Jesús tiʼ sube jiñi xcʌntʼañob i chaʼan: «Mach i chaʼañeticla pañimil» (Juan 15:19). Ili yom i yʌl chaʼan maʼañic miʼ yotsañob i bʌ tiʼ chaʼan bʌ política mi muqʼuic i majlelob ti guerra tac. Pero an i tajol wocolʌch mi la cubin chaʼan maʼañic mi la cotsan lac bʌ tiʼ chaʼan bʌ pañimil (mulawil) come tajol mi lac wajlentel. ¿Chuqui miʼ mejlel lac mel chaʼan maʼañic mi la cotsan lac bʌ tiʼ chaʼan bʌ ili pañimil i chaʼan chʌn xucʼulonla tiʼ tojlel Jehová?

1. ¿Bajcheʼ yilal mi laj qʼuel jiñi yumʌlob?

Jiñi i sujm bʌ xñoptʼañonla mi laj qʼuel ti ñuc jiñi yumʌlob. Jesús tsiʼ yʌlʌ: «Aqʼuenla César i chaʼan bʌ César». Jin chaʼan mi lac jacʼbeñob i tʼan jiñi yumʌlob, jumpʼejl ejemplo cheʼ bʌ miʼ cʼajtiñob jiñi tojoñel (Marcos 12:17). Jiñi Biblia miʼ pʌs chaʼan jiñi yumʌlob woli (choncol) i melob i yeʼtel come Dios woli (yʌquel) i yʌcʼ chaʼan miʼ chaʼleñob yumʌntel (Romanos 13:1). La cujil chaʼan jiñi yumʌlob pʼisbil jach jiñi eʼtel añoʼ bʌ i chaʼan come jiñi ñumen ñuc bʌ yumʌl jiñʌch Dios. Wen la cujil chaʼan jiñi lac Dios yicʼot jiñi i Yumʌntel am bʌ ti panchan mi caj i tojʼesan pejtelel jiñi wocol am bʌ wʌʼ ti pañimil.

2. ¿Bajcheʼ mi lac pʌs chaʼan maʼañic mi la cotsan lac bʌ tiʼ chaʼan bʌ pañimil?

Cheʼ bajcheʼ Jesús, joñonla jaʼel maʼañic mi la cotsan lac bʌ tiʼ chaʼan bʌ política. Cheʼ bʌ jiñi lac piʼʌlob tsiʼ qʼueleyob chaʼan Jesús woliʼ mel jumpʼejl milagro tsiʼ ñopoyob i sujtesañob ti rey, Jesús maʼañic tsiʼ jacʼʌ (Juan 6:15). Jesús tsiʼ yʌlʌ: «Jiñi c Yumʌntel mach i chaʼañic ili pañimil» (Juan 18:36). Jiñi xcʌntʼañonbʌla i chaʼan Jesús cabʌl bajcheʼ mi lac pʌs chaʼan maʼañic mi la cotsan lac bʌ tiʼ chaʼan bʌ pañimil. Jumpʼejl ejemplo, maʼañic mi lac majlel ti guerra (pejcan Miqueas 4:3). Anquese mi laj qʼuel ti ñuc i símbolo tac jumpʼejl país bajcheʼ jiñi i bandera, maʼañic mi la cʌqʼuen i ñuclel come lajalʌch bajcheʼ woli lac chʼujutesan (1 Juan 5:21). Cheʼ jaʼel, maʼañic mi laj coltan o mi la cʌcʼ lac bʌ tiʼ contra jumpʼejl partido i chaʼan bʌ política o juntiquil yom bʌ ochel bajcheʼ yumʌl. Cheʼ bajcheʼ ili yicʼot ti yan tac bʌ mi lac pʌs chaʼan xucʼulonla tiʼ Yumʌntel Dios, jiñi yumʌntel tsaʼ bʌ i waʼchoco.

 LAʼ LAC ÑUMEN ÑAʼTAN

3. Jiñi i sujm bʌ xñoptʼañonla maʼañic mi la cotsan lac bʌ tiʼ chaʼan bʌ pañimil

Jesús yicʼot jiñi xcʌntʼañob i chaʼan tsiʼ yʌqʼueyoñobla wem bʌ ejemplo. Pejcanla Romanos 13:1, 5-7 yicʼot 1 Pedro 2:13, 14. Cheʼ jiñi qʼuelela jiñi VIDEO i tem alʌla iliyi:

• ¿Chucoch yom mi laj qʼuel ti ñuc jiñi añoʼ bʌ i yeʼtel?

• ¿Bajcheʼ tac miʼ mejlel lac pʌs chaʼan mi lac chuc lac bʌ tiʼ tojlelob?

Cheʼ woliʼ yujtel guerra, an país tac muʼ bʌ i yʌlob chaʼan maʼañic miʼ yotsañob i bʌ ti jiñi wocol, pero añʌch chuqui miʼ melob chaʼan miʼ coltañob jiñi tejclum tac woli bʌ i contrajiñob i bʌ. Pero ¿maʼañic ba woliʼ yotsañob i bʌ cheʼ bʌ miʼ melob bajcheʼ jiñi? Pejcanla Juan 17:16. Cheʼ jiñi qʼuelela jiñi VIDEO i tem alʌla iliyi:

• ¿Chuqui yom i yʌl cheʼ maʼañic mi la cotsan lac bʌ tiʼ chaʼan bʌ ili pañimil?

An i tajol jiñi yumʌlob miʼ cʼajtibeñoñobla am bʌ tiʼ contra i mandar Dios. ¿Chuqui mi lac mel cheʼ miʼ yujtel jiñi? Pejcanla Hechos 5:28, 29. Cheʼ jiñi qʼuelela jiñi VIDEO i tem alʌla iliyi:

• Mi jumpʼejl i mandar wiñicob miʼ contrajiben i mandar Dios, ¿baqui bʌ yom mi lac jacʼ?

• ¿Baqui tajol jiñi xñoptʼañob maʼañic mi caj i jacʼbeñob i tʼan jiñi añoʼ bʌ i yeʼtel?

 4. Mach a coltan ili pañimil ti a pensar yicʼot ti a melbal

Pejcanla 1 Juan 5:21. Cheʼ jiñi qʼuelela jiñi VIDEO i tem alʌla iliyi:

• ¿Chucoch Ayenge maʼañic tsiʼ mulaj i yotsan i bʌ ti política yicʼot maʼañic tsiʼ chaʼle ti saludar jiñi bandera?

• ¿Weñʌch ba tsaʼ bʌ i mele maʼ wʌl?

¿Baqui tac jaʼel wocol miʼ mejlel la cubin chaʼan maʼañic mi la cotsan lac bʌ tiʼ chaʼan bʌ pañimil? Qʼuelela jiñi VIDEO i tem alʌla iliyi:

• ¿Bajcheʼ miʼ mejlel lac pʌs chaʼan maʼañic mi la cotsan lac bʌ tiʼ chaʼan bʌ pañimil cheʼ maʼañic mi laj coltan jiñi xʼalasob?

• ¿Bajcheʼ miʼ mejlel lac pʌs chaʼan maʼañic mi la cotsan lac bʌ tiʼ chaʼan bʌ pañimil anquese miʼ mejlel i ticʼlañonla o i coltañonla muʼ bʌ i yʌlob jiñi yumʌlob?

• ¿Bajcheʼ miʼ mejlel i ticʼlañonla muʼ bʌ la cubin ti noticia o muʼ bʌ i yʌlob jiñi lac piʼʌlob?

 TSAʼ BɅ LAJ CɅÑɅ

Jiñi xñoptʼañob miʼ chaʼleñob wersa chaʼan maʼañic miʼ yotsañob i bʌ ti política, jin chaʼan miʼ cʌntañob i pensar, chuqui miʼ yʌlob yicʼot i melbalob.

¿Chuqui tsaʼ cʌñʌ?

• ¿Chuqui an ti lac wenta mi lac mel tiʼ tojlel jiñi yumʌlob?

• ¿Chucoch maʼañic mi la cotsan lac bʌ ti política?

• ¿Baqui tac wocol mi la cubin chaʼan maʼañic mi la cotsan lac bʌ tiʼ chaʼan bʌ pañimil?