Yezu yuun pa’alɛ a podɔleba la ti ba da dekɛ bamesi “pa’asɛ tingɔŋɔ la poan.” (Yon 15:19) Wana pa’alɛ ti to da dekɛ tomesi pa’asɛ tingɔŋɔ wa nalɛɣerɛ yɛla la ba zaberɛ yɛla poan. Yelemɛŋɛrɛ la dela, la ni daɣena naana ti to yese tomesi tingɔŋɔ wa yɛla poan. Ba ta’an zɛregɛ tɔ wana wa zuo. To wan eŋɛ la wani yese tomesi tingɔŋɔ wa yɛla poan ge kelum tara yelemɛŋɛrɛ bɔ’ɔra Yehowa Naayinɛ?

1. Yelemɛŋɛrɛ Kristakɔma geele asaala gɔmɛtdoma la wani?

Kristakɔma nari ti ba tara gilema bɔ’ɔra gɔmɛtdoma. To doli la Yezu n yeti “dekɛ ya Kaesar denɛ bo Kaesar.” Bala vuurɛ dela, to nani tiŋa la lɔɔ mɛ maɣesɛ wuu la nari ti to yɔɔra lampo la. (Mark 12:17) Baabule la yeti asaala gɔmɛt la biseri mɛ se’ere n sɔi la Yehowa n bo ba yɔ’ɔ ti ba bisera. (Arom 13:1) Bala la, to baŋɛ ti asaala gɔmɛt la kpe’eŋo pɔ’ɛ mɛ. Tomam mi ti Naayinɛ saazuo Na’am la ma’a n wan ta’an maalɛ asaala yɛla.

2. To wan eŋɛ la wani pa’alɛ ti tomam ka dekɛ tomesi pa’asɛ tingɔŋɔ wa yɛla poan?

Wuu Yezu la, tomam me ka laɣum pa’asɛ nalɛɣerɛ yɛla poan. Se’em ma’a ti nɛreba yuun nyɛ Yezu yelekiriga ayima la, ba yuun tiregɛ ti ba bobe en ti a dɛna naba tingɔŋɔ wa zuo ge a yuun ka bo ba yɔ’ɔ. (Yon 6:15) Bem zuo? Se’ere n sɔi la, a yuun yeti, “mam Na’am la ka pa’asɛ tingɔŋɔ wa poan.” (Yon 18:36) Wuu tomam n de Yezu podɔleba la, to iti pa’ala ti tomam ka pa’asɛ tingɔŋɔ wa yɛla poan sarɔtɔ zo’e zo’e poan. Makerɛ, to ka pa’asɛ zaberɛ poan. (Kaalɛ Mikah 4:3.) To tari gilema bɔ’ɔra tiŋa lɔɣɔrɔ mɛ​—maɣesɛ wuu tuutadoma​—ge to ka na’aseri ba. (1 Yon 5:21) To me ka soŋeri bii giisa nalɛɣerɛ party bii nɛresɛka n lɛɣeri na’am la. Sore ana poan la yɛla ase’a poan, to iti pa’ala ti to kɔ’ɔn tara la yelemɛŋɛrɛ bɔ’ɔra Naayinɛ Na’am la.

 VIISƐ PA’ASƐ

3. Yelemɛŋɛrɛ Kristakɔma ka dekɛ bamesi pa’asɛ tingɔŋɔ wa yɛla poan

Yezu la a podɔleba la eŋɛ makesonɛ bo to mɛ. Kaalɛ Arom 13:1, 5-7 la 1 Peter 2:13, 14. Ŋmɛ VIDIYO la ge nyaa sɔsɛ sokere ana wa:

• Beni n sɔi ti la nara ti to tara gilema bɔ’ɔra sɛba n tari kpe’eŋo la?

• Sore ani poan ti to ita pa’ala ti to nani ba?

Zaberɛ saŋa poan, tisi basɛba ni yeti bamam kan soŋɛ nɛnɛra ge ba ni soŋɛ la sɛba za’a n zaberi la. La vuurɛ sirum dela bem ti ho da laɣum pa’asɛ tingɔŋɔ wa yɛla poan? Kaalɛ Yon 17:16. Ŋmɛ VIDIYO la ge nyaa sɔsɛ sokere wa:

• La vuurɛ dela bem ti ho da laɣum pa’asɛ tingɔŋɔ wa yɛla poan?

Tingɔŋɔ wa kpɛ’ɛndoma san yeti ho eŋɛ sɛla n ka makɛ la Naayinɛ lɔɔ la, ho wan eŋɛ la wani? Kaalɛ Tooma 5:28, 29. Ŋmɛ VIDIYO la ge nyaa sɔsɛ sokere ana wa:

• La san ta dɛna ti nɛresaala lɔɔ ka makɛ la Naayinɛ lɔɔ, ani lɔɔ n nari ti to nam?

• Hon ti’isɛ ti bem yɛla poan ti Kristakɔma kan nam bo tingɔŋɔ wa kpɛ’ɛndoma?

 4. Basɛ ti ho ti’isegɔ la ho itigɔ pa’alɛ ti ho ka dekɛ homea pa’asɛ tingɔŋɔ wa yɛla poan

Kaalɛ 1 Yon 5:21. Ŋmɛ VIDIYO la ge nyaa sɔsɛ sokere ana wa:

• Vidiyo la poan, beni n sɔi ti Ayenge kɔ’ɛ a puti’irɛ ti a kan dekɛ amea pa’asɛ nalɛɣerɛ party poan bii a tiŋa yɛla poan maɣesɛ wuu ba na’aseri tuuta la?

• Hon ti’isɛ ti a daa loe la loesonɛ?

Bɔnkani poan ti la wan ta’an kpe’em bo to la to ka dekɛ tomesi pa’asɛ tingɔŋɔ wa yɛla poan la? Ŋmɛ VIDIYO la ge nyaa sɔsɛ sokere ana wa:

• To wan eŋɛ la wani pa’alɛ ti to ka dekɛ tomesi pa’asɛ satiŋa giila kpemesego de’eŋo poan?

• To wan eŋɛ la wani kan dekɛ tomesi pa’asɛ tingɔŋɔ wa yɛla poan hali nalɛɣerɛdoma san eŋɛ sɛla soŋɛ tɔ bii daam tɔ?

• To zɔdoma la lasebaarɛ yɛla wan ta’an tara daaŋɔ paɛ to la wani la to ka dekɛ tomesi pa’asɛ tingɔŋɔ wa yɛla poan la?

 YELEKPINE

Kristakɔma kɔ’ɔn basɛ ti ba ti’isegɔ, ba yetɔɣum la ba itigɔ pa’alɛ ti ba ka dekɛ bamesi pa’asɛ nalɛɣerɛ yɛla poan.

Tiisegɔ Sokere

• Bem ti to ita bɔ’ɔra asaala gɔmɛtdoma?

• Beni n sɔi ti to ka dekɛ tomesi pa’asɛ nalɛɣerɛ yɛla poan?

• Bɔnkani poan ti la wan ta’an kpe’em bo to la to ka dekɛ tomesi pa’asɛ tingɔŋɔ wa yɛla poan la?