Yesu mwakangirirya athi abigha biwe ‘si b’ekihugho.’ (Yoane 15:19) Eki mwamuli erithendibya na lhuhandi omwa by’ekipolitiki n’esyonyuhi. Okwenene kuli kuthi, sikyolho mughulhu wosi erithendibya na lhuhandi. Thwangan’endereribwa busana n’eki. Thwangabya thuthi butsira lhuhandi kandi ithwasighalha ithune bathaleghulha oku Yehova Nyamuhanga?

1. Abakristayo ab’okwenene bakalhangira bathi esyogavumente sy’abandu?

Abakristayo bakasikaya egavumente. Thukakolha ngoku Yesu abugha athi ‘mulihe Kaisari ebindu bya Kaisari’​—ni bugha ambu, thukasikaya ebilhaghiro by’erihanga, ng’ebikathuyithaghako erithuha emisolho. (Mariko 12:17) E Biblia yikakangiriraya yithi esyogavumente sy’abandu sikathabalha kundi Yehova akinalighiresyo erithabalha. (Abanya Roma 13:1, NWT) Neryo thukyasi ngoku esyogavumente sy’abandu sinawithe obuthoki bulebe, obuwithe aho bukasubulira. Thulindire Nyamuhanga wethu n’Obwami bwiwe bw’elhubulha erighunzaho ebitsibu by’abandu.

2. Thwanga kangania thuthi ku sithulibya na lhuhandi?

Nga Yesu, sithuli yingiraya omwa by’epolitiki. Abandu babere bakalhangira ekighuma ky’okwa bithiko-thiko bya Yesu neryo bamanza erimuyira mo mwami wabu okwa kihugho, mwathabalighira. (Yoane 6:15) Busana naki? Kundi, enyuma waho mwabugha athi, ‘Obwami bwaghe si bw’ekihugho kino.’ (Yoane 18:36) Ithwe ng’abigha ba Yesu, thukakanganaya ku sithulibya na lhuhandi omwa nzira nyingyi. Ng’eky’erileberyako, sithuli sangira omwa lhuhi. (Soma Mika 4:3.) Thukasikaya ehiminyikalho hy’erihanga​—ng’ebbendera—​aliwe sithuli hitherera esaruti kundi ithukendibya ithwamaramyabyo. (1 Yoane 5:21) Kandi sithulibya na lhuhandi kutse erihakanisya ekyama kirebe ky’epolitiki kutse oyuwabiriyitsimba. Omo syonzira esi n’esindi, thukakanganaya ngoku thukasighika omwa buswire egavumente ya Nyamuhanga​—Obwami bwiwe.

 THASYIGHA BINGYI

3. Abakristayo ab’okwenene sibalibya na lhuhandi

Yesu n’abigha biwe mubathuhiriraho eky’erileberyako. Soma Abanya Roma 13:1, 5-7 na 1 Petero 2:13, 14. Neryo, mubughaye EVIDIYO mwanakania okwa bibulyo ebikakwamako.

• Busana naki thutholere ithwasikya esyogavumente sy’abandu?

• Ni nzira nga syahi esyathukakanganirayamu ku thusikiryesyo?

Omwa buthuku bw’olhuhi, ebindi bihugho byangana bugha bithi sibiwithe lhuhandi, aliwe ibyawathikya esyombandi syosi esikalhwa. Erithendibya na lhuhandi ery’okwenene ly’eryahi? Soma Yoane 17:16. Neryo, mubughaye EVIDIYO mwanakania okwa kibulyo ekikakwamako.

• Kikamanyisayaki erithendibya na lhuhandi?

Kandi ibbwa ab’egavumente bamabugha bathi wukole ekindu ekithelighirana n’ebihano bya Nyamuhanga? Soma Emibiri 5:28, 29. Neryo, mubughaye EVIDIYO mwanakania okwa bibulyo ebikakwamako.

• Ebilhaghiro by’abandu byamathendi hambangana n’ebihano bya Nyamuhanga, wutholere iwowa ebyandi?

• Wangana lengekania okwa mibere eyo Abakristayo bangana ghaniramo erighondera ab’egavumente?

4. Ibya butsira lhuhandi omwa malengekania n’omwa mikolere

Soma 1 Yoane 5:21. Neryo, mubughaye EVIDIYO mwanakania okwa bibulyo ebikakwamako.

• Omo vidiyo, ni kyahi ekyaleka Ayenge iniathwamu erithendingira omwa kyama ky’ekipolitiki kutse erisangira omwa mikonga y’erihanga, ng’eritherera ebbendera y’esaruti?

• Wukalengekanaya mwanathwamu ndeke?

Ni yindi mibere yahi eyangaleka ikyathukalira erithendibya na lhuhandi? Mubughaye EVIDIYO, mwanakania okwa bibulyo ebikakwamako.

• Thwangasighalha thuthi isithuwithe lhuhandi bikahika okwa by’amasatha w’amalingwatha aw’ebihugho muthina-muthina?

• Thwangasighalha thuthi isithuwithe lhuhandi erithwamu ly’abanya politiki nomulyanga thuhambako nabi?

• Ebya thukowa omwa by’amakuru kutse okwa banywani byangahamba bithi okw’ithwamu lyethu ly’erithendibya na lhuhandi?

 OMWA BIKUHI

Abakristayo bakalengaho kutsibu erithendibya na lhuhandi omwa malengekania, omwa bya bakabugha, n’erikolha.

Eriyibukya

• Ni kyahi ekya thutholere ithwaha esyogavumente sy’abandu?

• Busana naki sithulibya na lhuhandi omwa by’ekipolitiki?

• Ni mibere yahi eyangaleka ikyathukalira erithendibya na lhuhandi?