Jizus inxina se sigidoris ma es ka debe ‘faze párti di mundu’. (João 15:19) Kel-li ta inklui ka mete na asuntus sima géra i pulítika. É klaru ki alvês é ka fásil ka mete na kes kuza li. Talvês pesoas pode faze-nu trósa pamodi nos disizon. Modi ki nu pode ka mete na asuntus di mundu i kontinua lial pa Jeová?

1. Kuzê ki kristons verdaderu ta atxa di govérnus di ómi?

Kristons ta ruspeta govérnus. Nu ta faze sima Jizus fla i nu ta ‘paga Séza kel ki é di Séza’. (Marcos 12:17) Kel-li krê fla ma nu ta obi ku leis di kel país undi nu ta vive, sima pur izénplu paga inpostu. Bíblia ta inxina ma ómis ta governa sô pamodi Jeová ta dexa-s. (Romanos 13:1) Nton kel-li ta djuda-nu ntende ma govérnus ten algun autoridadi. Má es ka ten más autoridadi ki Deus. Nu ta kunfia ma Deus i se Reinu na Séu ta ben rezolve prubléma di mundu interu.

2. Modi ki nu pode mostra ma nu ka ta mete na asuntus di mundu?

Sima Jizus, nu ka ta mete na pulítika. Kantu pesoas odja Jizus ta faze un di se milagris, es tenta faze-l rei, má el ka dexa-s. (João 6:15) Pamodi? Pamodi dipôs Jizus fla: ‘Nha Reinu ka ta faze párti di es mundu.’ (João 18:36) Dja ki nos é sigidoris di Jizus, nu ta mostra ma nu ka ta mete na asuntus di mundu di txeu manera. Pur izénplu, nu ka ta bai pa géra. (Lé Miqueias 4:3.) Nu ta ruspeta kes sinblu di un país, sima bandera, má nu ka ta da-s kel ónra ki nu ta da Deus. (1 João 5:21) I nu ka ta apoia nen nu ka ta fika kóntra ninhun kandidatu ô partidu pulítiku. Di kes manera li i di otus manera, nu ta mostra ma nos é lial sô pa govérnu di Deus, ô se Reinu.

 SABE MÁS

3. Kristons verdaderu ka ta mete na asuntus di mundu

Jizus ku se sigidoris da-nu un bon izénplu. Lé Romanos 13:1, 5-7 i 1 Pedro 2:13, 14. Dipôs, odja VÍDIU i pâpia sobri kes pergunta li:

• Pamodi ki nu debe ruspeta govérnus di ómi?

• Di ki maneras nu ta mostra ma nu ta obi ku es?

Na ténpu di géra, alguns nason ta fla ma es ka ta mete na géra, má es ta apoia tudu dôs ladu. Nton, kuzê ki ka mete na asuntus di mundu krê fla? Lé João 17:16. Dipôs, odja VÍDIU i pâpia sobri kel pergunta li:

• Kuzê ki krê fla ka mete na asuntus di mundu?

I si govérnus pidi-u pa bu faze algun kuza ki ta bai kóntra lei di Deus? Lé Atos 5:28, 29. Dipôs, odja VÍDIU i pâpia sobri kes pergunta li:

• Si un lei di ómi ta bai kóntra lei di Deus, ku kenha ki nu debe obi?

• Bu ta konsigi pensa na algun situason ki kristons ka ta obiba ku govérnus?

 4. Ka bu mete na asuntus di mundu na kuzas ki bu ta pensa i ki bu ta faze

Lé 1 João 5:21. Dipôs, odja VÍDIU i pâpia sobri kes pergunta li:

• Na vídiu, pamodi ki Ayenge disidi ka apoia kel partidu pulítiku ô ka partisipa na kes serimónia di se país, sima sauda bandera?

• Bu ta atxa ma el toma un bon disizon?

Ki otus situason pode pô-nu ta mete na pulítika i na géra? Odja VÍDIU, i dipôs pâpia sobri kes pergunta li:

• Modi ki nu pode ka mete na asuntus di mundu óras ki alguns país sta konpiti na un disportu?

• Modi ki nu pode ka mete na asuntus di mundu sikrê pulítikus toma disizons ki pode djuda-nu ô prujudika-nu?

• Modi ki kes kuza ki nu ta obi na notísias ô di nos kolégas, pode afeta nos disizon di ka mete na asuntus di mundu?

 REZUMU

Nu ta sforsa pa nu ka mete na pulítika na kes kuza ki nu ta pensa, ki nu ta fla i ki nu ta faze.

Perguntas di rezumu

• Kuzê ki govérnus di ómi merese pa nu da-s?

• Pamodi ki nu ka ta mete na pulítika?

• Ki situasons pode poi na próva nos disizon di ka mete na asuntus di mundu?