Jizɔs bin tich in disaypul dɛn se dɛn “nɔ fɔ tan lɛk pipul dɛn na di wɔl.” (Jɔn 15:​19) Dis min se dɛn fɔ nyutral, we min se dɛn nɔ fɔ put an pan wɔ ɔ pɔlitiks. Fɔ tru, i nɔ kin izi ɔltɛm fɔ mek wi nyutral. Sɔntɛnde, dɛn kin provok wi bikɔs ɔf dat. Aw wi go kɔntinyu fɔ nyutral ɛn de biɛn Jiova Gɔd?

1. Aw tru Kristian dɛn de si mɔtalman gɔvmɛnt dɛn?

Kristian dɛn rɛspɛkt di gɔvmɛnt. Wi de du wetin Jizɔs bin tɔk we i se “una gi Siza wetin na Siza in yon.” Dis min se wi de obe di lɔ dɛn we de na di kɔntri, lɛk di lɔ we se wi fɔ pe taks. (Mak 12:​17) Di Baybul tich se mɔtalman gɔvmɛnt dɛn de rul bikɔs Jiova alaw dɛn fɔ rul. (Romans 13:​1) So wi no se Jiova gɛt pawa pas mɔtalman gɔvmɛnt dɛn. Wi de luk to wi Gɔd ɛn in Kiŋdɔm we de na ɛvin fɔ sɔlv mɔtalman prɔblɛm dɛn.

2. Aw wi go sho se wi nyutral?

Lɛk Jizɔs, wi nɔ de put an pan pɔlitiks. We di pipul dɛn bin si wan pan Jizɔs in mirekul dɛn ɛn tray fɔ mek am dɛn kiŋ, i nɔ bin gri. (Jɔn 6:​15) Wetin mek? Na bikɔs ɔf wetin i bin tɔk leta we i se, “mi Kiŋdɔm nɔ de na dis wɔl.” (Jɔn 18:​36) As Jizɔs in disaypul dɛn, wi de sho se wi nyutral difrɛn we dɛn. Fɔ ɛgzampul, wi nɔ de fɛt wɔ. (Rid Mayka 4:​3) Wi de rɛspɛkt di tin dɛn we tinap fɔ di kɔntri lɛk di flag, bɔt wi nɔ de salut ɔ gi dɛn di ɔnɔ we Gɔd fit fɔ gɛt. (1 Jɔn 5:​21) Ɛn wi nɔ de sɔpɔt ɔ de agens ɛni pɔlitikal pati ɔ pɔsin we de stand fɔ ilɛkshɔn. Na sɔm pan dɛn we dɛn ya wi de sho se wi rili de biɛn Gɔd in gɔvmɛnt, we na in Kiŋdɔm.

 LAN MƆ

3. Tru Kristian dɛn nyutral

Jizɔs ɛn in disaypul dɛn bin sɛt di ɛgzampul fɔ wi. Rid Romans 13:​1, 5-7 ɛn 1 Pita 2:​13, 14. Dɔn, ple di VIDIO ɛn una tɔk bɔt di kwɛstyɔn dɛn we de dɔŋ.

• Wetin mek wi fɔ rɛspɛkt mɔtalman gɔvmɛnt dɛn?

• Wetin na sɔm we dɛn we wi go sho se wi rɛspɛkt dɛn?

We wɔ kin de, sɔm kɔntri dɛn kin se dɛn nyutral, bɔt dɛn kin sɔpɔt di wan dɛn we de fɛt. Wetin i rili min fɔ nyutral? Rid Jɔn 17:​16. Dɔn, ple di VIDIO ɛn una tɔk bɔt di kwɛstyɔn we de dɔŋ.

• Wetin i min fɔ nyutral?

Wetin yu go du if gɔvmɛnt tɛl yu fɔ du sɔntin we nɔ gri wit wetin Gɔd in lɔ se? Rid Akt 5:​28, 29. Dɔn, ple di VIDIO ɛn una tɔk bɔt di kwɛstyɔn dɛn we de dɔŋ.

• If gɔvmɛnt in lɔ nɔ gri wit wetin Gɔd in lɔ se, udat in lɔ wi fɔ obe?

• Yu ebul tink bɔt ɛnitin we go apin we go mek Kristian dɛn nɔ obe mɔtalman gɔvmɛnt dɛn?

 4. Bi pɔsin we nyutral pan wetin yu de tink ɛn wetin yu de du

Rid 1 Jɔn 5:​21. Dɔn, ple di VIDIO ɛn una tɔk bɔt di kwɛstyɔn dɛn we de dɔŋ.

• Insay di vidio, wetin mek Ayenge bin disayd nɔ fɔ jɔyn di pɔlitikal pati ɔ salut di flag?

• Yu tink se i bin disayd fɔ du di rayt tin?

Us ɔda tin dɛn go tɛst if wi nyutral? Ple di VIDIO, dɔn una tɔk bɔt di kwɛstyɔn dɛn we de dɔŋ.

• Aw wi go kɔntinyu fɔ nyutral we wi de wach gem ɔ spɔt we gɛt fɔ du wit difrɛn kɔntri dɛn?

• Aw wi go kɔntinyu fɔ nyutral ilɛksɛf di tin we di gɔvmɛnt disayd de afɛkt wi?

• Aw di tin dɛn we wi de yɛri na nyuz ɔ frɔm pipul dɛn we nɔ nyutral go afɛkt wi?

 WETIN YU DƆN LAN?

Kristian dɛn de tray tranga wan nɔ fɔ sɔpɔt pɔlitiks we i kam pan wetin dɛn de tink bɔt, di tin dɛn we dɛn de tɔk, ɛn di tin dɛn we dɛn de du.

Rivyu

• Wetin wi fɔ gi mɔtalman gɔvmɛnt dɛn?

• Wetin mek wi nɔ fɔ put an pan pɔlitiks?

• Wetin na sɔm tin dɛn we go tɛst if wi nyutral?