U Jisu u la hikai ïa ki nongbud jong u ba kim dei ban “long na ka jong ka pyrthei.” (Ïoannis 15:19) Kane ka kynthup ban long pdeng—ban ym ïashah ïano ïano ruh ha ki thma ne ha ki kam saiñ pyrthei. Ha ka jingshisha, kam long kaba suk ban long pdeng. Ngi lah ruh ban shah kren beiñ. Kumno ngi lah ban ïai long pdeng bad ïaineh hok ha U Blei Jehobah?

1. Kumno ki Khristan bashisha ki dei ban sngew shaphang ki sorkar u briew?

Ki Khristan ki burom ïa ka sorkar. Ngi leh kumba u Jisu u ong ban “ai ha u Kaisar ïa kiei kiei ki jong u Kaisar”—kata ka mut, ban kohnguh ïa ki aiñ jong ka ri, kum ha kaba siew ïa ki khajna. (Markos 12:17) Ka Baibl ka hikai ba ki sorkar u briew ki synshar tang namarba U Blei u ailad ïa ki ban synshar. (Rom 13:1) Te ngi sngewthuh ba ki sorkar u briew kim da donbor than ban ïa U Blei. Namar kata ngi phai sha U Blei jong ngi bad sha ka Hima jong u ban weng ïa ki jingeh jong u bynriew.

2. Kumno ngi lah ban pyni ba ngi long pdeng?

Kum u Jisu, ngim ju shim bynta ha ki kam saiñ pyrthei. Haba ki briew ki ïohi ïa ki kam phylla u Jisu, ki la pyrshang ban pynlong syiem ïa u hynrei u khlem ailad ïa ki ban leh kumta. (Ïoannis 6:15) Balei? Namar kumba u la ong “ka Hima jong nga kam long na ka jong kane ka pyrthei.” (Ïoannis 18:36) Kum ki synran u Jisu ngi pyni ïa la ka jinglong pdeng ha bun ki liang. Ngim ju shim bynta ha ki thma. (Pule Mikah 4:3.) Ngi burom ruh ïa ki lama ne ïa kino kino ki dak jong ka ri—hynrei ngim pyndonburom pat ïa ki kumba ngi pyndonburom ïa U Blei. (1 Ïoannis 5:21) Ngim ju ïashah ne pyrshah ïa kano kano ka seng saiñ pyrthei ne ïa uno uno u kyrtong. Ha kine ki rukom, ngi pyni ba ngi ïaineh hok ha ka sorkar U Blei ne ka Hima jong u.

 WAD SHUH SHUH

3. Ki Khristan bashisha ki long pdeng

U Jisu bad ki nongbud jong u ki la buh nuksa ïa ngi. Pule Rom 13:1, 5-7 bad 1 Petros 2:13, 14. Peit ïa ka VIDEO bad nangta sa ïa peit lang ïa kine ki jingkylli harum:

• Balei ngi dei ban burom ïa ki bor synshar?

• Kiei ki katto katne ki rukom kiba pyni ba ngi kohnguh ïa ki?

Ha ki por thma, don ki ri kiba ong ba ki long pdeng, hynrei ki kyrshan lang ïa baroh arliang. Ka jinglong pdeng bashisha ka dei kaei? Pule Ïoannis 17:16. Nangta, peit ïa ka VIDEO bad sa ïa peit lang ïa kane ka jingkylli harum:

• Ka mut aïu ban long pdeng?

Kumno pat lada ka sorkar ka phah ban leh ïa kaei kaei kaba long pyrshah ïa ka aiñ U Blei? Pule Kam 5:28, 29. Nangta, peit ïa ka VIDEO bad sa ïa peit lang ïa kine ki jingkylli harum:

• Lada ka aiñ u briew ka ïatyngkhuh bad ka aiñ U Blei, ïano ngin kohnguh?

• Hato phi lah ban pyrkhat ïa kano kano ka khep ha kaba ki Khristan kim dei ban kohnguh ïa ki bor synshar?

 4. Long pdeng ha ki kam bad ha ki jingmut jingpyrkhat

Pule 1 Ïoannis 5:21. Nangta, peit ïa ka VIDEO bad sa ïa peit lang ïa kine ki jingkylli harum:

• Ha ka video, balei i Ayenge i la rai ban ym shim bynta bad kano kano ka seng saiñ pyrthei ne ha ka jingrakhe ïa ka sngi bakongsan jong ka ri, kum ha kaban ai burom ne salam ïa ka lama?

• Hato phi tharai ba i la shim ïa ka rai kaba dei?

Kiei kiwei de ki khep kiba lah ban tynjuh ïa ka jinglong pdeng jong ngi? Peit ïa ka VIDEO, bad nangta sa ïa peit lang ïa kine ki jingkylli harum:

• Kumno ngi lah ban ïai long pdeng haba don ki jingïalehkai hapdeng ki ri bapher bapher?

• Kumno ngi lah ban ïai long pdeng watla ki rai jong ki nongïalam saiñ pyrthei ki pynmyntoi ne pynduhnong ïa ngi?

• Kumno ki lad pathai khubor ne ki paralok ki lah ban ktah ïa ka jinglong pdeng jong ngi?

 KI MAT BAKONGSAN

Ki Khristan ki trei shitom ban long pdeng ha ki kam, ki ktien, bad ha ki jingmut jingpyrkhat.

Peit Biang

• Kaei kaba ngi dei ban ai ïa ki sorkar u briew?

• Balei ngi dei ban ïai long pdeng?

• Kiei ki khep kiba lah ban tynjuh ïa ka jinglong pdeng jong ngi?