IJisọsị mẹjẹ nyori angị bọọ jẹ nyị́ ka “ri ịnya odehe ọlẹ ka.” (ỊJọn 15:19) Ọọwa ri, ị́ ka lụbwọ ẹ-ẹpwụ nya ẹla nya upe lee ẹwụ ka. Ẹlịlẹhị ri, ọ́ chịkpẹẹ lụmẹ nyọka ri ụpa nya odehe ka lẹ ka. Angịnyị ka kpahị họ chajị nya ọọwa myị́. Ányị ahị tị́ ka bwu kịnyaa la o-ri ụpa nya odehe ka bala ọ-ka godayị giri-giri ha iJihova?

1. Ányị Angịnyị nya ịKịrayịsị à tị́ kaa yẹ eji ọkpakpa nya angịnyị ehe?

Angịnyị nya ịKịrayịsị kaa ju ihi nya igomenti. Ahị kaa họ jaabwọ ká iJisọsị ya bwula ọ-hu “ang nya iSisa ha iSisa.” Ọọwa ri, ahị kaa ju ihi nya ehile nya ọpyị, lala ẹpwa ọnyẹnyẹ. (ỊMakị 12:17) ỊBayịbụụ ya nyori angịnyị ehe nyị wẹẹ kpeji chajị iJihova à ya iwe da haa lẹ. (Ala iRom 13:1) Lẹ ahị jẹ́ nyori ọngịrị nya eji ọkpakpa nya angịnyị ehe á lala ịnya Ohe Oluhye ka. Ahị yẹhị rịrị ka ẹga nya Ohe Oluhye bala Ịpyị-Adịrahụ nyamwụ nyọka myị́ akama nya angịnyị ehe.

2. Ányị ahị tị́ ka mẹjẹ nyori áhị ri ụpa nya odehe ka?

Lala iJisọsị, áhị kaa lụbwọ ẹ-ẹpwụ nya ẹla nya upe ka. Ụka ká angịnyị yẹ ụkụrwọ ẹbyẹbyị nya iJisọsị ọhẹ, kị maga nyọka hwoo nya adịrahụ nyaa odehe, ọ́ myị ka. (ỊJọn 6:15) Ịyẹ tị́ du? Ọ ya nyori, “Ịpyị adịrahụ [nyọwa nyị́] ri ịnya odehe ọlẹ ka.” (ỊJọn 18:36) Lala angịjụgbẹyị nya iJisọsị, ahị kaa mẹjẹ nyori áhị ri ụpa nya odehe ka a-agbẹyị lụmẹ-lụmẹ. Ọ-chụ pwokwita, áhị kaa ka ẹwu ka. (Wa ịMayịka 4:3.) Ahị ju ihi nya ang-ẹjẹẹ ịlẹ kị ku ọmwakpa nya ẹpwụma lala ápwụ̀, ma áhị kaa gbịgba haa ka. (1 ịJọn 5:21) Áhị tị kaa chẹkpẹ ju ebwo nya upe ọhẹ datị lee ọngọ dayị nya ẹnyị ọhẹ-lọhẹ ka. A-agbẹyị ịwẹ bala ịkịla, ahị kaa mẹjẹ nyori ahị godayị giri-giri ha eji ọkpakpa nya Ohe Oluhye, ko ri Ịpyị-Adịrahụ nyamwụ.

 JẸ́ GỤ ỌỌWA

3. Angịnyị nya ịKịrayịsị nyịlẹhị á ri ụpa nya odehe ka

IJisọsị bala angịjụgbẹyị nyamwụ ya ọgụ-ẹpẹtẹ deeji hahị. Wa Ala iRom 13:1, 5-7 bala 1 iPita 2:13, 14. Yẹ IFIM ọwẹ, kanụ ya ẹla u-uhye nya ịtọ ẹla ịlẹ:

• Ịyẹ tị́ du kahị ka ju ihi nya alegbeju ikpeji?

• Agbẹyị iyina ahị tị́ ka mẹjẹ nyori ahị ju ihi nyaa?

Lụka nya ẹwụ ọdada, alẹpwụma ịhyẹ kaa ya nyori ịwa nyị́ chẹkpẹ ju ọngọngọhẹ datị ka, ma ị kaa da angị dẹwụ tawụlẹ ịwẹ wuu ụbwọ. Ịyẹ à tị́ ri etu nyọka ri ụpa nya odehe ka kpangga? Wa ịJọn 17:16. Yẹ IFIM ọwẹ, kanụ ya ẹla u-uhye nya ịtọ ẹla ọlẹ:

• Ịye à tị́ ri etu nyọka ri ụpa nya odehe ka?

Kori ká alegbeju ikpeji á tịtọ kahị ka họ ang ịlẹ kị bịrị ehile nya Ohe Oluhye tị bẹẹ? Wa Ụkụrwọ nya Alẹrụ 5:28, 29. Yẹ IFIM ọwẹ, kanụ ya ẹla u-uhye nya ịtọ ẹla ịlẹ:

• Ụka ká ehile nya angịnyị ehe á myị ọnụ ju ehile nya Ohe Oluhye ka, ịnya owo ahị tị́ ka bajẹ?

• Ẹ-ẹpwụ nya iwe-ahụrụ iyina Angịnyị nya ịKịrayịsị à tị́ ka ju ihi nya angịkpeji ka?

 4. Mẹjẹ ẹ-ẹpwụ nya irya bala abwẹla nyang nyori á ri ụpa nya odehe ka

Wa 1 ịJọn 5:21. Yẹ IFIM ọwẹ, kanụ ya ẹla u-uhye nya ịtọ ẹla ịlẹ:

• Ẹ-ẹpwụ nya ifim ọwẹ, ịyẹ tị́ du ká Ayenge cheje nyori ọ́ ka lụbwọ ẹ-ẹpwụ nya upe lee ọ-yẹjula ọhọhọ nya ẹpwụma, lala ọ-ka yụbwọ ba ọkịlẹtụ mweje ha apwụ nya ẹpwụma ka?

• À me irya nyori ọ cheje ọnyịịla?

Iwe-ahụrụ ịkịla iyina à tị́ ka du kọ ka lahị ujwo nyọka ri ụpa nya odehe ka? Yẹ IFIM ọwẹ, kanụ ya ẹla u-uhye nya ịtọ ẹla ịlẹ:

• Ányị ahị tị́ ka bwu ri ụpa nya odehe ka lụka nya ayịlọ ọkọkọ nya awụlẹ ọ-chọnụ nya ẹpwụma?

• Ányị ahị tị́ ka bwu mẹjẹ nyori áhị ri ụpa nya odehe ka, kori ká alupe ọhẹ-lọhẹ á dọmwụ cheje ọlẹ kọ guhi ụ-ụgbẹyị ọnyịịla lee ọtịpyọ?

• Ányị oja ịlẹ kahị kaa ke ụrụ wo la lee angịlẹ kahị kaa ju ogu ta à tị́ ka jẹ́-ẹ guhi ẹ-ẹga nya ụpa nya odehe oriri ka?

 ẸLỊYẸ A TỊ́ JẸ́?

Angịnyị nya ịKịrayịsị kaa maga nyịlẹhị-ịlẹhị nyọka ri ụpa nya odehe ka ẹ-ẹpwụ nya irya ọkụkụ, ẹla oyaya, bala abwẹla nyaa.

Ẹlịyẹ A Tị́ Yụbwọ Chị?

• Uri nya ịyẹ ahị tị́ kpa igomenti?

• Ịyẹ tị́ du kahị kaa yụbwọ ju ẹla nya upe ka?

• Ẹ-ẹpwụ nya iwe-ahụrụ iyina ọ tị́ kaa lujwo nyọka ri ụpa nya odehe ka?