Jesus el luti lah mwet tuhma lutlut lal “tiac ma luhn facluh.” (John 15:19) Wekuhnacng, elos ac tiac wi kuhtwena u​—tiac wi nuhke kuhtwena u luhn politic luhn facluh, ac tiac wi ke mweun. Pwacyeiyac uh pa, tiac fihsracsr in tiac weacng nuhke kuhtwena u luhn politic. Ke srihpac inge mwet uh ac isrucn kuht. Kuht ac karihngihnkuhtyang fuhkah in tiac wi ke kuhtwena u luhn politic ac sruokyac oaru lasr nuh sin Jeova God?

1. Meac nuhnak luhn mwet Christian pwacye nuhke government luhn mwet uh?

Mwet Christian uh suhnakihn government. Kuht oruh oacna ma Jesus el fahk inge “sang nuh sin Caesar ma luhn Caesar.” (Mark 12:17) Kalmac pa, kuht ahkos masap luhn government, oacna kuht moli tax. Bible uh fahk lah government luhn mwet uh oruh kolyuck la ke srihpen Jeova el lwelah elos in kol. (Rome 13:1) Ke ma inge, kuht etuh lah oasr sahflahiyen kuhiyen government uh. Kuht luhlahlfongi lah Tohkohsrahi luhn God muhkwena pa ac ahkwoye ma upac nuhkewa luhn mwet uh.

2. Kuht ahkkahlwemye fuhkah lah kuht tiac wi ke kuhtwena u luhn politic?

In oacna Jesus, kuht tiac wi ke oakwuck luhn politic. Ke pacl se mwet uh liye mwenmwen ma Jesus el oraclah, eltahl luhngse in oruh Jesus in tohkohsrahlac. Tuhsruhktuh, Jesus el som luhkwelos. (John 6:15) Efuh? Jesus el fahk: “Tohkohsrahi luhk tiac ma luhn facl se inge.” (John 18:36) Oacna mwet suc fahsr tohkohl Jesus, oasr inkacnek pucspucs kuht ahkkahlwemye lah kuht tiac wi ke kuhtwena u uh. Ke sie mwe puhpuhlyuck, kuht tiac som wi ke mweun. (Riti Micah 4:3.) Kuht tiac wi ke kuhtwena oakwuck suc ahkfuhlwactye akucl luhn sie muhtuhnfacl​—oacna flag​—mweyen nuh sesr ma inge ac oacna orekma in orek alu nuh kac. Ne ohinge, kuht ahkkahlwemye suhnak nuhke akucl inge. (1 John 5:21) Ac kuht tiacna weacng kuh lain kuhtwena u luhn politic kuh mwet suc candidate luhn u se inge. Kuht fin oruh ma inge, kuht ahkkahlwemye lah kuht oaru nuh sin Tohkohsrahi kuh government luhn God.

 AHKYOHKYE LUTLUT LOM

3. Mwet Christian pwacye uh tiac wi ke oakwuck luhn facluh

Jesus ac mwet tuhma lutlut lal oakiyac mwe srihkasrak wo nuh sesr. Riti Rome 13:1, 5-7 ac 1 Peter 2:13, 14. Tohkohyang, liye VIDEO se ac sramsramkihn kihsen siyuck inge.

• Efuh kuh kuht enenuh in ahkkahlwemye suhnak nuh sin mwet kol ke government?

• Meac kuhtuh inkacnek ma kuht ahkkahlwemye lah kuht ahkos mwet kol inge?

Ke pacl ma oasr mweun, kuhtuh muhtuhnfacl uh fahk muh elos tiac wi kahsruh mweun ma orek inge, tuhsruhktuh elos kewana sang kahsruh nuhke muhtuhnfacl luo suc lain sie sin sie inge. Meac mwet Christian pwacye uh kuh in oruh nuhke kain in ohiyac inge? Riti John 17:16. Tohkohyang, liye VIDEO se ac sramsramkihn kihsen siyuck se inge.

• Kuht ac ahkkahlwemye fuhkah lah kuht tiac wi kuhtwena u?

Na fuhkah fin government luhn mwet uh sapkihn kuht in oruh ma se ma ac lain masap luhn God? Riti Orekma 5:28, 29. Tohkohyang, liye VIDEO se ac sramsramkihn kihsen siyuck inge.

• Fin masap luhn mwet lain masap luhn God, piyac kac masap kuht enenuh ahkos?

• Kom kuh in nuhnkuh ke sie ohiyac lah ngac mwet Christian se ac muh tiac ahkos masap luhn mwet uh?

 4. Nuhnak ac orekma lasr enenuh in ahkkahlwemye lah kuht tiac wi kuhtwena u

Riti 1 John 5:21. Tohkohyang, liye VIDEO se ac sramsramkihn kihsen siyuck inge.

• Ke video an, efuh kuh Ayenge el tiac weack nuhke u luhn politic kuh ke oakwuck in ahkfuhlwactye sie muhtuhnfacl, oacna in salute nuhke flag?

• Kom nuhnkuh muh wo sulaclah ma el oruh?

Ohiyac sahyac fuhkah ac oruh in upac in tiac wi ke oakwuck luhn facluh? Liye VIDEO se, ac tohkohyang sramsramkihn kihsen siyuck inge.

• Kuht ac ahkkahlwemye fuhkah lah kuht tiac wi kuhtwena u ke pacl ma kuht liye sritacl ma mwet sritacl ke muhtuhnfacl pucspucs alein nuh sie?

• Kuht ac ahkkahlwemye fuhkah lah kuht tiac wi ke kuhtwena u finne sulaclah luhn mwet ke politic oraclah ma upac nuh sesr kuh kuht eis ma wo kac?

• Ma kuht lohng sin news media ac sin mwet suc kuht asrouki nuh se kuh in ahkmuhnahsye fuhkah sulaclah lasr in tiac wi ke kuhtwena u luhn politic?

 MA KUHT LOTWELAH

Mwet Christian uh enenuh in kwacfeacng yohk tuh elos in tiac wi ke oakwuck luhn politic ke nuhnak, kahs, ac orekma lalos.

Kalweni

• Efuh kuht enenuh in ahkos government luhn mwet uh?

• Efuh kuht tiac wi ke oakwuck luhn politic?

• Ohiyac fuhkah kuh in oruh in upac nuh sesr in tiac wi ke oakwuck luhn facluh?