Zesu ə kɛ ŋɔ kalan nea diɛ maahonɛɛli di kɛ “ a yɛnɛɛ nwɔɔ ” (Ɉaan 15:19). Yili mukulaa ɓaa di hwa di laa too politikə mɛni hu, ə lɛɛ di hwa di laa too kɔ mɛniɠaa hu. Kəlaa a teɲa kpɔkpɔ gɛ laa ho nɛɛ li nu ə naakulɔ yɛnɛɛ mɛniɠaa hu. Yili a pɛli ə gɛ nua diɛ gu laaɓo awala kɛtii diɛ yɛlɛ guɔ. Gwa lɛɛ ləi a nuai di laa ho yɛnɛɛ mɛniɠaa hu ə lɛɛ di təlimoɔ Zehova ɓa ?

1. Kilistalea leeleeɠaa da lɔi ɲaawooɓonua kaa ləi ?

Zehova ŋɔ Kəlaɠaa da lɔi ŋaawooɓonua maawiɛ. Yɛ pələi Zesu ə mo la gwa “ Sesarə nwɛi tɛɛ Sesarə pɔ. ” Yili mukulaa ɓaa gwa nɔi tɔnŋaa maawiɛ guɔ niihɔnnwɔɠaa hala (Markə 12:17). Biblə a nɛ yɛ ma nukanŋaa da ŋaawooɓolaa kɛ maahɔlɔɓo Zehova ɓə hwaa ma (Romə 13:1). Yili ɓa nukanŋaa di wɔ ŋaawooɓolaa ɲɛn gaa ma. Yálá ɓə gu kilitɔɔ ma da ŋɔ yələkɔlɔn ɉu tɔɔlaa yɛnɛɛ mɛniɠaa kpɛɛ mɛni ɓa.

2. Gwa pɛli nɛi ləi guɔ ma gu laa ho yɛnɛɛ mɛniɠaa hu ?

Yɛ pələi lɔ Zesu ə gɛ la, gu hwa gu laa too politikə mɛni hu. Ɓɛlowai nua di Zesu ŋɔ kpalo mɛniɠaa kaa la di kɛ bɔ di gɛ a tɔɔmun lɔi mɛi, kəlaa ho gɛ (Ɉaan 6:15). Lə mɛni ɓa ho gɛ ? Maahɔlɔɓo pulu ɓa ə mo yɛ́ ma : “ Ŋɔ́ tɔɔlaai ho a yɛnɛɛ ɓɛ tɔɔlaa ” (Ɉaan 18:36). Guɔi a Zesu ŋɔ kalan neai gwa nɛ guɔ ma gu laa ho yɛnɛɛ mɛniɠaa hu a kpaalə tamaa. Gwa gɔɔma həɠə, gu hwa gu laa too kɔ mɛniɠaa hu (Misə 4:3 ɓo). Gwa drapoo maawiɛ ə ma kɛ lɔi maawiɛhɛn da kpɛliɠaa, kəlaa gu hwa kwɛli hwilɛn diɛ (Ɉaan dɔlɔɔ 5:21). Gu hwa gu laa too politikə mɛni hu, gu hwa gu yee hee politikə kɛmun da mu, ə lɛɛ gu ho nwɔnɔ a politikə kɛmun lɔpee ta ɲɔwo. Bələ ɓə gwa nɛ la ə ma kɛ nwɔnɔ mɛni takpɛliɠaa hu guɔ ma Yálá ŋɔ Tɔɔlaa yaa tɔnɔ gbən ɓə gu təlimoɔ ma.

 Ə́ WƆ MƐNIKƆLƆNŊAA TA PƐLƐ MA

3. Kilistalea leeleeɠaa laa ho yɛnɛɛ mɛniɠaa hu

Zesu da ŋɔ kalan nea di kaa a kɔɔmaa gu yəi. Romə 13:1, 5-7 da Piɛrə dɔlɔɔ 2:13, 14 ɓo, ə́ VIDIO kaa, ə lɛɛ ka lono kɛ gɛɛmaalənŋaa ŋɛi mɛi.

• Lə mɛni ɓa maanɛɛ gu lɛɛ lɔi ɲɛitɔwɔnua woo mu ?

• Gwa pɛli nɛi ləi guɔ ma gwa lɛɛ lɔi ɲɛitɔwɔnua woo mu ?

Kɔ kɔi lowai lɔi taɠaa hu nua da mo diɛ ma di wɛi di laa ho gɔ mɛni hu. Kəlaa gwa naa kaa da kɛ kpɔnmaa tɛɛ gɔ kɔ nua pɔ. Gu laakulɔ mɛni yɛnɛɛ mɛniɠaa hu yili mukulaa kpɔkpɔ ɓaa lə ? Ɉaan 17:16 ɓo, ə́ VIDIO kaa ə lɛɛ ka lono kɛ gɛɛmaalən ŋɛi mɛi.

• Gu laakulɔ mɛni yɛnɛɛ mɛniɠaa hu mukulaa ɓaa lə ?

Lɔi ɲɛitɔwɔnua da kɛ ma gu mɛni ta kɛ yii Yálá ŋɔ tɔn hwa hwaa ma yaan ? Gɛlaɠaa 5:28, 29 ɓo ə́ VIDIO kaa, ə lɛɛ ka lono kɛ gɛɛmaalənŋaa ŋɛi mɛi.

• Nukanŋaa di wɔ tɔn da Yálá ŋɔ tɔn awala kɛ lii gee pɔ gbɛɛ ɓə maanɛɛ gu lɛɛ nwoomu ?

• Mɛnitaɠaa hwaaɓo yii lɔi ɲɛitɔwɔnua da kɛ ma nua di gɛ, kilistalon hwa pɛli lɛɛ di woo mu ?

 4. Nɛ yɛ́ ma ə́ laa hó yɛnɛɛ mɛniɠaa hu ə́ kiliŋahiɛ pələ hu da ə́ túwɔ́ pələ hu

Ɉaan dɔlɔɔ 5:21 ɓo ə́ VIDIO kaa, ə lɛɛ ka lono kɛ gɛɛmaalənŋaa mɛi.

• Vidio hu, lə mɛni ɓa Ayenge ho gɛ ho naa too polikə kɛ mɛni hu ə ma kɛ drapoo tɛ mɛni ?

• Ə́ wɔ kili ɓa mɛni lɛlɛɛ ɓə tii ə gɛi ?

Gwa kɛ bɔ gu gu laakulɔ yɛnɛɛ mɛniɠaa hu, mɛni takpɛli ləkɛɛɠaa ɓə nwɔnɔ gɛ laa hwa kɛ a nɛɛ gu yəi ? VIDIO kaa, ə lɛɛ ka lono kɛ gɛɛmaalənŋaa ŋɛi mɛi.

• Gwa pɛli nɛi ləi guɔ ma gu laa ho yɛnɛɛ mɛniɠaa hu, lɔi takpɛli hu nua da kɛi pə́lə́ɠaa kɛ yɛ pələi ballon gɛlɛɛ kaa la ?

• Mɛniɠaa nɔi ɲɛitɔwɔnua da kɛ moi, yɛ ə́ lɛlɛ guɔ yɛ ə ɲɔnwɔ guɔ, gwa pɛli nɛi ləi guɔ ma gu laa ho ɲɛnɛɛ ŋɛi hu mɛniɠaa hu ?

• Gwa nuai gwa kɛ tɛi guɔ yɛɛ, ə lɛɛ guɔ mɛniɠaa mɛn radio da tələviziɔn hu. Yili a pɛli gɛi ləi gu gu laatoo yɛnɛɛ mɛniɠaa hu ?

 YII GU GALAN

Zehova ŋɔ Kəlaɠaa túwɔ́ pələ hu, di kiliŋahiɛ pələ hu, ə ma kɛ di hwaawoo hu, da mɛni kəlee kɛ ə gɛ di ho di laatoo ɲɛnɛɛ ŋɛi hu mɛniɠaa hu.

Nɛɛ ə́ kili pɔ

• Maanɛɛ guɔ túwɔ́ ləi nɔi ɲɛitɔwɔnua pɔ ?

• Lə mɛni ɓa maanɛɛ gu gu laakulɔ politikə mɛniɠaa hu ?

• Gwa gu laakulɔ yɛnɛɛ mɛniɠaa hu, hukɔɔn mɛni ləkɛɛɠaa ɓə da pɛli həlii guɔ ?