LEKSION 45
No Ania ti Kayat a Sawen ti Panagbalin a Neutral
Imbaga ni Jesus kadagiti pasurotna a ‘saanda [koma] a paset ti lubong.’ (Juan 15:19) Karaman iti dayta ti panagbalin a neutral. Kayatna a sawen, awan dasiganda iti politika ken gubat. Ti agpayso, saan a kanayon a nalaka ti agbalin a neutral. Mabalin nga uyawendatayo gapu iti dayta. Kasanotayo nga agtalinaed a neutral ken agtultuloy a matalek ken Jehova a Dios?
1. Ania ti pangibilangan dagiti pudno a Kristiano iti gobierno ti tao?
Resrespetuen dagiti Kristiano ti gobierno. Sursurotentayo ti imbaga ni Jesus nga “ited[tayo] ken Cesar dagiti kukua ni Cesar.” Kayatna a sawen, agtulnogtayo kadagiti linteg ti pagilian, kas iti panagbayad iti buis. (Marcos 12:17) Isursuro ti Biblia nga agturturay laeng dagiti gobierno ti tao ta ipalpalubos ni Jehova nga agturayda. (Roma 13:1) Isu nga ammotayo a relatibo wenno limitado laeng ti autoridad ti gobierno ti tao. Agtalektayo a solbarento ti Dios ken ti nailangitan a Pagarianna ti amin a problema dagiti tattao.
2. Kasanotayo a maipakita a neutraltayo?
Kas ken Jesus, saantayo a makiramraman iti politika. Idi nakita dagiti tattao ti maysa a milagro ni Jesus, kayatda a pagbalinen nga ari, ngem saanna a kinayat. (Juan 6:15) Apay? Gapu ta kas iti imbagana, “ti Pagariak ket saan a paset daytoy a lubong.” (Juan 18:36) Kas adalan ni Jesus, maipakitatayo a neutraltayo iti adu a pamay-an. Kas pagarigan, saantayo a makiramraman iti gubat. (Basaen ti Mikias 4:3.) Resrespetuentayo dagiti simbolo ti nasion—kas iti bandera—ngem saantayo a pagdayawan dagita. (1 Juan 5:21) Ken awan ti dasdasigantayo wenno gurguraentayo a kandidato wenno partido ti politika. No aramidentayo dagita, ipakpakitatayo a talaga a matalektayo iti gobierno ti Dios—ti Pagarianna.
AMMUEM TI AD-ADU PAY
Ammuem dagiti situasion a mabalin a mangsubok iti panagbalintayo a neutral, ken kitaem no kasanoka a makaaramid kadagiti desision a mangparagsak ken Jehova.
3. Neutral dagiti pudno a Kristiano
Nangipakita ni Jesus ken dagiti pasurotna iti pagtuladantayo. Basaen ti Roma 13:1, 5-7 ken 1 Pedro 2:13, 14. Kalpasanna, i-play ti VIDEO sa pagsaritaan dagiti sumaruno a saludsod.
-
Apay a masapul a respetuentayo dagiti gobierno ti tao?
-
Kasanotayo a maipakita nga agtultulnogtayo kadakuada?
No adda gubat, ibagbaga ti dadduma a nasion a neutralda, ngem agpada met a supsuportaranda ti agkalaban a grupo. Ania a talaga ti kayat a sawen ti panagbalin a neutral? Basaen ti Juan 17:16. Kalpasanna, i-play ti VIDEO sa pagsaritaan ti sumaruno a saludsod.
-
Ania ti kayat a sawen ti panagbalin a neutral?
Kasanon no adda ipaaramid dagiti gobierno a maikontra iti linteg ti Dios? Basaen ti Aramid 5:28, 29. Kalpasanna, i-play ti VIDEO sa pagsaritaan dagiti sumaruno a saludsod.
-
No agkontra ti linteg ti tao ken ti linteg ti Dios, ania ti masapul a surotentayo?
-
Adda kadi mapanunotmo a situasion a saan a rumbeng nga agtulnog dagiti Kristiano iti gobierno?
4. Agbalinka a neutral iti panunot ken aramid
Basaen ti 1 Juan 5:21. Kalpasanna, i-play ti VIDEO sa pagsaritaan dagiti sumaruno a saludsod.
-
Iti video, apay a saan a nakiraman ni Ayenge iti maysa a partido ti politika wenno iti panagsaludo iti bandera?
-
Panagkunam, husto kadi ti desisionna?
Ania pay dagiti situasion a mabalin a mangsubok iti panagbalintayo a neutral? I-play ti VIDEO, sa pagsaritaan dagiti sumaruno a saludsod.
-
Kasanotayo nga agbalin a neutral no agbuybuyatayo kadagiti isports a ti aglalaban ket nagduduma a nasion?
-
Kasanotayo nga agbalin a neutral uray no apektadotayo a mismo iti desision dagiti politiko?
-
Kasano a mabalin a maapektaran ti panagbalintayo a neutral gapu iti media wenno kadagiti pakikadkaduaantayo?
NO ADDA AGSALUDSOD: “Apay a saankayo nga agsalsaludo iti bandera? Apay a saankayo nga agkankanta iti national anthem?”
-
Ania ti isungbatmo?
SUMARIO
Ikagkagumaan dagiti Kristiano ti agbalin a neutral iti politika—iti panunot, panagsasao, ken ar-aramidda.
Rebiu
-
Ania ti obligasiontayo iti gobierno ti tao?
-
Apay nga agtalinaedtayo a neutral iti politika?
-
Ania dagiti situasion a mabalin a mangsubok iti panagbalintayo a neutral?
AGDISKOBREKA PAY
Ania dagiti masapul nga isakripisiotayo no dadduma tapno makapagtalinaedtayo a neutral?
Kasano a makapagsagana dagiti pamilia para kadagiti posiblento a mangsubok iti panagbalinda a neutral?
Apay a saan a ti panangidepensa iti pagilian ti kangatuan a pammadayaw a mabalin a maawat ti maysa?
Kitaem no kasanoka a makapagtalinaed a saan a paset ti lubong no agdesisionka maipapan iti trabaho.
“Tunggal Maysa Awitennanto ti Bukodna nga Awit” (Ti Pagwanawanan, Marso 15, 2006)