SAK 45
Wãn to la d wilgd tɩ d pa kẽesd d toog dũniyã yɛlẽ?
A Zeezi yeela a karen-biisã tɩ b pa segd n yɩ “dũniyã rẽnd” ye. (Zã 15:19) Ra kẽes f toog dũniyã yɛlẽ wã rat n yeelame tɩ f ra kẽes f toog dũni-kãngã politikã la a zabã pʋsẽ ye. Togs sɩdã, ra kẽes f toog dũniyã yɛlẽ wã pa nana wakat fãa ye. Nebã tõe n yaala tõnd rẽ yĩnga. Bõe la d tõe n maan n kell n pa kẽes d toog dũniyã yɛlẽ, la d kell n maan sɩd ne d Wẽnnaam a Zeova?
1. Kiris-neb hakɩɩkã tagsg yaa wãn ne ninsaalbã goosneema-rãmbã?
Kiris-nebã waoogda goosneema-rãmbã. Tõnd maanda wa a Zeezi sẽn yeelã, n ‘kõt a Sezaar bũmb nins sẽn yaa a Sezaar dẽndã,’ rat n yeel tɩ d tũuda d tẽngã laloa wã, wala makre, laloa ning sẽn yet tɩ d yaood lampo-rãmbã. (Mark 12:17) Biiblã pʋgẽ, b wilgame tɩ ninsaalbã goosneema-rãmbã rɩta naam, bala yaa a Zeova n kõ sore. (Rom dãmbã 13:1) Dẽnd d miime tɩ ninsaalbã goosneema-rãmbã sẽn tar naam bɩ zu-sobend ningã pa ta Wẽnnaam dẽndã ye. D gũudame tɩ Wẽnnaam wa welg ninsaalbã zu-loeesã fãa ne a Rĩungã sẽn be saasẽ wã maasem.
2. Wãn to la d tõe n wilg tɩ d pa kẽesd d toog dũniyã yɛlẽ?
Wa a Zeezi, tõnd pa kẽesd d toog politikã yɛlẽ ye. Daar a ye, nebã yãa yel-solemd a Zeezi sẽn maane, n bao n na n kɩt t’a lebg b rĩmã. La a Zeezi zãgsame. (Zã 6:15) Bõe yĩnga? Bala, wa a sẽn wa n yeelã, a “Rĩungã pa dũni-kãngã rẽnd ye.” (Zã 18:36) Tõnd sẽn yaa a Zeezi karen-biisã, yɛl toor-toor pʋgẽ, d wilgdame tɩ d pa kẽesd d toog dũni-kãngã yɛlẽ ye. Wala makre, d pa kẽnd zab ye. (Karm-y Mise 4:3.) D waoogda tẽnsã darpo-rãmbã, la d pa waoogd-b wa d sẽn waoogd Wẽnnaam to-to wã ye. (1 Zã 5:21) Sẽn paase, d pa teend wall n zabd ne politik sull bɩ taoor soab baa a ye. Yel-kãensã la a taab pʋgẽ, d wilgdame tɩ d maanda sɩd zãng-zãng ne Wẽnnaam goosneema wã, rat n yeel t’a Rĩungã.
D BAO N BÃNG N PAASE
D ges bũmb kẽer sẽn tõe n kɩt tɩ yɩ toog tɩ d kell n da kẽes d toog dũniyã yɛlẽ, la y sẽn tõe n yãk yam sẽn na n noog a Zeova sũur to-to.
3. Kiris-neb hakɩɩkã pa kẽesd b toog dũniyã yɛlẽ ye
A Zeezi ne a karen-biisã kõo tõnd mak-sõngo. Karm-y Rom dãmb 13:1, 5-7 la 1 Pɩyɛɛr 2:13, 14. Rẽ poor bɩ y ges VIDEO wã, la y leok sogsgã.
-
Bõe yĩng tɩ d segd n waoog ninsaalbã goosneema-rãmbã?
-
Wãn to la d wilgd tɩ d sakd-b lame?
Zabr sasa, tẽns kẽer tõe n yetame tɩ b pa kẽesd b toogo, la b yaool n maand bũmb n sõngd tẽns nins sẽn zabd taabã. Ra kẽes f toog dũniyã yɛlẽ wã sɩd rat n yeelame tɩ bõe? Karm-y Zã 17:16. Rẽ poor bɩ y ges VIDEO wã, la y leok sokrã.
-
Ra kẽes f toog dũniyã yɛlẽ wã rat n yeelame tɩ bõe?
La goosneema-rãmbã sã n dat tɩ d maan bũmb sẽn kɩɩsd Wẽnnaam tõogã yẽ? Karm-y Tʋʋm 5:28, 29. Rẽ poor bɩ y ges VIDEO wã, la y leok sogsgã.
-
Ninsaalbã tõog sã n kɩɩsd Wẽnnaam tõogã, bʋg la d segd n tũ?
-
Yel-bʋs pʋgẽ la kiris-ned pa na n tũ goosneema-rãmbã sẽn yetã?
4. Ra kẽes-y y toog dũniyã yɛlẽ, baa y sũurã pʋgẽ
Karm-y 1 Zã 5:21. Rẽ poore, bɩ y ges VIDEO wã, la y leok sogsgã.
-
Video wã pʋgẽ, bõe yĩng t’a Ayenge yãk yam n pa naag politikã sulli, wall n naag n pʋʋs darpo wã?
-
Yãmb tagsdame t’a yam-yãkrã yaa yam tʋʋmd bɩ?
Bõe ne bõe wɛɛngẽ me la tõe n yɩ toog tɩ d kell n pa kẽes d toog dũniyã yɛlẽ? Ges-y VIDEO wã, tɩ rẽ poor bɩ y leok sogsgã.
-
Tẽns toor-toor sã n wa wagsd taab ɛspoorã wɛɛngẽ, bõe la d segd n maan n kell n da kẽes d toog dũniyã yɛlẽ?
-
Baa politikã taoor dãmb yam-yãkr ning sã n na n nafda tõndo, wall wa ne zu-loees n kõ-do, bõe la d segd n maan n kell n da kẽes d toog dũniyã yɛlẽ?
-
Wãn to la kiba-kɩtbã, pa rẽ bɩ neb nins d sẽn nong n be ne wã goam tõe n wa kɩt tɩ yɩ toog tɩ d kell n da kẽes d toog dũniyã yɛlẽ?
NINA TÕE N SOKAME YAA: “Bõe yĩng tɩ yãmb pa pʋʋsd darpo wã, la y leb n pa yɩɩnd tẽngã tãb-kaoor yɩɩla?”
-
Y na n leokame tɩ bõe?
KƲMSGO
Kiris-nebã maooda wʋsg sẽn na yɩl n da kẽes b toog politikã yɛlẽ, b tagsa wã, b no-goamã la b tʋʋm-tʋmdɩ wã pʋgẽ.
Lebg-n-gese
-
Bõe la d kõt ninsaalbã goosneema-rãmbã?
-
Bõe yĩng tɩ d pa kẽesd d toog politikã yɛlẽ?
-
Yel-bʋs n tõe n wa kɩt tɩ yɩ toog tɩ d pa kẽes d toog dũniyã yɛlẽ?
BŨMB A TAABA
Tõe n wa yɩɩ tɩlɛ tɩ d mong d meng bõe sẽn na yɩl n kell n da kẽes d toog dũniyã yɛlẽ?
Bõe la zak rãmb tõe n maan n pĩnd n segl b mense, bũmb nins sẽn tõe n wa kɩt tɩ yɩ toog tɩ b pa kẽes b toog dũniyã yɛlẽ wã wɛɛngẽ?
D ra tol n kẽes d toog dũniyã yɛlẽ, baa d sã n wa be zãma zĩigẽ (4:25)
Ned sã n zabd a tẽng yʋʋr yĩnga, pa rẽ n yaa zu-zẽkr ne a soab tɩ yɩɩd ye. Bõe yĩnga?
Y sẽn tõe n maan to-to n kell n da kẽes y toog dũni-kãngã yɛlẽ, y sã n wa na n yãk yam tʋʋmã wɛɛngẽ.
“Ned kam fãa na n tʋka a meng zɩɩbo” (Yʋʋmd 2006 tʋʋlg kiuug pipi daar Gũusg Gasgã)