Zezi ˈnaan ɔɔˈ dhɛcɩaʋn “se ˈkmʋnkpeɲʋn -nɩn.” (Jean 15:19) Dhɛ -ˈmɛn ˈdha ɛmɛn- -nɩn -aaˈ ˈkpa ˈe ˈkmʋn ˈˈkpe dhɩ ˈdhi. Ɩanˈ -ˈnɩɩn -mɩn -nɩn poitikɩ -e tʋvɔɛn-. Ɩanˈ dhɩ tu aˈ bho -tɛɛn ˈbhɛɛˈ ɛ ˈye ˈkle -nɩn -zɔn -ˈnɔɔn. Dhɛ -a sea ˈkmʋnkpeɲʋn -nɩn ɛn, ɲʋn ˈbhɛɛˈ ʋʋ ˈye -aʋ -ghwlaa ɛɛˈ dɩ. -Kawɛ -a ˈbhɛɛˈ -a ˈye ˈkmʋnkpedhɩ bho -tɛɛn ˈˈdhe -a ˈye ˈo Zoova aˈ ˈsʋ ˈˈbun in kpʋn -ɛn?

1. -Kawɛ kletiɛn ˈjɛʋn an ˈjhe -glɔɲiɔn ɔnˈ ɲʋn ˈbhle -ɛ?

Zoova aˈ -Bobhlaʋn an ˈjheɛ ɲʋnbhleʋn- ŋwɔn. Dhɛ Zezi ˈtmʋan ɛmɛn -aa nʋn, “dhɩ nɩan Sezaa aˈ dhɩ -aa ˈˈɲɩn Sezaa.” Dhɛ -ˈmɛn ˈdha ɛmɛn- -nɩn -aa ˈjheɛ ˈtee nɩan ˈo ˈbhlʋa- -a nɩan ˈo dhɩ ŋwɔn. Ɛɛˈ kpɔ dhueˈ -mɔn -nɩn -aa za lɛmpo geiˈˈ. (Marc 12:17) Biiblʋ ˈnaan, Zoova -a ˈŋwɔɔn ˈbho -wɛeˈ -glɔɲiɔn ɔn ˈbhle ɲʋn. (Romains 13:1) Dhɛ -a ˈŋwɔan in -mɛn -nɩn -glɔɲiɔn ɔnˈ ɲʋnbhleɛ- ˈbhleɛ ˈˈtianˈ ˈˈdhe ɛ -nɩɛn- ˈo Ɲɔnsoa aˈ ɲʋnbhleɛ- zɔnˈ. -Aa fuɛ -aaˈ Ɲɔnsoa aˈ ˈBheɔglɔ- nɩan ˈe jhaʋn ˈdhi ɔ ˈye ˈkledɩ- nɩan ˈnɔn ˈkmʋn i -za.

2. -Kawɛ -a ˈye ɛɛˈ -to sʋn nʋn -ka -a sea ˈkmʋnkpeɲʋn -nɩn -ɛn?

-Ka Zezi ˈsea poitikɩ nʋn ɛn, ˈkamɔn -ke -aaˈ ˈkpa ˈe poitikɩ ˈdhi. -Da ɔ nʋan -jhriiˈ- ˈˈdhe ɲʋn an ˈbɔan ʋʋ ˈyeɔ ˈbheɔ po ɛ, ɔ ˈse ˈo ˈŋwɔɔn-. (Jean 6:15) Dhɛɛdɩ- -ɛ? Dhɛ ɔ ˈbhɔɔa ˈbho ɔ ˈtmʋan ɛɛˈ dɩ. Ɔ ˈnaan “ˈman ˈBheɔglɔ- se da ˈbhlʋa nɔn ˈˈkpe -nɩn.” (Jean 18:36) -Abʋ nɩan Zezi ɔˈ dhɛcɩaʋn- ɛn, -aa nʋɛn dhɩ -duuˈˈ -ɩan- toɛ -ka -a sea ˈkmʋnkpeɲʋn -nɩn ɛn. Ɛɛˈ kpɔ dhueˈ -mɛn -nɩn, -aaˈ vɔn tʋ. (Zro Michée 4:3.) -Aa ˈjheɛ dhɩ nɩan ˈo ˈbhlʋa ˈdhi -ka drapo nɩan ŋwɔn, ˈklaa -aaˈ ˈbhɛɛ ˈˈɩ -ka -aa ˈbhɛɛa Ɲɔnsoa ˈˈɩ ɛ. (1 Jean 5:21) -Aaˈ ˈkpa ˈe poitikɩnʋin- ˈdhe, -aaˈ ˈɲɩɔn ˈmʋn mɔn -ke. ˈDhe poitikɩ -e dɩ -dhee -ˈnɩɩn ˈdhi ɛ, -aa toɛˈ -ka -a nɩan ˈe Ɲɔnsoa aˈ ˈBheɔglɔ ɔˈ ˈsʋ ˈdhe ɛ.

 KPA DHƐ I ˈŊWƆƐN ƝAN

3. Kletiɛn ˈjɛʋn anˈ ˈkpa ˈe ˈkmʋnkpedhɩ ˈdhi

Zezi -e ɔɔˈ dhɛcɩaʋn- -siiɛ- -aʋ ˈgɔ ˈdhɔɛe. Zro Romains 13:1, 5-7 -e 1 Pierre 2:13, 14 . Po ˈo VIDEO -ˈmɛn aʋ ˈtmʋn ideedɩ- nɩan da ˈzɔn da aˈ dɩ.

• Dhɛɛdɩ- -a ˈye ˈbhlʋɩbhleʋn- ŋwɔn ˈjhe -ɛ?

• ˈDhe dɩwɛ- ˈdhi -a ˈbhɛɛˈ -a ˈyeɛ -to -ka -aa ˈjhea ˈbhlʋɩbhleʋn- ŋwɔn -ɔn?

-Zɔn -ˈnɔɔn -bho tʋ ˈkpa aˈ, ˈbhlʋɩ- -ˈnɩɩn ˈnaan ɩn se ˈo ɲɔn ˈdhe -nɩn. ˈKlaa ɩan po ɲʋn anˈ kpɛ ˈsɔɔn -ʋa- vɔan tʋ sʋn bho ˈmɛn. -Bho -a ˈnaan -a se ˈo ɲɔn ˈdhe -nɩn ɛnˈ, dhɛwɛ- -ˈmɛn ˈdha gblein -ɛn? Zro Jean 17:16. Po ˈo VIDEO -ˈmɛn aʋ ˈtmʋn ideedɩ- nɩan da ˈzɔn da aˈ dɩ.

• -Bho ɲɔn se ˈkmʋnkpeɲɔn -nɩn ɛnˈ, dhɛwɛ- ɛ ˈdha -a?

-Bho ɲʋnbhleʋn dee -aʋ dhɛ i ˈˈdhe ɛ -nɩn Ɲɔnsoa aˈ ˈtee aˈ kpa -jie- dhueˈ ɛ, -kawɛ -a ˈye nʋn -ɛn? Zro Actes 5:28, 29. Po ˈo VIDEO -ˈmɛn aʋ ˈtmʋn ideedɩ- nɩan da ˈzɔn da aˈ dɩ.

• -Bho ˈbhlʋɩbhleʋn anˈ ˈtee -e Ɲɔnsoa aˈ ˈtee aˈ kpa -jie- dhueˈ ɛˈ, ɲɔnwɛ- -a ˈye ŋwɔn ˈjhe -ɛ?

• Dɩwɛ- ˈdhe ˈdhi gblein kletiɛn ˈse ˈbhlʋɩbhleʋn anˈ ˈtee ŋwɔn ˈjhe i -ɛ?

 4. -Ka -a sea ˈkmʋnkpeɲʋn -nɩn ɛn, -a toɛ ˈdhe -aaˈ tɔˈinaansʋn -e -aaˈ dhɩnʋnsʋn ˈdhi

Zro 1 Jean 5:21. Po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.

• ˈDhe video nɔn ˈdhi ɛ, dhɛɛdɩ Ayɛnge ˈse ˈe poitikɩ aˈ -glibha dhueˈ ˈdhi ˈkpa ˈˈdhe ɔ ˈse drapo ˈjhaa -a?

• ˈBhoo- -gwlɩˈˈ ˈdhee dhɛ ɔ -za ˈo ɔ nʋan, ɛ -nmɔn ˈˈjhrii?

Dhɩ -ˈnɩɩn -wɛ -ɩn ˈbhɛɛ -ɩn ˈye -aʋ i ˈdɩn ˈkmʋnkpedhɩ aˈ ˈdhi ˈkpa -dɩ -ɛ? Po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.

• -Bho ˈbhlʋɩ a sa balɔn bhla -aeˈˈ ʋa sa i doo ˈdhe dhɩ -dhee -ˈnɩɩn ˈdhi ɛ, -kawɛ -a ˈyeɛ -to ka -a sea ˈo ɲɔn ˈdhe -nɩn -ɛn?

• Dhɩ poitikɩnʋʋn an nʋan, -bho ɩan sa -aʋ ˈjɛɛn ˈˈdhrui nʋn -aeˈ ɩan sa -aʋ i ˈkpa -mɔnˈ -dhe ɛˈ, -kawɛ -a ˈbhɛɛˈ -a ˈye nʋn ˈˈdhe -a ˈse ˈe ˈkmʋnkpedhɩ ˈdhi ˈkpa i -ɛ?

• -Bho -aa sa -maneansɛɩ, ladio, zonapale -e ɲʋn -an ˈtmʋan poitikɩ aˈ ˈsʋ aˈ dɩ -dheinˈˈ bho po ɛˈ, dhɛwɛ- ɛ ˈbhɛɛ ɛ ˈye -aʋ ˈˈdhrui nʋn -ɛn?

 DHƐWƐ- ˈCƖAN-?

Kletiɛn -ˈˈwe a poɛ ˈe ˈkpɩ -wɛeˈ ʋʋ -saˈ poitikɩ nʋn ˈdhe ʋaˈ tɔˈ -e ʋaˈ -ghwlusʋn -e ʋaˈ nʋʋndhɩ ˈdhi.

Dhɛwɛ -ˈŋwɔn in -ɛn?

• Kplɩn -wɛ -a ˈye -to ˈdhe ɲʋnbhleʋn bho -ɛ?

• Dhɛɛdɩ- -a ˈse ˈe poitikɩnʋʋɛn- ˈdhi ˈkpa i -ɛ?

• ˈDhe dɩwɛ- ˈdhi ˈkmʋnkpedhɩ aˈ bho -tɛɛn ˈbhɛɛˈ ɛ ˈye ˈkle -nɩn -ɛn?