Yesu andívapundisha vakwoda vake pakulota havanatende “imbande yashilambo.” (Nshuwau 15:19) Asho shinkuvika nkati mene kulyunganianga upande woewoe nkati mu ing’ondo au mudishiyasha dya mushilambo. Kwaumwiu, ni shinu shakukamadyanga kula liduva mene kulyunganianga upande woewoe. Inkuululika vanu kutupinga kwamwaa wa wamushi watumidye. Tulota kuulula dashi mene kulyunganianga upande woewoe na kuka mushu tuva tuvakukulupilika kumwe Yeova Nnungu?

1. Vaklistu vaiu vavenavo maoni shani kwaupande wa dishilikali dya vanu?

Vaklistu vanaishimu dishilikali. Wetu twigwilila lilamulo limwe Yesu liishidoni “vimwe Shashali, mwing’e mwene Shashali”—asho mana ake, kwigwilila malamulo la shilambo shatunama, kwampano kulipa ukodi. (Malukushi 12:17) Ibibiliya inkupundisha kenga dishilikali dya vanu dinkulangalalela kwamwaa Yeova andileka dipagwe. (Valoma 13:1) Wetu tunkumanya shana kenga dishilikali dya vanu dinkuvanavo madalaka lavenavo mipaka. Tunkwamini kenga Nnungu andatumila Utawala wake wa kuwa pakulota kumalidya matatisho lavapata vanu.

2. Tulota kulodya dashi kenga hatunalyunganianga shinu upande woewoe?

Kenga Yesu, wetu momo hatunalinjidyanga mu dishiyasha. Vanu pavangwene Yesu atenda makango vashilota vantende umu wa mushilambo, kanji nae andíta. (Nshuwau 6:15) Mwaa shani Yesu andíta? Shatangwele Yesu badae shinkutupa lijibu, “utawala wangu haunava shinu washilambo ashi.” (Nshuwau 18:36) Wetu kenga vakwoda vake Yesu, tunalodya mu dinamuna dyakuvilingananga kenga hatunalyunganianga shinu upande woewoe. Kwampano, hatunalinjidyanga nkati muding’ondo. (Shomya Mikeya 4:3.) Wetu tunaishimu shilambo shatunama—kanji hatunalipudya ku ibandela. (1 Nshuwau 5:21) Na wetu hatunalyunganianga ata kumpinga munu au ishama yoeyoe mu dishiyasha. Kwa kutenda davo wetu tunalodya kenga ni tuvakukulupilika namene mu ishilikali ya Nnungu, yani—Utawala wake.

 LAMBELA KUMANYA VYOE

3. Vaklistu vaiu havanalyunganianga upande woewoe

Yesu na vakwoda vake havalyunganienge upande woewoe, na wetu momo ituvaikidile twodedye mpano wave. Shomya Valoma 13:1, 5-7 na 1 Patulu 2:13, 14. Badae, lola VIDEO na mwambangile mwaa vyakudya vya mwina.

• Mwaa shani ituvaikidile twishimu dishilikali dya vanu?

• Tulota kulodya dashi kenga tunkulivika mwina mwa dishilikali adyo?

Muwakati wa ing’ondo, inkuululika venentete kushidoni wetu hatunalyunganianga upande woewoe, kanji akuno vapwashela dimbande uti digambananga. Mene kulyunganianga upande woewoe mana ake nyamani? Shomya Nshuwau 17:16. Badae, lola VIDEO na mwambangile mwaa shakudya sha mwina.

• Mene kulyunganianga upande woewoe mana ake nyamani?

Ituvaikidile tutende nyamani ikava kenga dishilikali dya vanu dinkutwaulila tutende shinu shíkaigwania na malamulo a Nnungu? Shomya Vitendo 5:28, 29. Badae, lola VIDEO na mwambangile mwaa vyakudya vya mwina.

• Malamulo a vanu lakanaigwania na malamulo lake Nnungu, ituvaikidile twigwilile malamulo lamwe nyani?

• Kwa maoni lako, muwakati shani uvaikidile Vaklistu havanaigwilile dishilikali dya vanu?

 4. Lodya kenga haulyunganienge upande woewoe kupitila mmakumbukililo na vitendo vyako

Shomya 1 Nshuwau 5:21. Badae, lola VIDEO na mwambangile mwaa vyakudya vya mwina.

• Kulingana na video, mwaa shani Ayenge andita kulyunganinga na ishama yaishiyasha au kutenda shikukulu sha venentete kenga kulipudya ku ibandela?

• Da wako wona kenga nae andyumya wamushi wambone?

Wamushi wetu wa mene kulyunganianga upande woewoe, ulota kulingigwa dashi mu vinu vinji? Lola VIDEO, na badae mwambangile mwaa vyakudya vya mwina.

• Tulota kulodya dashi kenga hatunalyunganianga shinu upande woewoe, muwakati walapagwa mashindano lanshesho wavilambo vyakuvilingananga?

• Tulota kuka dashi mushu mene kulyunganianga upande woewoe, ata ikava kenga wamushi wa vanashiyasha unkutupa ipaida au unkwidanavo matatisho?

• Wamushi wetu wa mene kulyunganianga upande woewoe, ulota kwambukishigwa dashi na vinu vyatwigwa mu vyombo vya dyabali au vanu vatuvatangolanavo?

 KWAUNGWIPI

Vaklistu vanalikanyalidya namene mene kulyunganianga upande woewoe mudishiyasha mumakumbukililo, mumalove, na muvitendo vyavo.

Tukumbukilange

• Ituvaikidile tuvenavo maoni shani kwaupande wa dishilikali dya vanu?

• Mwaa shani hatunalyunganianga upande woewoe mudishiyasha?

• Vinu shani vilota kututadya kwona kukamadyanga mene kulyunganianga upande woewoe?