Ni ja tötikaka Jesukwe ye ñaka ja mike “nitre kä nebätä” kiri driebare Jesukwe (Juan 15:19, TNM). Ye tä mike gare niaratre ye neutral, ye abokän niaratre ñaka ja mike partido político yete aune rüte. Akwa ruäre ngwane, ñaka tä nemen nuäre ja ngwankäre neutral. Ja ngwanbätä neutral nitre ruäre raba nemen ni kötaire. ¿Ño ni raba ja ngwen neutral aune ja ngwen metre jankunu Jehovai?

1. ¿Ni kristiano metre ie gobrantre kä nebätä ye tuin ño?

Ni kristiano tä gobrantre mike ütiäte jai. Jesukwe kukwe niebare ye erere nita mike täte “jondron Cesarekwe, näre bianta Cesare ie”, ye abokän lei ükaninte impuesto ütiä biankäre juta te nita nüne ye erere nita ütiä bien (Marcos 12:17, Ngöbö Täräe [NGT], tärä okwä ükaninte). Jehovata nitre kä nebätä tuenmetre gobrane, ye medenbätä tätre gobrane drieta Bibliakwe (Romanos 13:1). Ye medenbätä, gare metre nie gobrantre kä nebätä bäri di brai Gobran Ngöbökwe ye kräke. Aisete Ngöbö aune Gobran kwe kä kwinbätä ye käkwe kukwe jökrä käme kä nebätä ükaite ye gare kwin nie.

2. ¿Nita ja ngwen neutral ye ni raba bämike ño?

Jesukwe ñaka ja mikani politicate ye erere ni ñaka ja mike politicate. Jesukwe kukwe ñan tuabare nuainbare ye jutuabare nitrei ngwane, tö namani niara mikai reire, akwa niarakwe ñaka kani ngäbiti (Juan 6:15). ¿Ñobätä ñan kani ngäbiti kwe? Niara arabe käkwe niebare: “ti gobrain käi abrä ñakare kä nekwe” (Juan 18:36, NGT). Ni ja tötikaka Jesukwe ni abokän neutral ye nita bämike kukwe keta kabrebätä. Ñodre, ni ñan niken rübätä (mäkwe ñäkä Miqueas 4:3 yebätä). Ñodre Símbolo patrio, bandera ye nita repetare, akwa ni ñaka saludare, ¿ñobätä? Ñobätä ñan aune nikwe saludadre ngwane, nita mike ngöböre jai (1 Juan 5:21). Aune ni ñan ja mike partido político o candidato iti kiri o rüere. Kukwe nebiti aune kukwe madabiti Ngöbökwe Gobran ükaninte yei nita ja ngwen metre nita bämike.

 JA TÖTIKE BÄRI NGUSETA

3. Ni kristiano metre tä ja ngwen neutral

Jesús aune nitre ja tötikaka kwe käkwe kukwe ye bämikani ni käne. Ñäkädre Romanos 13:1, 5-7; 1 Pedro 2:13, 14 yebätä. VIDEO mikadre ñärärä, biti kukwe ne kädriedre jabe:

• ¿Ñobätä ni rabadre gobrantre mike ütiäte?

• ¿Nita gobrantre mike täte ye nita bämike kukwe meden medenbiti?

Juta keteiti tä rüre juta madabe ngwane, gobrantre ruäre ñaka ja mike juta rükä jabe yekri nieta kwetre, akwa kukwe ruäre nuainta kwetre yebiti tätre juta rükä jabe ye dimike, ¿ye ja ngwanta neutral? Ñäkädre Juan 17:16 yebätä. VIDEO mikadre ñärärä, biti kukwe ne kädriedre jabe:

• ¿Ja ngwandre neutral ye dre gärätä?

Kukwe ruäre nuaindre ribeta gobrantrekwe akwa yebiti ñan Ngöbö mikata täte ngwane, ¿dre nuaindre? Ñäkädre Hechos 5:28, 29 yebätä. VIDEO mikadre ñärärä, biti kukwe ne kädriedre jabe:

• Ni kä nebätä tä lei ükete känti kukwe Ngöbökwe mika ñan täte ngwane, ¿meden mikadre täte?

• ¿Kukwe ño känti ni kristiano ñan gobrantre mikadre täte?

 4. Ja töi aune kukwe nuainta mäkwe yebiti mäkwe ja ngwan neutral

Ñäkädre 1 Juan 5:21 yebätä. VIDEO mikadre ñärärä, biti kukwe ne kädriedre jabe:

• ¿Ñobätä Ayenge ja töi mikani ñan ja mike politicate aune ñan bandera saludare?

• ¿Kukwe kwin diani nuaindre kwe jai raba ruin mäi?

¿Kukwe meden mada raba ni mike ñaka ja ngwen neutral? VIDEO mikadre ñärärä, biti kukwe ne kädriedre jabe:

• ¿Juta keteiti tä ja gain jadakabätä juta madabe ngwane, ño ni raba ja ngwen neutral?

• Gobrantre tä kukwe nuainne ye tä kukwe blo o kukwe kwin mike bare nibätä ngwane, ¿ni raba ja ngwen ño neutral jankunu?

• ¿Kukwe mikata gare noticiate aune nitre ni bäre ye raba ni töi mike ño ja ngwandre neutral yebätä?

 ¿DRE NIBI GARE MÄI?

Política yebätä nitre kristiano tä ja di ngwen ja ngwankäre neutral ye tä bämike ja töi, kukwe nieta kwetre aune tä ja ngwen ño yebiti.

Ngwankäreta törö

• ¿Kukwe meden känti ni rabadre gobrantre mike täte?

• ¿Ñobätä nita ja ngwen neutral política yebätä?

• ¿Kukwe meden raba nita ja ngwen neutral ye nuinte?