Jesus kwa shongire vakwami vendi ashi “kapi va hamena kuudjuni.” (Johannes 15:19) Evi vya kwatera mo kupira kuhama kehe kuno, kutanta ashi kupira kutovorora maupolitika ghaudjuni ndi kukuhameka muvita. Kapi vya kara ureru kupira kuhama kehe kuno. Kuvhura va tu shepe nakuturenkaura pakuvirughana. Weni tu pira kuhama kehe kuno ngoli tu hame kwaJehova?

1. Weni Vakriste vashiri va monanga mapangero ghavantu?

Vakriste kufumadeka mapangero. Atwe kurughana ovyo a ghambire Jesus ashi “mufutirange hompa waRoma ovyo vyamuhameno” kutanta ashi, atwe kulimburukwa veta dashirongo pashihonenito veta yakufuta mutero. (Markus 12:17) Bibeli kwa ghamba ashi mapangero kupangera mbyovyoshi Jehova a gha pulitira gha pangere. (Roma 13:1) Atwe kwa kwata lighano ashi, unankondo wa mapangero ghavantu usheshu. Atwe kwa kengera mwaKarunga nalipangero lyaUhompa wamuliwiru mukughupa po maudito naghantje ghavantu.

2. Weni tu negheda ashi kapi twa hama kehe kuno?

Yira Jesus, natwe kapi twa kuhamekanga muupolitika. Opo vantu va monine shitetu shaJesus, ava sheteke kumutura a kare hompa wavo ngoli uye kapi ava pulitilire. (Johannes 6:15) Nke a shweninine? Mbyovyoshi uye kwa ghambire ashi, “uhompa wande kapi wa hamena kuudjuni uno.” (Johannes 18:36) Atwe vakwami vaJesus kunegheda ashi kapi twa hama kehe kuno munkedi dakukushuva-shuva. Pashihonenito, atwe kapi twa yendanga kuvita. (Varura Miga 4:3.) Atwe kufumadeka viyivito vya yimaneno po shirongo yira marembe ngoli kapi twa vi kareranga. (1 Johannes 5:21) Ntani kapi twa hamanga ndi tu rwanite kehe politika ndi vantu va tovororanga. Munkedi dino nadimweya, atwe kunegheda ashi atwe kukwatitako Uhompa waKarunga mpantjawo.

 TEDA KO

3. Vakriste vashiri kapi va hamanga kehe kuno

Jesus navakwami vendi va tu tulilire po shihonenito shashiwa. Varura Roma 13:1, 5-7 ntani 1 Petrus 2:13, 14. Ntani kengera VIDIYO makura timwitirenu mapuro ghano.

• Nke tu fumadekera mapangero?

• Nkedi munke dimwe tu negheda ulimburukwi wetu kwavo?

Pavirugho vya vita, virongo vimwe kughamba ashi kapi vina kuhama kuvirongo vina kurwo ngoli kutapa mbatero yangandi kuvirongo ovyo yira kutapa maliva ndi virwito. Nke nani vya tanta kupira kuhama kehe kuno? Varura Johannes 17:16. Ntani kengera VIDIYO makura timwitirenu lipuro lino.

• Nke vya tanta kupira kuhama kehe kuno?

Weni ntjene ashi mapangero gha tu pangera tu rughane vininke vina kukulimbo naveta yaKarunga? Varura Virughana 5:28, 29. Ntani kengera VIDIYO makura timwitirenu mapuro ghano

• Ntjene ashi veta yashirongo kuna kukulimba naveta yaKarunga, veta yare tu limburukwa po?

• Kuvhura u ghayare ko maukaro ghamwe ogho Mukriste a pira kulimburuka lipangero ndi?

 4. Wa sha hama kehe kuno mumaghayaro ndi muvirughana vyoye

Varura 1 Johannes 5:21. Ntani kengera VIDIYO makura timwitirenu mapuro ghano.

• Muvidiyo, morwanke Ayenge a tokwilire mukupira kukuhameka muupolitika ndi a kuhameke muvilika vyashirongo yira kudjamena lirembe?

• Una kughayara a tulire po litokoro lyaliwa ndi?

Maukaro munke nka ghamwe gha vhuro kusheteka litokoto lyetu lyakupira kuhama kehe kuno? Kengera VIDIYO, makura timwitirenu mapuro ghano.

• Weni u pira kuhama kehe kuno ntjeneshi pana kara maudano ghasport gha hameno mo virongo vyapeke?

• Weni tu pira kuhama kehe kuno mpiri gha tu kundame matokoro va turanga po vamulipangero?

• Weni mbudi dakutunda kuintanet ntani kuvantu twa karanga navo vi kundama litokoro lyetu lyakupira kuhama kehe kuno?

 LIKAMO

Vakriste vana hepa kurughana unene mposhi va pire kuhama kehe kuno mumaupolitika vikare ashi mumaghayaro, munkango ndi muvirughana vyavo.

Livyukuruko

• Nke tuna hepa kutapa kumapangero?

• Nke tuna hepere kupira kuhama kehe kuno?

• Maukaro munke gha sheteko litokoro lyetu lyakupira kuhama kehe kuno?