Yesu wasambilizye alondezi yakwe ukuti yatalinzile ukuya wa yantu ya mu nsi. (Yoani 15:19) Cii cikupiliula ukuti tutalinzile ukucitako vino amu nsi yakacita, ukuika umu vikanza vya miteekele nu kulwako inkondo. Ukulanda sile icisinka citanguka ukukanaika umu vya mu nsi. Antu yangatuseeka pa mulandu nu kukanaika umu vya mu nsi. Tungacita uli pakuti tutaika umu vya mu nsi nu kutwalilila ukuya acisinka kuli Yeova Leza?

1. Uzye aina Klistu ya cumi yakalola uli mauteeko ya untunze?

Aina Klistu yacindika mauteeko. Tukacita wakwe vino Yesu walanzile nu kupeela “vyakwe Kaisale kuli Kaisale,” kuli kuti tukalondela masunde aku mpanga ino tukaikalako wakwe ukulipila imisonko. (Mako 12:17) Baibo ikasambilizya ukuti mauteeko ya untunze yakateeka pano Yeova u wayazumilizya. (Loma 13:1) Fwandi tungalola ukuti mauteeko ya antunze yatakwata sana maka. Tukalolela Leza nu Wene wakwe uwa kwi yulu ukwizafumyapo intazi zyonsi izyaya pano nsi.

2. Tungalanga uli ukuti tusiika umu vya mu nsi?

Wakwe Yesu, tusilonda ukuika umu vikanza vya miteekele. Lino antu yaweni Yesu wacita icizungusyo yalondanga ukumwika pa wene, nomba wakanyile. (Yoani 6:15) U mulandu ci? Walanzile umulandu uno wakaniile, watiile: “Uwene wane usi wa pano nsi.” (Yoani 18:36) Pa mulandu wakuti sweswe yasambi yakwe Yesu, tukalanga ukuti tusiika umu vya mu nsi umu nzila izingi. Wakwe, tusilwako inkondo. (Belengini Mika 4:3.) Twacindika imendela ni vintu vyuze ivikaimililako impanga itu nomba tusivipeela umucinzi wakwe uno tungapeela Yeova. (1 Yoani 5:21) Nupya tusitungilila kaungwe ka miteekele nanti kateeka aliwensi. Umu nzila zii zyonsi ni nzila zyuze tukalanga ukuti twaya acisinka uku uteeko wakwe Leza kuli kuti Uwene wakwe.

 LONDELEZYINI NA VYUZE

3. Aina Klistu ya cumi yasiika umu vya mu nsi

Yesu na alondezi yakwe yatulangilile vino tulinzile ukucita. Belengini Loma 13:1, 5-7 na 1 Petulo 2:13, 14. Lyene, tambini VIDYO alino mulanzyanye mauzyo atiyalondelelapo.

• U mulandu ci uno tulinzile ukucindikila mauteeko ya antunze?

• Iinzila ci zimwi zino tukalangilamo ukuti tukuyacindika?

Amu mpanga zimwi yakalanda ukuti yasiika umu vya mu nsi, nomba nga kwakatuka inkondo yakaazwilizyako. Uzye cikapiliula cani ukukanaika umu vya mu nsi? Belengini Yoani 17:16. Lyene, tambini VIDYO alino mulanzyanye iuzyo ilyatililondelelapo.

• Uzye cikapiliula cani ukukanaika umu vya mu nsi?

Nga ndi cakuti uteeko ukulonda mucite vimwi ivisiuvwana na masunde yakwe Leza, mungacita uli? Belengini Milimo 5:28, 29. Lyene, tambini VIDYO alino mulanzyanye mauzyo atiyalondelelapo.

• Ndi cakuti masunde ya uteeko yakulwisyanya na masunde yakwe Leza, a masunde ci yano tulinzile ukuvwila?

• Uzye mungelenganyako pali vimwi vingacitika ivingalenga umwina Klistu ukukanauvwila masunde ya uteeko?

 4. Mutaika umu vya miteekele muli vino mukaelenganya na muli vino mukacita

Belengini 1 Yoani 5:21. Lyene, tambini VIDYO alino mulanzyanye mauzyo atiyalondelelapo.

• Muli vidyo, u mulandu ci uno ya Ayenge yakaniile ukwingila umu kaungwe ka miteekele, nu kuzevyako ukuzevya kwa mu mpanga yao alino nu kukanasalyutila imendela?

• Uzye mukwelenganya ukuti yapingwilepo ningo?

I vyani vyuze ivingalenga cimanyikwe ndi cakuti tukaika umu vya mu nsi nanti foo? Tambini VIDYO, alino mulanzyanye mauzyo atiyalondelelapo.

• Tungacita uli pakuti tutaika umu vya mu nsi lino tukutamba ivyangalo umuli antu afumile uku mpanga izipusanepusane aakucimvyanya?

• Tungacita uli pakuti tutaika umu vya mu nsi ndi cakuti vino amu uteeko yapingulapo vyalenga ivintu ukututalila nanti ukutuzipila?

• Uzye ivintu vino tukauvwa pa malyasi ya pa TV na pa ledyo nu ku yantu yano tukaizya nayo vingalenga uli ukuti citutalile ukukanaika umu vya mu nsi?

 VINO TWASAMBILILA

Aina Klistu yakaezya na maka pakuti yataika umu vikanza vya miteekele muli vino yakaelenganya, vino yakalanda na muli vino yakacita.

I vyani vino mwasambilila?

• I vyani vino tulinzile ukupeela mauteeko ya antunze?

• U mulandu ci uno tusiikila umu vikanza vya miteekele?

• I vyani vimwi vingalenga tumanye ndi cakuti tukaika umu vya mu nsi nanti foo?