Jesuh in ama nungzuite pen ‘leitung tawh kipawl lo’ dingin thu na hilh hi. (Johan 15:19) Leitung tawh kipawl lo cih pen pan lam nei lo-a omna hi a, tua sungah gamvai le galkidona zong kihel hi. Pan lam nei lo-a om pen a tawntungin baih den lo hi. Zahkona kithuak khathei hi. Tua ahih leh pan lam nei lo-a omin Jehovah Pasian tung bekah citak ihihlam koi bangin lakkhia thei i hiam?

1. Khristian mante in mihing kumpite bangci muh uh a hiam?

Khristiante in kumpite zahtak uh hi. Jesuh’ gen mah bangin, “Sisar’ neihsate Sisar’ tungah pia” uh hi. Tua in, gam’ upadi-te zui-in phiangsiah le siah dangte pia uh cihna hi. (Marka 12:17) Mihing kumpite in Jehovah’ phalna hang bek tawh uk uh hi, cih Lai Siangtho in gen hi. (Rom 13:1) Tua ahih manin Pasian in mihing kumpite sangin thunei zaw hi cih ka thei uh hi. Mihingte’ buaina a vengsak dingin Pasian le ama vantung Gam bek mah ka lamen uh hi.

2. Pan lam nei lo-a om ihihlam koici lak thei i hiam?

Jesuh mah bangin, gamvai-ah ka kihel kei uh hi. Jesuh in nalamdang a bawl pen mite’n a muh uh ciangin kumpi sepsak sawm uh hi. Ahih hang, Jesuh kihemkhia hi. (Johan 6:15) Bang hang hiam? “Keima ukna pen hih leitung gam hi lo hi,” ci-in a nung ciangin Jesuh in gen hi. (Johan 18:36) Jesuh’ nungzui ka hih man un, pan lam nei lo-a om ka hihlam uh pen lampi tuamtuam tawh ka lak uh hi. Gentehna-in, galkap ka sem kei uh hi. (Mikah 4:3 sim in.) Gam le minam ciaptehna, dialkhai cih bangte ka zahtak uh hang, ka bia kei uh hi. (1 Johan 5:21) Gamvai kipawlna le a miliante thukimpihna ahi zongin lang panna ahi zongin ka nei kei uh hi. Tua bang danin Pasian Gam tung bekah citak ka hihlam ka lak uh hi.

 ZON BEH INLA, MUH BEH IN

3. Khristian mante in pan lam nei lo uh hi

Jesuh le a nungzuite in eite adingin etteh ding lim na koih uh hi. Rom 13:1, 5-7 le 1 Peter 2:13, 14 sim in. VIDEO hong in. Tua khit teh a nuai-a dotnate kikum un.

• Leitung kumpite pen bang hangin i zahtak ding kisam a hiam?

• Amaute’ thu i manlam i lah theih dan pawlkhat in bang a hiam?

Gal a kido hun sungin gam pawlkhatte in pan lam nei lo-a om a kicih uh hangin a lang nihin panpih tuak uh hi. Pan lam nei lo-a om cih pen a taktakin bang a cihnopna hiam? Johan 17:16 sim in. VIDEO hong in. Tua khit teh a nuai-a dotna kikum un.

• Pan lam nei lo-a om cih a khiatna in bang a hiam?

Pasian thukham tawh a kituak lo nate sem dingin leitung kumpite in hong sawl leh bang cih ding i hiam? Sawltak 5:28, 29 sim in. VIDEO hong in. Tua khit teh a nuai-a dotnate kikum un.

• Mihing upadi le Pasian’ thukham a kituak loh ciangin kua’ thu i mang zaw ding hiam?

• Bang dinmunte-ah Khristiante in leitung kumpite’ thu a man ding uh kisam lo a hiam?

 4. Ngaihsutna le sepnate-ah pan lam nei lo-in om in

Johan Masa 5:21 sim in. VIDEO hong in. Tua khit teh a nuai-a dotnate kikum un.

• Hih video sunga Ayenge in bang hangin gamvai party-ah kihel lo ding le gam le nam itna pawite-ah kihel lo dingin thu khensat a hiam?

• A thu khensatna man na sa hiam?

Bang dinmun dangte in pan lam nei lo-a om haksasak thei hiam? VIDEO hong in. Tua khit teh a nuai-a dotnate kikum un.

• Gam tuamtuam kidem a, kimawlna pawite-ah koi bangin pan lam nei lo-in om thei ding i hiam?

• Gamvai thu khensatnate hangin ei mahmah in phattuamna ngah ding ahih kei leh siatna tuak ding ihih phial leh zong koi bangin pan lam nei lo-in om thei i hiam?

• Thu zaksakna media ahih kei leh lawm le gualte in pan lam nei lo-a i om ding pen koi bangin haksasak thei uh a hiam?

 TOMLAKNA

Khristiante in gamvai tawh kisai-in ngaihsutna, kampauna, le sepnate-ah pan lam nei lo-a om dingin hanciam uh hi.

Kikupkikna

• Mihing kumpite tungah eite in bang tavuan nei i hiam?

• Gamvai-ah bang hangin pan lam nei lo-in om i hiam?

• Bang dinmunte-ah pan lam nei lo-a om ding haksa thei a hiam?