Yezo tɛnɛndó hɛ̃ ava lo ya “ta ĩ ti dɛ azi ti lɛ sese ma.” (Yoanɛ 15:19) Ni fa ya ta ala lengbi ti yɔlɔngɔ tɛrɛ la na ya kpale ti politikɛ bere ti to ma. Ta ndo du woni kɛ̃ngɔ yɔlɔngɔ tɛrɛ na ya lo ti gigi ma. Azi lengbi ti tɛnɛngɔ siɔni na lo tɛ e na lo mɛ ya e kɛ̃ lingɔ ya lo ti gigi. Ngasia la elengbi ti kɛ̃ngɔ yɔlɔngɔ tɛrɛ e na ya lo ti gigi, wa e ngbã nga mbilimbili ka mbage tɛ Yehova nɛ?

1. Abɛta awakristo ndo ba lo-lɛngɔ gbia ti gigi ngasia?

Awakristo ndo tɔndɔ leta. Ala ndo landa selɛlo tɛ Yezo wa ala ndo “futa lapo tɛ [kaisala] hɛ̃ lo,” afa ya e ndo tɔndɔ ndia tɛ leta mɛ ba futangɔ pako. (Marko 12:17) Ngbangɔ tɛnɛ ya aguvɛrnɛma ti gigi ndo lɛ gbia na lo mɛ ya Yehova la zi lége hɛ̃ la. (Roma 13:1) Ta lo-lɛngɔ gbia tɛ azi ɔ tɛ Nzapa ma, na lo mɛ ya ta ala lengbi ti onzingɔ pɛnɔ tɛ azi ma. Na lo ni la e ndo kpã bɛ e ka tɛ Nzapa nga na Lo-lɛngɔ Gbia tɛ lo ti ndozu ya bo ni kɔi la na onzingɔ pɛnɔ tɛ azi zu.

2. Ngasia la e fa ya ta e ndo yɔlɔ tɛrɛ e na ya lo ti gigi ma nɛ?

Nga ma Yezo ta e ndo yɔlɔ tɛrɛ e na ya alo ti politikɛ ma. Na ngoi mɛ azi hũ kpɛ̃nɛ mɛndó Yezo li ko ala yendó kpãngɔ lo gbia, kanda lo kɛ̃ndó. (Yoanɛ 6:15) Na lo nɛ? Lo tɛnɛndó na gesi ya, “ta lo lɛngɔ gbia tɛ mbi adu [ti] lɛ sese olo ma.” (Yoanɛ 18:36) Na lo mɛ ya e du awakristo ko, e ndo fa ya ta e ndo yɔlɔ tɛrɛ e na ya lo ti gigi olo mɛ ma na ya lo ndɛ̃ ndɛ̃ ndɛ̃: Na ndakisa ta e ndo gwe to ma. (Di Mika 4:3.) E ndo tɔndɔ aye ti kɔdɔrɔ nga ma drapo, kanda ta e ndo vɔrɔ ni ma. (1 Yoanɛ 5:21) Ta e ndo hɛ̃ ti e bere e ndo kɛ̃ tɛrɛ linɔ kɔi ti politikɛ ma. Na lingɔ ngaso nga na ya lo mɛndɛ̃ e ndo fa ya e ndo hɛ̃ bo ti e na ya Lo-lɛngɔ Gbia tɛ Nzapa kɔi.

 GI HĨNGANGƆ LO MƐNDƐ̃

3. Ta abɛta awakristo ndo yɔlɔ tɛrɛ la na ya lo ti gigi ma

Yezo na ava lo zia hɛ̃ e selɛlo ti nzɔ̃ni. Di Roma 13:1, 5-7 nga na 1 Petro 2:13, 14. Wa, ba VIDEO na pɛni hɛ̃ gbinya ti ahũnda olo mɛ.

• Nda mɛ ayɔ ya e tɔndɔ leta nɛ?

• Na ya alo mɛ wa la e ndo fa ya e ndo tɔndɔ ala nɛ?

Abɛse akɔdɔrɔ mɛ ndo tɛnɛ ya ta ani ndo yɔlɔ tɛrɛ ani na ya akpale ti to ma ko, kanda na ngoi mɛ se to si ko, ala ndo hɛ̃ ti la hɛ̃ azi ti kɔdɔrɔ sɛ mɛ ndo tiri to niko. Bɛta kɛ̃ngɔ yɔlɔngɔ tɛrɛ na ya lo ti gigi alengbi na nɛ? Di Yoanɛ 17:16. Wa, ba VIDEO na pɛni hɛ̃ gbinya ti hũnda olo mɛ.

• Kɛ̃ngɔ yɔlɔngɔ tɛrɛ na ya lo ti gigi afa nɛ?

Wa se leta yɔ ya e li ye mɛ ako nyɔ ndia tɛ Nzapa mɛ? Di Awa Pangɔ Kwa 5:28, 29. Wa, ba VIDEO na pɛni hɛ̃ gbinya ti ahũnda olo mɛ.

• Se leta hɛ̃ ndia mɛ ako nyɔ ndia tɛ Nzapa, omɛ mɔ tɔndɔ wa?

• Na ya alo ni nɛ la ta wakristo lengbi ti tɔndɔngɔ leta ma nɛ?

 4. Kɛ̃ yɔlɔngɔ tɛrɛ mɔ na ya lo ti gigi na bingangɔ li nga na kwa tɛ mɔ

Di 1 Yoanɛ 5:21. Wa, ba VIDEO na pɛni hɛ̃ gbinya ti ahũnda olo mɛ.

• Nda mɛndó Ayenge kɛ̃ yɔlɔngɔ tɛrɛ lo na ya kpale ti politikɛ kɔi, hɛ̃ngɔ ti hɛ̃ linɔ ti kɔdɔrɔ tɛ lo bere hɛ̃ngɔ ndima hɛ̃ drapo nɛ?

• Lo mundó ekateli ti nzɔ̃ni?

Aye mɛ lengbi ti kpãngɔ ekateli tɛ e ti kɛ̃ngɔ yɔlɔngɔ tɛrɛ na ya lo ti gigi na ya tara nɛ? Ba VIDEO, na pɛni hɛ̃ gbinya ti ahũnda olo mɛ.

• Mɔ fa ya ta mɔ ndo yɔlɔ tɛrɛ mɔ na ya lo ti gigi ma, na ngoi mɛ mɔ ndo ba wele mɛ abombi azi ti kɔdɔrɔ gba nɛ?

• E fa ya ta e ndo yɔlɔ tɛrɛ e na ya lo ti gigi ma, abɛse na ngoi mɛ leta mu ekateli mɛ lengbi ti hɛ̃ngɔ e nzɔ̃ lo bere siɔ lo ngasia?

• Ngasia la alo mɛ e ndo ma kaya radio, televiziɔ̃, intɛrnɛt lengbi ti lingɔ ya e yɔlɔ tɛrɛ e na ya lo ti gigi nɛ?

 NA NDUNU NI

Awakristo ndo li zu ti nɛngɔ ya ta ani yɔlɔ tɛrɛ ani na ya alo ti gigi ma, abɛse na ya bingangɔ li tɛ la, tɛnɛ tɛ la nga na ya kwa tɛ la.

Bozongeli

• Seliye mɛ elengbi ti fangɔ ka mbage tɛ leta nɛ?

• Nda mɛ ayɔ ya e kɛ̃ yɔlɔngɔ tɛrɛ e na ya kpale ti politikɛ nɛ?

• Alo mɛ lengbi ti kpãngɔ ekateli tɛ e ti kɛ̃ngɔ yɔlɔngɔ tɛrɛ e na ya alo ti gigi na ya tara nɛ?