Jesu plọnmẹ dọ hodotọ emitọn lẹ “ma [dona] yin apadewhe aihọn tọn.” (Johanu 15:19) Ehe zẹẹmẹdo dọ yé dona nọ nọ̀ kada, bo ma dona nọ doalọ to tonudidọ po awhàn po mẹ. Nado dọ hójọhó, kadaninọ ma nọ bọawu to whelẹponu. E gán zọ́n bọ mẹlẹ na ṣàn mí kò. Nawẹ mí sọgan gbọṣi kada bo yin nugbonọ na Jehovah Jiwheyẹwhe gbọn?

1. Nukun tẹwẹ Klistiani nugbo lẹ nọ yí do pọ́n gandudu gbẹtọvi tọn lẹ?

Klistiani lẹ nọ na sisi gandudu lẹ. Mí nọ yìn gbedide Jesu tọn nado “yí nuhe yin Sesali tọn lẹ na Sesali”—enẹ wẹ yindọ, mí nọ setonuna osẹ́n otò tọn lẹ, taidi dehe biọ dọ mí ni nọ sú takuẹ lẹ. (Malku 12:17) Biblu plọnmẹ dọ Jehovah lọsu wẹ natẹn gandudu gbẹtọvi tọn lẹ nado to aṣẹpa. (Lomunu lẹ 13:1) Enẹwutu, mí mọnukunnujẹemẹ dọ aṣẹpipa gandudu gbẹtọvi tọn lẹ tọn do dogbó. Mí nọ ganjẹ Jiwheyẹwhe mítọn po Ahọluduta olọn mẹ tọn etọn po go nado didẹ nuhahun gbẹtọvi tọn lẹ.

2. Nawẹ mí sọgan nọ do kadaninọ mítọn hia gbọn?

Taidi Jesu, mí ma nọ doalọ to tonudidọ mẹ. Whenue gbẹtọ lẹ mọ dopo to azọ́njiawu he Jesu wà lẹ mẹ, bo tẹnpọn nado yí i do duahọlu to aigba ji, e gbẹ́ na yé. (Johanu 6:15) Etẹwutu e do wàmọ? E wá dọ to godo mẹ dọ: “Ahọluduta ṣie ma yin apadewhe aihọn ehe tọn.” (Johanu 18:36) Taidi devi Jesu tọn lẹ, mí nọ do kadaninọ mítọn hia to aliho voovo lẹ mẹ. Di apajlẹ, mí ma nọ funawhàn. (Hia Mika 4:3.) Mí nọ na sisi ohia otò tọn lẹ—taidi asia lẹ—amọ́ mí ma nọ sẹ̀n yé. (1 Johanu 5:21) Podọ mí ma nọ nọgodona tonudọtọ de kavi pipli tonudidọ tọn depope, mọ mí ma nọ diọnukunsọ yé. To aliho ehe po devo lẹ po mẹ, mí nọ dohia dọ mí yin nugbonọ na gandudu Jiwheyẹwhe tọn mlẹnmlẹn, yèdọ Ahọluduta etọn.

 DINDONANU DOGỌ

3. Klistiani nugbo lẹ nọ nọ̀ kada

Jesu po hodotọ etọn lẹ po ze apajlẹ dagbe lẹ dai na mí. Hia Lomunu lẹ 13:1, 5-7 gọna 1 Pita 2:13, 14. Enẹgodo, hò VIDEO lọ bo dọhodo kanbiọ he bọdego lẹ ji.

• Naegbọn mí dona nọ na sisi aṣẹpatọ lẹ?

• Aliho tẹlẹ mẹ wẹ mí nọ yin mẹmẹglọ na yé te?

To whenue otò awe to awhànfun, otò devo lẹ sọgan sọalọakọ́n dọ emi to kada, etomọṣo yé nọ to godonọna otò awe he to awhànfun enẹlẹ. Etẹwẹ kadaninọ nujọnu tọn zẹẹmẹdo? Hia Johanu 17:16. Enẹgodo, hò VIDEO lọ bo dọhodo kanbiọ he bọdego ji.

• Etẹwẹ e zẹẹmẹdo nado nọ nọ̀ kada?

Etẹwẹ lo eyin aṣẹpatọ lẹ biọ nude to mí si he jẹagọdo osẹ́n Jiwheyẹwhe tọn? Hia Owalọ lẹ 5:28, 29. Enẹgodo, hò VIDEO lọ bo dọhodo kanbiọ he bọdego lẹ ji.

• Eyin osẹ́n he gbẹtọvi lẹ do de sọta osẹ́n Jiwheyẹwhe tọn, detẹ to yé mẹ wẹ mí dona setonuna?

• Ninọmẹ tẹlẹ mẹ wẹ a lẹndọ Klistiani lẹ gán gbẹ́ nado setonuna osẹ́n aṣẹpatọ lẹ tọn te?

 4. Linlẹn po nuyiwa towe lẹ po ni nọ dohia dọ a to kada

Hia 1 Johanu 5:21. Enẹgodo, hò VIDEO lọ bo dọhodo kanbiọ he bọdego lẹ ji.

• To video lọ mẹ, naegbọn Ayenge basi dide ma nado kọnawudopọ hẹ tonudọgbẹ́ de kavi nado tindo mahẹ to hùnwhẹ otò tọn lẹ mẹ, taidi nudidọ do asia?

• Be a lẹndọ nudide nuyọnẹn tọn wẹ e basi ya?

Ninọmẹ devo tẹlẹ wẹ sọgan whlé kadaninọ mítọn pọ́n? Hò VIDEO lọ, enẹgodo dọhodo kanbiọ he bọdego lẹ ji.

• Nawẹ mí sọgan hẹn kadaninọ mítọn go to aihundida lanmẹyiya tọn he nọ kọ̀n otò voovo lẹ dopọ lẹ whenu gbọn?

• Nawẹ mí sọgan gbọṣi kada gbọn etlẹ yin to whenue tonudọtọ lẹ basi nudide delẹ he gando mí go tlọlọ?

• Nawẹ nuhe linlinnamẹnu lẹ kavi hagbẹ mítọn lẹ nọ dọ lẹ sọgan whlé kadaninọ mítọn pọ́n gbọn?

 BLADOPỌ

Klistiani lẹ nọ dovivẹnu nado nọ kada na tonudidọ to linlẹn, hodidọ po walọyizan yetọn lẹ po mẹ.

Dogbapọn

• Etẹ sin ahọ́ wẹ mí dù do gandudu gbẹtọvi tọn lẹ?

• Naegbọn mí nọ nọ̀ kada na tonudidọ?

• Ninọmẹ tẹlẹ wẹ sọgan whlé kadaninọ mítọn pọ́n?