Jesus wa honga kutja ovahongewa ve ‘kavouye mbwi.’ (Johanes 15:19) Ihi matji kamburire mo okuhinokutoorora omunda movitjitwa vyopolotika novita. Otjiperi kutja kaaruhe tje rira oupupu okuhinokukara nomunda. Ovandu mape ya ave tu tenge mena rotjiṋa ho. Matu yenene vi okuhinokukara nomunda nokurira ovaṱakame ku Jehova Mukuru?

1. Ovakriste vatjiri ve vara vi ozohoromende zovandu?

Ovakriste ve raisa ondengero kohoromende. Eṱe tu tjita otja Jesus pa heya indu tja tja: “Yandjeye ovyombara kombara.” Ihi matji hee okukongorera ozoveta zehi, tjimuna indji yokusuta otjitjamurongo. (Markus 12:17) Ombeibela i honga kutja ozohoromende ze honapara mena rokutja Jehova u ze yandjera. (Ovaroma 13:1) Ku nao, matu tjiwa kutja ozohoromende zovandu kaze nouvara ouingi okukapita imbwi owa Mukuru. Eṱe tu nomaundjiro kutja Mukuru wetu ma ungurisa Ouhona we womeyuru okuzengurura omauzeu wovandu.

2. Matu raisa vi kutja katu toorora omunda?

Tjimuna Jesus, eṱe katu kara norupa movitjitwa vyopolotika. Indu ovandu tji va muna tjimwe tjovihimise Jesus mbya tjita, owo va kondja okumuzika otjombara yawo kombanda yehi, posi ya eye ke ve yandjerere. (Johanes 6:15) Omena raye? Mena rokutja eye kombunda wa tja: “Ouhona wandje kawouye mbwi.” (Johanes 18:36) Otjovahongewa va Jesus, eṱe tu raisa kutja katu toorora omunda momiano pekepeke. Otjotjihorera, eṱe katu i kovita. (Lesa Mika 4:3.) Eṱe tu raisa ondengero koviṋa tjimuna omarapi wehi, posi ya katu rikotamene ku vyo. (1 Ovakorinte 10:14) Wina katu toorora omunda movira vyopolotika poo umwe waimba mbu mave sokunana. Momiano mbi na vyarwe, eṱe tu raisa kutja tu nouṱakame kohoromende ya Mukuru aiyerike, oyo ndji ri Ouhona wa Mukuru.

 KONḒONONA OUKOTO

3. Ovakriste vatjiri kave kara nomunda

Jesus novakongorere ve, va twa po otjihorera otjiwa ku eṱe. Lesa Ovaroma 13:1, 5-7 na 1 Petrus 2:13, 14. Okuzambo, nyanda OKAVIDIO nu u hungirire komapuriro ngu maye kongorere mba.

• Ongwaye tji matu sokuraisa ondengero kozohoromende zovandu?

• Omomiano viṋe tjiva mu matu raisa kutja tu riwisa kehi yawo?

Moruveze rwovita, oviwaṋa tjiva mape ya avi tja kavi nokutoorora omunda, posi ya avi yandja oruvara kominda aviyevari. Nu hapo okuhinokukara nomunda ku heya tjike? Lesa Johanes 17:16. Okuzambo, nyanda OKAVIDIO nu u hungirire kepuriro ndi mari kongorere mba.

• Hapo okuhinokukara nomunda ku heya tjike?

Nu hapo tjike ouhonapare tji mau vanga kutja u tjite otjiṋa tji matji vetasana otjiuru noveta ya Mukuru? Lesa Oviungura 5:28, 29. Okuzambo, nyanda OKAVIDIO nu u hungirire komapuriro ngu maye kongorere mba.

• Matu sokukara nonḓuviro komatwako wauṋe, indu tji pe nombata pokati komatwako wovandu nomatwako wa Mukuru?

• Omozongaro zeṋe Ovakriste mu ve hi nokukara nonḓuviro kouvara?

 4. O kara nomunda mouripura na movitjitwa vyoye

Lesa 1 Ovakorinte 10:14. Okuzambo, nyanda OKAVIDIO nu u hungirire komapuriro ngu maye kongorere mba.

• Mokavidio, ongwaye Ayenge tja panḓa okurira okaṋepo kotjira tjopolotika poo okukara norupa moviṋa tjimuna okuyandja ondjozikiro kerapi rehi?

• Hapo mo munu kutja eye wa toora omukambo omusemba?

Ozongaro zeṋe zarwe nḓe tjita kutja i rire ouzeu okuhinokukara nomunda? Nyanda OKAVIDIO, nu okuzambo hungirira komapuriro ngu maye kongorere mba.

• Matu yenene vi okuhinokutoorora omunda, indu tji matu tarere omanyando ngu maye nyandwa i yomahi pekepeke?

• Matu yenene vi okuhinokukara nomunda indu tji matu ṱunwa i yozondando nḓe tjitwa i yovanane vozopolotika?

• Omomuano uṋe oviṋa mbi tu zuva mozongoramambo poo movandu, mu vi tjita kutja i rire ouzeu ku eṱe okuhinokukara nomunda?

 OKUYARUKIRA PO OUSUPI

Ovakriste ve ungura oukukutu kutja ave ha kara nomunda moviṋa vyozopolotika momeripura wawo, momambo na movitjitwa vyawo.

Okurizemburukisa

• Otjikwaye tji matu sokuyandja kozohoromende zovandu?

• Omena raye tji twa ha kara nomunda moviṋa vyozopolotika?

• Ozongaro zeṋe nḓu mape ya aze tjiti kutja i rire ouzeu ku eṱe okuhinokukara nomunda?