Jesús kiijtok itokilijkauaj axiaxkauaj “ni Tlaltipaktli” (Juan 15:19). Nopa kiijtosneki amo mokalakiaj ipan política uan amo yauij ipan tlauilankayotl. Kemantika uelis ouij tijmatisej amo timokalakisej ipan tlen mochiua ipan Tlaltipaktli pampa sekinok uelis techpinajtisej tlaj amo tijnekisej titlapaleuisej. ¿Kenijkatsa uelis tijnextisej amo timokalakiaj ipan tlen mochiua ipan Tlaltipaktli uan kiampa amo tijtlauelkauasej Jehová?

1. ¿Kenijkatsa kinitaj tlanauatianij Cristo itokilijkauaj?

Cristo itokilijkauaj kintlepanitaj tlanauatianij. Jesús kiijtok: “Xijmakakaj César tlen César iaxka”. Tojuantij kiampa tijchiuaj pampa tijneltokaj tlanauatili tlen tlanauatianij kitlalijtokej ipan toaltepe, kej kema kiijtouaj moneki tikixtlauasej se keski tlamantli (Marcos 12:17). Biblia kiijtoua Jehová kinkauilijtok tekichiuanij ma tlanauatikaj (Romanos 13:1). Yeka tijmatij san toTeotsij kipia nochi tlanauatili uan tlanauatianij amo. Uan timotemachiaj san toTeotsij uan iTlanauatijkayo uelis kitlamiltisej nochi tlamantli tlen amo kuali.

2. ¿Kenijkatsa uelis tijnextisej amo timokalakiaj ipan tlen mochiua ipan Tlaltipaktli?

Tojuantij tijchiuaj kej Jesús, yeka amo timokalakiaj ipan política. Kema maseualmej kiitakej Jesús kichijki se ueyi tlamantli, kinejkej ma eli inintlanauatijka, uan ya amo kinejki (Juan 6:15). ¿Kenke amo kinejki? Jesús teipa kiijtok: “Notlanauatilis kampa na nitlanauatia axmokauas ipan ni Tlaltipaktli” (Juan 18:36). Ipan miak tlamantli uelis tijnextisej amo timokalakiaj ipan tlen mochiua ipan Tlaltipaktli, kej kema amo tijnekij tiasej kema mochiua se tlauilankayotl (xijpoua Miqueas 4:3). Maske tijtlepanitaj bandera uan sekinok tlamantli tlen kiixnextia se altepetl, amo tijtlajpalouaj yon tijuikatiaj pampa tlaj kiampa tijchiuaskiaj nesiskia tijueyichiuaj (1 Juan 5:21). Nojkia amo tijpaleuiaj yon tijkualankaitaj se tlanauatijketl o katli kineki tlanauatis. Ipan ni uan ipan sekinok tlamantli uelis tijnextisej tijpaleuiaj san toTeotsij iTlanauatijkayo.

 KUALI XIMOMACHTI

3. Cristo itokilijkauaj amo mokalakiaj ipan tlen mochiua ipan Tlaltipaktli

Jesús uan itokilijkauaj technextilijkej kenijkatsa uelis kiampa tijchiuasej. Xijpouakaj Romanos 13:1, 5-7 uan 1 Pedro 2:13, 14. Teipa xikitakaj nopa VIDEO uan xijnankilikaj ni tlajtlanili:

• ¿Kenke moneki tikintlepanitasej tekichiuanij?

• ¿Ipan tlake tlamantli uelis tijnextisej tikinneltokaj tekichiuanij?

Sekij altepemej kiijtouaj amo mokalakiaj kema mochiua se tlauilankayotl, maske kiampa kiijtouaj, kena tlapaleuiaj ipan se keski tlamantli. ¿Uajka tlake kiijtosneki amo timokalakisej ipan tlen mochiua ipan Tlaltipaktli? Xijpouakaj Juan 17:16. Teipa xikitakaj nopa VIDEO uan xijnankilikaj ni tlajtlanili:

• ¿Tlake kiijtosneki amo timokalakisej ipan tlen mochiua ipan Tlaltipaktli?

¿Uan tlake moneki tijchiuasej kema tekichiuanij techiljuisej ma tijchiuakaj se tlamantli tlen Jehová amo kipaktia? Xijpouakaj Hechos 5:28, 29. Teipa xikitakaj nopa VIDEO uan xijnankilikaj ni tlajtlanili:

• Tlaj tekichiuanij techiljuiskiaj ma tijchiuakaj tlen toTeotsij amo kipaktia, ¿ajkia moneki tijneltokasej?

• ¿Ipan tlake sekinok tlamantli timoiljuia Cristo itokilijkauaj nojkia moneki amo kinneltokasej tekichiuanij?

 4. Ika tlen tijchiuaj uan ika tlen timoiljuiaj

Xijpouakaj 1 Juan 5:21. Teipa xikitakaj nopa VIDEO uan xijnankilikaj ni tlajtlanili:

• ¿Kenke Ayenge amo kinejki mokalakis ipan política yon kitlajpalos bandera?

• ¿Timoiljuia kuali tlen kichijki?

¿Ipan tlake sekinok tlamantli moneki tijnextisej amo timokalakiaj ipan tlen mochiua ipan Tlaltipaktli? Xikitakaj nopa VIDEO uan xijnankilikaj ni tlajtlanili:

• ¿Kenijkatsa uelis tijnextisej amo timokalakiaj ipan tlen mochiua ipan Tlaltipaktli kema maseualmej katli euaj ipan miakej altepemej motlanij kema mauiltiaj?

• ¿Kenijkatsa uelis amo timokalakisej ipan tlen mochiua ipan Tlaltipaktli kema políticos kichiuaj se tlamantli tlen techpaleuia o tlen amo techpaleuia?

• ¿Kenke tlen kiijtouaj ipan noticias o maseualmej ueliskia kichiuas ma timokalakikaj ipan tlen mochiua ipan Tlaltipaktli?

 TLEN TIMOMACHTIJKEJ

Cristo itokilijkauaj kichiuaj kampeka amo mokalakisej ipan política, uan nopa kinextiaj ika tlen moiljuiaj, ika tlen kiijtouaj uan ika tlen kichiuaj.

¿Tlake tijyekok?

• ¿Kenijkatsa tijnextiaj tikinneltokaj tlanauatianij?

• ¿Kenke amo timokalakiaj ipan política?

• ¿Ipan tlake tlamantli moneki tijnextisej amo timokalakiaj ipan tlen mochiua ipan Tlaltipaktli?