Jíízọ̀s beè noòmà gbò e bà ólò nyoonée nvée kọọ̀ bà náa “dṹùnà bàlà boo.” (Jọ́ọ̀n 15:19, NW) Níí bãàa mm̀ ge tõó kele, ea tõó dọ̀ kọọ̀ bà náa é gbááá ló bìlà bẹbẹ̀l nè bé gím. Mm̀ kà kà, náa ólò bọọgẹ̀ valí gè tõó kele. Gbò nen é láá nvèèmài lẹ́ boo béè kọ è tõò kele. Mósĩ́ deè ní eé láá kilsĩ́ gè tõó kele vaá bọ́ló dẹ̀lẹ̀ nyíé boo nè Jìhóvà Bàrì é?

1. Kà kà gbò níí Kráìst ólò ẹ̀b kpóó bẹbẹ̀l naa vàẹ?

Gbò e bà gé nyoone nvéè Kráìst ólò fã̀ dẽè kpóó ea gé bẹl. È ólò naa nú e Jíízọ̀s beè kọ̀a, ea kọ́ọ̀ “kpẽi nu ea kuu Méné Róm̀ nei Méné Róm̀”—níá tõó dọ̀ kọọ̀ èé gbantṍ ló log ea gé lẹẹlà bel ló kiẽ́e e tõò, dì belí log ea kọ́ é kpẽ́ kpègè gbáá. (Máàk 12:17) Kpá Káí nóòmài kọọ̀ gbò nen gé bẹl boo béè kọọ̀ Jìhóvà sọ́va tọ́ deè. (Róm̀ 13:1) Vóà naa, è nyímà kọọ̀ ba kpóó lẹ̀ẹ̀là bel íe kiẽ́e ea íná elá. È íè ból dẽesĩ́ kọọ̀ Bàrì nè a Boǹ Méné ea di káála ní ea é nveè kùbmà ló tã̀àgã̀ e gbò nen gé mon ẽ́.

2. Mósĩ́ deè ní eé láá zogè kọọ̀ è tõò kele é?

Dì belí Jíízọ̀s, née ólò gbaaá ló bìlà bẹbẹ̀l. Gbò nen beè gbĩ́ gè tú Jíízọ̀s naamá ba méné tṍó e bà mon tóm dũ̀ùnè ea sí, sõò náa beè zìgà. (Jọ́ọ̀n 6:15) Éé ní ea beè naa kọ á gá zìgà ẹ? Boo béè bel ea beè ló sìgà tṍó aa ló tṍóá kọọ̀, “nà ge dú méné ea gé bẹl náa aa bàlà booí.” (Jọ́ọ̀n 18:36) Dì belí gbò e gé nyoone nvéè Jíízọ̀s, è ólò tõó kele mm̀ gã́bug sĩ́deè. Dì belí nu dòòmà bá, née ólò sí ól bé. (Bugi Máíkà 4:3.) È ólò fã̀ dẽè nú ea doà bá dó—dì belí kpáta—sõò née ólò fã̀. (1 Jọ́ọ̀n 5:21) Vaá née ólò gbaaá ló tọ́ọ̀ kà bìlà bẹbẹ̀l àbèè nen ea élá tẹ́lẹ̀ kpá. Mm̀ gbò sĩ́deèí nè gbò ńdõòna kà, è zógè kọọ̀ è aà deè bọ́ló dẹ̀lẹ̀ nyíé boo kilma ló bẹbẹ̀l Bàrì.

 KPÁÁ NÓ BỌ̀Ọ̀VẸ̀

3. Kà kà gbò e bà gé nyoone nvéè Kráìst ólò tõó kele

Jíízọ̀s nè gbò e bà ólò nyoonée nvée beè nèi kà lé nu dòòmà bá. Bugi Róm̀ 13:1, 5-7 nè 1 Pítà 2:13, 14. Tṍóá ò gbóó bìlà VÍDIÒÍ, vaá aalai gbò bíb ea nyoone.

• Éé ní ea náa vaá èé fã dẽè kpóó ea gé bẹl ẹ́?

• Mókà gbò sĩ́deè ní eé láá zogè kọ è gbaǹ va tṍ ló é?

Tṍó e bé gím dọ, sìgà dó ólò láá sẹlẹ ló belí kọọ̀ bà tõonìè kele, sõò bà ólò nvèè sãa kúm pálàa kà dó ea gé béáá. Éé ní e gè tõó kele tõó dọ̀ ẹ? Bugi Jọ́ọ̀n 17:16. Tṍóá ò gbóó bìlà VÍDIÒÍ vaá aalai bíb ea nyoone.

• Éé ní ea kọlà ge tõó kele é?

Éé ní eo é náa beè kpóó ea gé bẹl kọ́ ó naa nú ea bé uú boo log Bàrì e? Bugi Tóm 5:28, 29. Tṍóá ò gbóó bìlà VÍDIÒÍ vaá aalai gbò bíb ea nyoone.

• Beè tṍó e log gbò nen bé uú boo log Bàrì, log mée ní ea bọ́ló kọ é gbàntṍ ló é?

• É kọ ò bulà kọọ̀ à íe sìgà dìtõ̀ò e nen ea gé nyoone nvéè Kráìst náa é gbantṍ ló kpóó ea gé bẹl?

 4. Tõó kele mm̀ o bug nè o láb

Bugi 1 Jọ́ọ̀n 5:21. Tṍóá ò gbóó bìlà VÍDIÒÍ vaá aalai gbò bíb ea nyoone.

• Mm̀ vídiòá, éé ní ea beè naa kọọ̀ Ayenge á gá gbaaá ló bìlà bẹbẹ̀l nè gbò sẹ̀lẹ̀nù ea nveè ka ló dó, dì belí gè kànà moǹ kpáta ẹ́?

• É kọ ò bulà kọọ̀ a beè nè lé béèlàfùl?

Mókà dõòna kà gbò dìtõ̀ò ní ea é láá dòà bẹẹ gè tõó kele é? Bìlà VÍDIÒÍ, vaá ò gbóó aalai gbò bíb ea nyoone.

• Mósĩ́ deè ní eé láá kilsĩ́ gè tõó kele tṍó e bàà kà dó gé ana ló bìlà bil gànè ló é?

• Mósĩ́ deè ní eé láá kilsĩ́ gè tõó kele beè kpóó ea gé bẹl ne béèlàfùl ea é léeí ló àbèè kọ àé bẽ́eí ló é?

• Mósĩ́ deè ní e gbò kpẹ̀a e dã́à àbèè ní e monì boo íntanèt nè gbò e zọọ̀ naaá nu é láá tọá ló bẹẹ gè tõó kele é?

 NÚ E NI NÓ

Gbò e bà gé nyoone nvéè Kráìst ólò pììga boo kọ bà náa é gbáàẹ̀ ló bìlà bẹbẹ̀l mm̀ ba bug, moǹ bel, nè láb.

Ge Òòa Boo

• Éé ní ea bọ́ló kọ é naa nè kpóó ea gé bẹl ẹ́?

• Éé ní ea náa vaá è ólò kilsĩ́ gè tõó kele aa ló bìlà bẹbẹ̀l ẹ?

• Mókà gbò dìtõ̀ò ní ea é láá dòà bẹẹ gè tõó kele é?