Jesús ni unuiniamuri ainian ju nunkanmayanchuitrume timiayi (Juaṉ 15:19). Politicanam turutskesha maaniamunam pachinkiashtiniaitrume tusa ainis timiayi. Tumaitkiusha nu turatin yupichuchichuiti. Nukap aents wishikramiarminiaitji. Chikich najanainiamunam pachinkiaij tusar wari turatniuitiaj?

1. Kristu aentstisha uunt naamkaru eketainiana nu arantiniashitiaj?

Kristu aentstikia uunt naamkaru eketainiana nu arantiniaitji. Jesús chichaak: “Uunt Sésarna ana nu susatarum” timiayi. Impuestosha akikmaitji tura warinkish umiktin ana nu uminiaitji (Márkus 12:17). Uunt naamkaru eketainiana nuka Yuus tsankateam pujuiniawai tawai Yuusa chichame (Rúmanam 13:1). Tuma asamtai aents naamkaru eketainiana nujaisha nankaamas Yuus umirkatniuitji. Jesús Yuus anaikiamu asa ju nunkanam itiurchat iruneana nuna iwiarattawai taji.

2. Chikich turuiniana aintsan wari najantsuj?

Jesús aintsan politicanam pachinchaitji. Jesús aents turachminian turakui uunt anaikiattsar wakeriarmiayi, turamsha ninkia nuna nakitramiayi (Juaṉ 6:15). Urukamtai nakitramia? Ni junis timiayi: “Wi jú̱ nuṉkanam akupniuchuitjiai” (Juaṉ 18:36). Kristu aentstikia chikich turuiniamu turichu asar mesetnum pachinchaitji (Mikías 4:3 aujsata). Tarach tura escudosha arantiniaitji tumaitkiusha tikishmatchaitji. Aya Yuusak tikishmatratniuitji (1 Juaṉ 5:21). Aintsan politicanmasha pachinchaitji. Nu turakur Jesusan Yuus anaikiana nu yayaji.

 PENKER NEKAATAI

3. Kristu aentstikia chikich najanainiana aitkiasrik najanchaitji

Jesús ni unuiniamurijiainkia chikich najanainiamun najancha armiayi. Rúmanam 13:1, 5-7 tura 1 Pítiur 2:13, 14 aujsatarum. Turarum VIDEO iisrum juna aujmattsatarum:

• Aents naamkaru eketainiana nusha urukamtai arantukartiniaitiaj?

• Aents naamkaru eketainiana nu umireakrikia wari itiurkatniuitiaj?

Aents naamkaru eketainiana nuka mesetnumka yaimtsuji tuiniayat nisha yaimin ainiawai. Ainis turamu penkerashit? Juaṉ 17:16 aujsatarum. Turarum VIDEO iisrum juna aujmattsatarum:

• Chikich turuiniana aitkiasan turawaij tusar wari najanashtiniaitiaj?

Aents naamkaru eketainiana nuka Yuus nakitiana nuna turawarat tusar wakeriarminiaiti. Ainis nankaamakui wari itiurkamniaitiaj? Túramuri̱ [Hechos] 5:28, 29 aujsatarum. Turarum VIDEO iisrum juna aujmattsatarum:

• Aents naamkaru eketainiana nu Yuus nakitiana nuna turawarat tusar wakeruiniakui ya umirkatniuitiaj?

• Urutain aents naamkaru eketainiana nu tuiniamu umirkashtiniaitiam?

 4. Chikich enentaimiainiana nunisam enentaimsaip turutskesha chikich najanainiana nunisam najanawaip

1 Juaṉ 5:21 aujsatarum. Turarum VIDEO iisrum juna aujmattsatarum:

• Ayenge urukamtai politicanam tura bandera pujurainiamunam pachinkiatin nakitramia?

• Penkerash najanamia?

Yuus umirkattsar warinma pachinkiaij tusar kakartiniaitiaj? VIDEO iisrum juna aujmattsatarum:

• Chikich nunkanmayajai nakuruiniakui wari turashtiniaitiaj?

• Aents naamkaru eketainiana nu ni tuiniamu antukar wari itiurkashtiniaitiaj?

• Chikich enentaimiainiana aitkiasrik enentaimsaij tusar urukamtai iiyajnia nui tura antajnia nuisha aneartiniaitiaj?

 WARI NEKAAM

Nekas Kristu aentska politicanuncha aujmatcha ainiawai tura politicancha enentaimtichu ainiawai.

Awakeasrik nekaatin

• Aents naamkaru eketainiana nu umirkartinkiaitiaj?

• Urukamtai politicanam pachinchaitiaj?

• Wari nankaamakuinia iisha pachinkiaij tusar kakartiniaitiaj?