angang le salute ngeni ewe filáik?

• Óm ekiek nge a kefiléch?

Ineet a tongeni weires ngenikich ach sisap angolong lón mwékútúkútún ei fénúfan? Fichi ei VIDEO, mwirin pwóróusfengen wóón ekkeei kapas eis.

• Ifa usun sisap peni epek atun sia katol eú urumwot án ekkewe sókkopaten fénú mi okkuffengen?

• Ifa usun sisap angolong lón mwékútúkútún ei fénúfan inaamwo ika ewe mwú a apwúngaló eú mettóch nge a weneiti manawach?

• Ifa usun minne sia katol wóón news are ié kewe sia chiechi ngeniir a tongeni etipetipakich le peni eú pekin?

 MENLAPAN

Chón Kraist ra achocho ar resap angolong lón mwékútúkútún ei fénúfan lón ar ekiek, kapas, me féffér.

Enniwili

• Met wisach ngeni mwúún aramas?

• Pwata sise angolong lón mwékútúkútún ei fénúfan?

• Ineet atun a tongeni weires ach sisap angolong lón mwékútúkútún ei fénúfan?