Yesu a kwali ná bokwedi bao ba s’angame̱n be̱ “ba wase.” (Yohane 15:19) Nik’e mapula nde kwala ná ba si mano̱ngo̱ dongo o politik na o bila. Nde mbale̱ ńe nde ná banga la no̱ngo̱ dongo na wase di titi bu ponda ye̱se̱. Bato be ná ba yo̱ye̱ biso̱ ońola nika. Ne̱ni jeno̱ ná di banga no̱ngo̱ dongo na wase di tika pe̱ be̱ Yehova Loba jemea e?

1. Ne̱ni kriste̱n ya mbale̱ i me̱ne̱no̱ manea ma bato e?

Kriste̱n i mabola manea edube. Kana Yesu a kwalino̱ ná “mambo ma kaisa, bola mo̱ kaisa,” di masengane̱ mambenda m’ekombo ka ma mena ma mabaise̱ ná di sawe tax. (Marko 12:17) Bibe̱l e malee̱ ná manea ma bato me nde ońolana Yehova ese̱le̱ ná ma be̱. (Roma 13:1) Di maso̱ṅtane̱ so̱ ná ngiń’abu e be̱n myoyo. Loba lasu na janea lao le o mo̱ń nde di menge̱le̱no̱ o bo̱le̱ ndutu ya mbel’a moto.

2. Ne̱ni jeno̱ ná di lee̱ ná di si mano̱ngo̱ dongo na wase e?

Kapo̱ ka Yesu, di si mano̱ngo̱ dongo o politik. Buńa bō̱, ponda bato be̱nno̱ betańsedi a po̱ngino̱ ba puli timbise̱ mo̱ kiṅ’abu, nde Yesu a bangi. (Yohane 6:15) Ońola nje e? Ombusa ponda a teleye̱ ná: “Janea lam di titi la nin wase.” (Yohane 18:36) Biso̱ bokwedi ba Yesu di malee̱ ná di si mano̱ngo̱ dongo na wase o mbadi jita. K’eyembilan di si mala o bila. (Langa Mika 4:3.) Di mabola dibato la ńungu na bene̱ byemban b’ekombo edube, nde di si mowe̱ mo̱. (1 Yohane 5:21) Di si masue̱le̱ to̱ te̱nge̱ne̱ ńaṅ la politik to̱ diwo̱ to̱ mot’a politik to̱ mō̱. O yin mbadi na ipe̱pe̱, di malee̱ ná je nde jemea na janea diwo̱ na mune, Janea la Loba.

 ALA O NJIBA

3. Kriste̱n ya mbale̱ i si mano̱ngo̱ dongo na wase

Yesu na bokwedi bao ba die̱le̱ biso̱ eyembilan. Langa Roma 13:1, 5-7 na 1 Petro 2:13, 14. Ombusa nika, ombwa SINIMA nde lo kwaleye pe̱ ońola myuedi mi mabupe̱.

• Ońola nje jangame̱nno̱ bola manea ma bato edube e?

• O njika mbadi jeno̱ ná di lee̱ ná di sibise̱ biso̱me̱ne̱ owas’abu e?

Bila be te̱, bekombo bō̱ be ná be kwala ná be si mano̱ngo̱ dongo oten, nde ke̱ be o sue̱le̱ midi mibane̱. Si no̱ngo̱ la dongo le nde nje na mbale̱ e? Langa Yohane 17:16. Ombusa nika, ombwa SINIMA nde lo kwaleye pe̱ ońola myuedi mi mabupe̱.

• Si no̱ngo̱ la dongo nik’e mapula nde kwala ná nje e?

Nje bola yete̱na manea ma bato ma baise̱ ná di bole lambo di mate̱nge̱ne̱ mbend’a Loba e? Langa Bebolo 5:28, 29. Ombusa nika, ombwa SINIMA nde lo kwaleye pe̱ ońola myuedi mi mabupe̱.

• Mbend’a bato ba benama e mate̱nge̱ne̱ te̱ mbend’a Loba, njika mo̱ jangame̱nno̱ sengane̱ e?

• O njika bete̱medi kriste̱n yeno̱ ná i banga sengane̱ manea e?

 4. O si no̱ngo̱ dongo na wase o mo̱nge̱le̱ to̱ o bebolo

Langa 1 Yohane 5:21. Ombusa nika, ombwa SINIMA nde lo kwaleye pe̱ ońola myuedi mi mabupe̱.

• O ni sinima, ońola nje munasango Ayenge a bangino̱ so̱lo̱ o ńaṅ la politik to̱ soma dibato la ńungu e?

• O mo̱nge̱le̱ ná a no̱ngi bedomsedi ba bwam e?

Njika bete̱medi bepe̱pe̱ be ná be we̱le̱ si no̱ngo̱ lasu la dongo o kekise̱ e? Ombwa SINIMA, nde lo kwaleye pe̱ ońola myuedi mi mabupe̱.

• Ne̱ni jeno̱ ná di banga no̱ngo̱ dongo o pond’a maloko ma bekombo e?

• Ne̱ni jeno̱ ná di banga no̱ngo̱ dongo ke̱ bato ba politik ba no̱ngi bedomsedi ba bwam to̱ ba bobe be matape̱ biso̱ e?

• Ne̱ni mambo di masengano̱ o mibia to̱ mambo mindenge masu mi makwalano̱ meno̱ ná ma tapa biso̱ e?

 EBONGOLO

Kriste̱n i mapo̱ngo̱ miwe̱n minde̱ne̱ ná i si no̱ngo̱ dongo o politik, e be̱ o mo̱nge̱le̱, o byala to̱ o bebolo.

Ndimbisedi

• Nje jangame̱nno̱ bola manea ma bato e?

• Ońola nje di si mano̱ngo̱no̱ dongo o politik e?

• Njika bete̱medi be ná be we̱le̱ si no̱ngo̱ lasu la dongo na wase o kekise̱ e?