ƐLĀ Ō NWU ƆMƐ 45
Ɔdā Nōo Ya Nɛ Alɔ I Cika Ō Lɛ Abɔ Ipu Ɛlā Imeli Mla Ɛfu Ō Kpo Ŋ Ma
Ujisɔsi nwu ācɛ nōo yɛce ɔ a, ka é hii “wɛ ákú ɛcɛ” ŋ. (Ujɔ́ni 15:19) Ɛnyā wɛ kē hii lɛ abɔ ipu ɛlā imeli mla ɛfu ō kpo ŋ. Ku ɛlā ɔkwɛyi a, ó gē lɔnɔ ku ɔcɛ kóō hii lɛ abɔ ipu ɛlā imeli mla ɛfu ō kpo ŋ. Ācɛ lɔfu ya alɔ ŋmo klla yɛhɛ tu alɔ, abɔ alɔ i lɛ abɔ ipu ɛlā imeli mla ɛfu ō kpo ŋ ma. Naana a, ɛgɛnyá nɛ alɔ gáā yɔ ku alɔ hii lɛ abɔ ipu ɛlā imeli mla ɛfu ō kpo ŋ, klla lɛyitaajɛ lɛ Ujehofa nōo wɛ Ɔwɔico a?
1. Ɛgɛnyá nɛ Ācɛ O Yɛce Ukraist ɔkwɛyi gē leyi má igɔmɛnti ku alɛɛcɛ a?
Ācɛ O Yɛce Ukraist gē lɛ ojilima ce igɔmɛnti ku alɛɛcɛ. Alɔ gē ya ɛgɛ nɛ Ujisɔsi da alɔ a. Ó kahinii: “Aá je lɛ Usísa ɔdā nōo wɛ ákú Usísa.” Ɛnyā wɛ ka alɔ le ojilima ce íne ku ɛga nɛ alɔ lā a, ŋma lɛ ō gba ije eli amāŋ ije ɔlɛ néē cɛgbá ŋma ɛgiyi alɔ a. (Umáki 12:17) Ubáyíbu nwu alɔ kahinii: Ɔwɔico jɛga lɛ alɛɛcɛ kéē yɔ i cɔcɛ́ a. (Ācɛ Uróm 13:1) Ɛnyā cɛ lɛ alɔ gáā le jé ka íkwu nɛ Ɔwɔico lɛ a fiyɛ aku igɔmɛnti ku alɛɛcɛ a. Alɔ yɔ i leyice eko nɛ Ɔwɔico géē bi Ajɔɔcɛ ku nu nōo yɔ ɔkpanco a wa, cɛɛ kóō kwu ɛjɛɛji unwalu ku alɛɛcɛ i bi wa oŋmɛyi a.
2. Ɛgɛnyá nɛ alɔ gáā mafu ku alɔ i lɛ abɔ ipu ɛlā imeli mla ɛfu ō kpo ŋ ma?
Bɛɛka Ujisɔsi a, alɔ i gē lɛ abɔ ipu ɛlā imeli ŋ. Eko nɛ ācɛ lɛ uklɔ idaago nɛ Ujisɔsi yɔ i ya a má a, é ceyitikwu kéē kwu ɔ u piya ɔcɛ́ ku ɛcɛ a. Amáŋ, ó ta. (Ujɔ́ni 6:15) Ɔdiya a? Ohigbu ɛlā nɛ ó ka igbihaajɛ a nɛ. Ó kahinii: “Ajɔ̄ɔ̄cɛ́ kú um í yɔ̄ ipú ɛcɛ nyā ŋ́.” (Ujɔ́ni 18:36) Abɔ alɔ wɛ Ācɛ O Yɛce Ukraist a, alɔ gē mafu ku alɔ i lɛ abɔ ipu ɛlā imeli mla ɛfu ō kpo ŋ ɔwɛ alɛwa. Ocabɔ mafu, alɔ i gē nyɔ gáā kpo ɛfu ŋ. (Jé Umáyíka 4:3.) Alɔ gē lɛ ojilima ce aɔdā ocabɔ ku éwo. Ocabɔ mafu, ili ku éwo (flag), amáŋ alɔ i gē je ɛdɔ ojilima nɛ alɔ gē je lɛ Ɔwɔico a lɛ uwa ŋ. (1 Ujɔ́ni 5:21) Alɔ i gē wɛ ipu aya ku ɛlā imeli duuma ŋ. Alɔ i klla gē lɛ abɔ ta ɔkpá lɛ ɔcɛ duuma ipu ɛlā imeli ŋ. Oŋma lɛ ō ya ɛgɛnyā alɔ gē mafu ku alɔ lɛyitaajɛ lɛ Ɔwɔico duudu mla Ajɔɔcɛ ku nu.
JÉ GƆBU
Leyi yɛ āhɔ̄ nōo lɔfu ya ka ó lɔnɔ tu uwɔ eko duuma nɛ a lɛyitaajɛ lɛ Ɔwɔico duudu mla Ajɔɔcɛ ku nu, mla ɔdā nɛ a géē ya o ya ɛɛ ku a ya ōmiya olɔhi nōo géē he Ujehofa ɔtu a.
3. Ācɛ O Yɛce Ukraist ɔkwɛyi i gē lɛ abɔ ipu ɛlā imeli mla ɛfu ō kpo ŋ
Ujisɔsi mla ācɛ nōo yɛce ɔ a lɛ ocabɔ nyā taajɛ lɛ alɔ. Jé Ācɛ Uróm 13:1, 5-7 mla 1 Upíta 2:13, 14. Cɛɛ, a lɛ UVIDIO nyā mafu ku aa kɔka lɛyikwu aɔka nōo ba nyā.
-
Ɔdiya nɛ alɔ cika ō lɛ ojilima ce igɔmɛnti ku alɛɛcɛ a?
-
Aɔwɛ ōhī nyá nɛ alɔ gáā mafu ku alɔ lɛ ojilima ce uwa a?
Ɛpleeko ku ɛfu ō kpo, aéwo ōhī gē ka ku aa lɛ abɔ ipu nu ŋ, amáŋ é gē ta aya ɛplɛɛpa nōo yɔ i kpo ɛfu a abɔ. Ɛgɛnyá nɛ alɔ gáā mafu ku alɔ i lɛ abɔ ipu ɛlā imeli mla ɛfu ō kpo ŋ ɔkwɔɔkwɛyi a? Jé Ujɔ́ni 17:16. Cɛɛ, a lɛ UVIDIO nyā mafu ku aa kɔka lɛyikwu aɔka nōo ba nyā.
-
Ɔdi nōó wɛ ka ɔcɛ kóō hii lɛ abɔ ipu ɛlā imeli mla ɛfu ō kpo ŋ ma?
Ɔdaŋ ka igɔmɛnti kē yɔ i kwu uwɔ abɔfu ku a ya ɔdā nōó cɛtɔha mla íne ku Ɔwɔico ŋ bɛɛ? Jé Úklɔ́ kú Ācotɛ̄hɔ̄ 5:28, 29. Cɛɛ, a lɛ UVIDIO nyā mafu ku aa kɔka lɛyikwu aɔka nōo ba nyā.
-
Ɔdaŋ ka íne ku alɛɛcɛ mla íne ku Ɔwɔico i cɛtɔha ŋ, íne ku ɔnyɛ nɛ a gáā lɛyitaajɛ lɛ ɔ a?
-
A gbɛla kwu aɔwɛ duuma nɛ Ācɛ O Yɛce Ukraist i cika ō lɛyitaajɛ lɛ igɔmɛnti ku alɛɛcɛ ŋ?
4. A hii lɛ abɔ ipu ɛlā imeli mla ɛfu ō kpo ipu ɛlá ō gbo mla uce ō ya ku uwɔ ŋ
Jé 1 Ujɔ́ni 5:21. Cɛɛ, a lɛ UVIDIO nyā mafu ku aa kɔka lɛyikwu aɔka nōo ba nyā.
-
Ipu uvidio a, ɔdiya nɛ Ayenge miya ka ó gáā lɛ abɔ ipu ɛlā imeli amāŋ lɛ abɔ ipu ucolo duuma bɛɛka ō je owoofu lɛ ili ku éwo (flag) ŋ ma?
-
A gbɛla ka ōmiya nɛ ó ya a wɛ ōmiya ku ijeeyi?
Āhɔ̄ ɛyɛɛyɛyi ɔhá nyá lɔfu je ɔtu okpoce ku alɔ má lɛyikwu ɛlā nyā? Lɛ UVIDIO nyā mafu, cɛɛ ku aa kɔka lɛyikwu aɔka nōo ba nyā.
-
Ɛgɛnyá nɛ abɔ ku alɔ géē lɛ peee eko nɛ alɔ yɔ i má ācɛ ŋma éwo ɛyɛɛyɛyi yɔ i kweyi ipu ubɔlu ō ta amāŋ ija ō he ɔwɛ ɛyɛɛyɛyi ɔhá a?
-
Ɔdaŋ ka ōmiya nɛ ācɛ igɔmɛnti ya kóō lɛ abɔ kwu alɔ ɔwɛ lɔhi amāŋ ɔwɛ obɔbi, ɛgɛnyá nɛ alɔ i gáā lɛ abɔ ipu ɛlā imeli ŋ ma?
-
Ɛgɛnyá nɛ ɔ̄kā ku intanɛti amāŋ ācɛ nɛ alɔ gē piyatɔha mla uwa a lɔfu lɛ abɔ kwu alɔ ipu ɛlā imeli a?
Aya ōhī nyá nɛ Ɔcɛ O Yɛce Ukraist i cika ō lɛ abɔ ipu ɛlā imeli mla ɛfu ō kpo ŋ, ipu ɛlá ō gbo mla uce ō ya ku nu a?
ƆCƐ LƆFU DA ƆKA KA: “Ɔdiya nɛ á gē je owoofu lɛ ili ku éwo (flag) amāŋ gwo u national anthem ŋ ma?”
-
Ɛgɛnyá nɛ a gáā ta ohi a?
ƆDI NƐ A NWU A?
Ācɛ O Yɛce Ukraist gē yuklɔ lɔfu lɔfu o ya ɛɛ kéē hii lɛ abɔ ipu ɛlā imeli mla ɛfu ō kpo ipu ɛlá ō gbo, ɛlā ō ka mla uce ō ya ku uwa ŋ.
Aɔka ō tu alɔ ɛlá kwu ɔdā nɛ alɔ nwu
-
Ɔdi nɛ alɔ bi igɔmɛnti ku alɛɛcɛ ule ku nu a?
-
Ɔdiya nɛ alɔ i gē lɛ abɔ ipu ɛlā imeli ŋ ma?
-
Āhɔ̄ ɛyɛɛyɛyi nyá lɔfu je ɔtu okpoce ku alɔ má, abɔ alɔ i gē lɛ abɔ ipu ɛlā imeli mla ɛfu ō kpo ŋ ma?
JILA ƐLĀ NYĀ MÁ TŌŌTƆ̄Ɔ̄
Aɔdā ōhī nyá nɛ alɔ lɔfu leyi gwo uwa bonu o ya ɛɛ ku alɔ hii lɛ abɔ ipu ɛlā imeli mla ɛfu ō kpo ŋ ma?
Ɔdi nɛ apɔlɛ lɔfu ya o ya ɛɛ kéē tutu taajɛ lɛyikwu ojama néē lɔfu má abɔ é lɛ abɔ ipu ɛlā imeli mla ɛfu ō kpo ŋ ma?
Leyi Kwɛɛcɛ Ku A Hayi Kpaakpa Lɛ Ujehofa Ipu Ōjila Ku Ɛwa Ɛyɛɛyɛyi (4:25)
Ɔdiya nɛ ō cɛpɔ amāŋ ō gbɔbu ipu ɛlā ku éwo nɛ ɔcɛ ŋma a i wɛ ojilima ofiyɛ duu nɛ ɔcɛ lɔfu lɛ gla ŋ ma?
Leyi yɛ ɛgɛ nɛ á gáā lɛ abɔ ipu odee ku ɛcɛ nyā ŋ eko nɛ a yɔ i ya ōmiya ku ɛdɔ uklɔ nɛ a géē ya.
“Each One Will Carry His Own Load” (The Watchtower, March 15, 2006)
