Yesu longaka ti banlonguki na yandi fueti vuanda ‘ve bantu ya yinza.’ (Yoane 15:19) Yamesangisa kumanga kukota na mambu ya yinza—kukota ve na mambu ya politiki ya yinza mpe kusala ve bamvita. Samu na kutuba kedika, yakevuandaka ntangu nionso pete ve na kumanga kukota na mambu ya yinza. Bantu lenda vueza beto samu na yau. Yinki mutindu beto lenda tatamana kumanga kukota na mambu ya yinza mpe kubikana ya kukuikama na Yehova Nzambi?

1. Yinki mutindu Baklisto ya kedika ketadilaka bamfumu ya Leta?

Baklisto kezitisaka bamfumu ya Leta. Beto kesalaka mutindu Yesu tubaka mpe beto ‘kepesaka bima ya Kaisala na Kaisala’—yazola monisa, beto kezitisaka minsiku ya buala, na kifuani yina kelombaka beto futa mpaku. (Marko 12:17) Biblia kelongaka ti bamfumu ya Leta keyadilaka kaka samu Yehova mepesa bau nzila ya kuyadila. (Baroma 13:1) Na yau beto kebakusaka ti bamfumu ya Leta kele na kimfumu yina kele na yinsi ya kimfumu ya Nzambi. Beto ketudilaka Nzambi mpe Kimfumu na yandi ya dizulu ntima samu na kumanisa mambu ya bantu.

2. Yinki mutindu beto lenda monisa ti beto kekotaka ve na mambu ya yinza?

Lokola Yesu, beto kekotaka ve na mambu ya politiki. Ntangu bantu monaka mosi ya bimangu ya Yesu mpe bazolaka yandi kuma ntinu na bau na ntoto, yandi mangaka. (Yoane 6:15) Samu na yinki? Samu, mutindu yandi tubaka na manima, ‘Kimfumu na munu kele ve ya yinza yayi.’ (Yoane 18:36) Lokola beto kele banlonguki ya Yesu, beto kemonisaka ti beto kekotaka ve na mambu ya yinza na mitindu mingi. Na kifuani, beto kekuendaka ve na mvita. (Tanga Mika 4:3.) Beto kezitisaka bidimbu ya buala—lokola drapo—kasi beto kesambilaka yau ve. (1 Yoane 5:21) Mpe beto kekotilaka ve to kemangaka mpe ve mabanza ya parti politiki mosi to ya muntu mosi ya politiki. Na mitindu yayi to yankaka, beto kemonisaka ti beto kele ya kukuikama kondua kukakula na guvernema ya Nzambi—Kimfumu na yandi.

 KOTA NA MPINDA

3. Baklisto ya kedika kekotaka ve na mambu ya yinza

Yesu mpe banlonguki na yandi pesaka beto kifuani. Tanga Baroma 13:1, 5-7 mpe 1 Piere 2:13, 14. Mpe, tula VIDEO mpe na manima tadila biuvu yayi melanda.

• Samu na yinki beto fueti zitisa bamfumu ya Leta?

• Yinki kele ndambu ya mitindu ya kumonisa luzitu yango samu na bau?

Na bantangu ya mvita, bayinsi mingi ketubaka ti bakekotaka ve na mambu ya yinza, kasi bakepesaka maboko na bayina kena kunuana. Yinki zola tuba mpenza kukota ve na mambu ya yinza? Tanga Yoane 17:16. Mpe, tula VIDEO mpe na manima tadila kiuvu yayi melanda.

• Yinki zola monisa kukota ve na mambu ya yinza?

Yinki nge kesala kana bamfumu ya Leta melomba nge nge sala diambu mosi yina nsiku ya Nzambi mepekisa? Tanga Bisalu 5:28, 29. Mpe, tula VIDEO mpe na manima tadila biuvu yayi melanda.

• Kana nsiku mosi ya Leta wizana ve na nsiku ya Nzambi, yinki nsiku beto fueti zitisa?

• Nge lenda kanisa na mambu yina Baklisto fueti zitisa ve bamfumu ya Leta?

 4. Kukota ve na mambu ya yinza na mabanza mpe na bisalu

Tanga 1 Yoane 5:21. Na manima, tula VIDEO mpe tadila biuvu yayi melanda.

• Na video, samu na yinki Ayenge bakaka nzengolo ya kukota ve na parti politiki to kupesa losako na bidimbu ya buala, lokola drapo?

• Nge mekanisa ti yandi bakaka nzengolo ya nduenga?

Yinki mambu yankaka lenda tula nzengolo na beto ya kumanga kukota na mambu ya yinza na kumekama? Tula VIDEO, mpe na manima tadila biuvu yayi melanda.

• Yinki mutindu kutanina kikadulu na beto ya kumanga kukota na mambu ya yinza ntangu beto kena kutala bansaka mosi yina mesangisa babuala mingi?

• Yinki mutindu beto lenda tanina nzengolo na beto ya kumanga kukota na mambu ya yinza ntangu bamfumu mebaka nzengolo yina kesala beto mbote to mpasi?

• Yinki mutindu bansangu beto kebakaka to bankundi na beto lenda bebisa kikadulu na beto ya kumanga kukota na mambu ya yinza?

 BUNKUFI

Baklisto kesalaka ngolo samu na kukota ve na mambu ya yinza, yavuanda na mabanza, na bampova, mpe na bisalu na bau.

Mvutukulu

• Yinki beto fueti pesa na bamfumu ya Leta?

• Samu na yinki beto kekotaka ve na mambu ya politiki?

• Yinki mambu lenda tula nzengolo na beto ya kumanga kukota na mambu ya yinza na kumekama?