ISIFUNDO 45
Ungatshengisa Njani Ukuthi Usekela UMbuso KaNkulunkulu Kuphela?
UJesu watshela abafundi bakhe wathi: “Alisibo bomhlaba.” (UJohane 15:19) Lokhu kutsho ukuthi akumelanga singene kwezombusazwe kumbe siye ezimpini. Kodwa ngezinye izikhathi kunzima ukungangeni endabeni zomhlaba lo ngenxa yokwesaba ukuchothozwa. Manje singenzani ukuze sitshengise ukuthi sisekela uMbuso kaJehova uNkulunkulu kuphela?
1. AmaKhristu eqiniso ababona njani ohulumende?
AmaKhristu eqiniso ayabahlonipha ohulumende. Senza lokho esakutshelwa nguJesu. Wathi: “Buyiselani okukaKhesari kuKhesari.” Lokhu kutsho ukuthi kumele silalele imithetho kahulumende egoqela lokubhadala imithelo. (UMakho 12:17) IBhayibhili lithi uJehova uvumele ukuthi ohulumende babuse okwakhathesi. (KwabaseRoma 13:1) Kodwa kumele sikhumbule ukuthi ohulumende kabalamandla okuqeda inhlupho ezikhona. Yikho uNkulunkulu ezasebenzisa uMbuso wakhe ukuze aqede zonke inhlupho zethu.
2. Singatshengisa njani ukuthi sisekela uMbuso kaNkulunkulu kuphela?
Silingisela uJesu ngokungangeni kwezombusazwe. Ngemva kokubona esinye isimanga esasenziwe nguJesu, abantu basebefuna ukumenza inkosi kodwa kazange avume. (UJohane 6:15) Kungani uJesu wala ukuba yinkosi? Impendulo siyithola kulokho akukhuluma ngelinye ilanga. Wathi: “UMbuso wami awusiwo walumhlaba.” (UJohane 18:36) Njengoba singabalandeli bakaJesu lathi asingeni endabeni zomhlaba ezinjengokuya empini. (Bala uMikha 4:3.) Siyayihlonipha ifulegi yelizwe kodwa asiyisaluthi ngoba lokho yikuyikhonza. (1 UJohane 5:21) Akulaqembu lezombusazwe esilisekelayo loba esiphikisana lalo, kanti njalo akulamuntu esimvotelayo. Sikhetha ukusekela uMbuso kaNkulunkulu, okutsho uhulumende wakhe osezulwini.
GEBHA UJULE
Engxenyeni le uzafunda ngezinto ezingenza kube nzima ukuthi usekele uMbuso kaNkulunkulu kuphela. Uzabona lokuthi ungenzani ukuze utshengise ukuthi usekela wona wodwa.
3. AmaKhristu eqiniso awangeni endabeni zomhlaba lo
Kumele silingisele isibonelo sikaJesu lesabalandeli bakhe. Bala uRoma 13:1, 5-7; lo-1 Phetro 2:13, 14. Ngemva kwalokho bukelani IVIDIYO beselixoxa ngemibuzo elandelayo.
-
Kungani kumele sihloniphe iziphathamandla?
-
Singatshengisa njani ukuthi siyazihlonipha iziphathamandla?
Amanye amazwe athi awasekeli izimpi kodwa nxa kungaba lempi phakathi kwamanye amazwe amabili ayasekela ngokuwanika imali lezikhali. Kutshoni sibili ukungangeni endabeni zomhlaba lo? Bala uJohane 17:16. Ngemva kwalokho bukelani IVIDIYO beselixoxa ngombuzo olandelayo.
-
Singatshengisa njani ukuthi asingeni kwezombusazwe?
Kumele wenzeni nxa iziphathamandla zifuna wenze into ephikisana lomthetho kaNkulunkulu? Bala imiSebenzi 5:28, 29. Ngemva kwalokho bukelani IVIDIYO beselixoxa ngemibuzo elandelayo.
-
Kumele wenzeni nxa umthetho kahulumende uphikisana lomthetho kaNkulunkulu?
-
Ubona angani kukuziphi izimo lapho okungamelanga amaKhristu enze lokho okufunwa nguhulumende?
4. Ungangeni kwezombusazwe ngokwenzayo langokucabangayo
Bala u-1 Johane 5:21. Ngemva kwalokho bukelani IVIDIYO beselixoxa ngemibuzo elandelayo.
-
Kuyini okwenza u-Ayenge wakhetha ukungajoyini iqembu lezombusazwe lokungasaluthi ifulegi?
-
Ubona angani wakhetha kuhle yini?
Yiziphi ezinye izimo ezingenza kube nzima ukungangeni endabeni zomhlaba lo? Bukelani IVIDIYO beselixoxa ngemibuzo elandelayo.
-
Singakubalekela njani ukuzigqaja ngelizwe elithile nxa sibukele imidlalo?
-
Kungani kungamelanga singene endabeni zomhlaba lo lanxa okwenziwa ngabezombusazwe kusithinta?
-
Kungani kungamelanga sivume ukuthi okukhulunywa ngabezindaba kumbe abanye abantu kusenze sisekele izindaba zomhlaba lo?
AmaKhristu eqiniso kumele azimisele ukungangeni endabeni zomhlaba lo lokungasekeli ezombusazwe ngalokho akucabangayo, akukhulumayo lakwenzayo
NXA OMUNYE ANGATHI: “Kungani lingasaluthi ifulegi njalo lingahlabeli lengoma yesizwe?”
-
Ungamphendula usithini umuntu otshonjalo?
ISIFINQO
AmaKhristu eqiniso kumele azimisele ukungangeni endabeni zomhlaba lo lokungasekeli ezombusazwe ngalokho akucabangayo, akukhulumayo lakwenzayo.
Ufundeni?
-
AmaKhristu eqiniso ababona njani ohulumende?
-
Kungani singangeni kwezombusazwe?
-
Yiziphi izimo ezingenza kube nzima ukungangeni endabeni zomhlaba lo?
THOLA OKUNENGI
Bukela ividiyo le ubone ukuthi kuyini okungasilahlekela nxa sizimisele ukungangeni kwezombusazwe.
Bukela ividiyo le ubone ukuthi izimuli zingabulungiselela njani ubunzima ezizahlangana labo ngenxa yokungangeni endabeni zomhlaba.
Bukela ividiyo le ukuze ubone okwenza eyinye indoda yatshiya umsebenzi eyayiwuqakathekisa kakhulu.
Bala isihloko lesi uzwe ukuthi ungatshengisa njani ukuthi awusongxenye yomhlaba nxa ukhetha umsebenzi ofuna ukuwenza.
“Umuntu Ngamunye Uzazithwalela Umthwalo Wakhe” (INqabayokulinda, March 15, 2006)
Nanku Okunye
IMIBUZO EJAYELE UKUBUZWA NGABANTU
OFakazi BakaJehova Babafundisa Njani Abantu IBhayibhili?
Uhlelo lokufunda iBhayibhili laboFakazi bakaJehova ngolwamahala njalo ukhululekile ukusebenzisa iBhayibhili olijayeleyo kanye lokunxusa izihlobo labangane ukuthi labo bafunde lindawonye.
