Jesús okijto ika inomachtijkauan xkichiuaj tlen kichiuaj akin xkitekichiuiliaj toTajtsin (Juan 15:19). Yejuin kijtosneki ika yejuamej xnokalaktiaj ipan política niman xtlapaleuiyaj ipan guerras. Ipampa yejuin, tejuamej akin tiinomachtijkauan Jesús techtlauelitaj niman techpijpinaujtiaj. ¿Tlenon uelis tikchiuaskej niman ijkon nochipa tiktlakamatiskej toTajtsin niman xtikchiuaskej tlen oksekimej kichiuaj?

1. ¿Tlenon tiknemiliaj intech tekiuajkej?

Akin tikchiuaj ken Cristo tikintlakaitaj tekiuajkej. Jesús okijto: “Xmakakan César on tlen yejua iyaxka”. Niman yejon tlen tikchiuaj: tikintlakamatij tlanauatiltin tlen kintlaliaj ipan topaís, ken yejon tlanauatiltin kampa technauatiaj matiktlaxtlauakan tlen tekiuajkej kitlajtlanij (Marcos 12:17). Biblia kijtoua ika tekiuajkej ueli tlayekanaj pampa Jehová kinkauilia (Romanos 13:1). Yejuin techasikamachiltia ika toTajtsin más ueyixtika niman más kojtik xijkon ken tekiuajkej. Ika yejon, kuajli tikmatstokej ika san toTajtsin niman iTekiuajyo uelis tlayektlalis ipan yejuin tlaltikpaktli.

2. ¿Tlenon xtikchiuaj akin tiktekichiuiliaj toTajtsin?

Ijkon ken Jesús, tejuamej xtokalaktiaj ipan política. Ijkuak miyekej okitakej ika Jesús okichiuj se milagro, kinekiyaj kitlaliskej ken intekiuaj, san ika, yejua xokinek (Juan 6:15). ¿Tleka xokinek? Yejua okijto: “Nejua xnitlamandaroua nikan ipan in tlaltikpaktli ken se rey” (Juan 18:36). Akin tikchiuaj ken Cristo miyek ken tikteititiaj ika nochipa san toTajtsin tiknekij tikyolpaktiskej. San matikonteneuakan yejuin, ijkuak nochiua se guerra, tejuamej xtitlapaleuiyaj nion xteuan tontlauijsokij (xkita Miqueas 4:3, TNM). Maski tikintlakaitaj símbolos tlen kinpiya topaís, ken bandera, tejuamej xtikinueyichiuaj (1 Juan 5:21). Tejuamej xtikpaleuiyaj nion se político noso partido político niman xtikimixnamikij. Ijkuak ijkon tikchiuaj, tikteititiaj ika san tikpaleuiyaj iTekiuajyo toTajtsin, yejon gobierno tlen yejua yokitlali.

 OKSEKI XKASIKAMATI

3. Nochipa tiknekij san toTajtsin tikyolpaktiskej

Jesús niman inomachtijkauan nochipa okiteititijkej ika san toTajtsin kinekiyaj kiyolpaktiskej niman ika xkichiuayaj tlen oksekimej kichiuayaj. Xkitakan Romanos 13:1, 5-7 niman 1 Pedro 2:13, 14. Aman xkitakan VIDEO niman xtlajtokan itech yejuin:

• ¿Tleka noneki tikintlakaitaskej tekiuajkej?

• ¿Kenijki uelis tikteititiskej ika tikintlakamatij?

Ijkuak nochiua se guerra, seki países kijtouaj ika yejuamej xteuan nokalaktiaj, san ika, kema kinpaleuiyaj. Kuajli nesi ika kema nokalaktijtokej ipan guerra. Xkitakan Juan 17:16. Aman xkitakan VIDEO niman xtlajtokan itech yejuin:

• ¿Kenijki tikteititiaj ika san iTekiuajyo toTajtsin tikpaleuiyaj?

¿Tlenon noneki tikchiuaskej tla kemantika tekiuajkej techtlajtlaniliaj matikchiuakan itlaj tlen toTajtsin xkuelita? Xkitakan Hechos 5:28, 29. Aman xkitakan VIDEO niman xtlajtokan itech yejuin:

• Tla kemantika tekiuajkej technauatiaj matikchiuakan itlaj tlen xkuelita toTajtsin, ¿akinon noneki tiktlakamatiskej?

• ¿Kemanon tiknemilia ika xnoneki tikintlakamatiskej tekiuajkej? ¿Kanaj tlenon kinekiskiaj technauatiskej?

 4. Matikteititikan ika san iTekiuajyo toTajtsin tikpaleuiyaj ika tlen tikchiuaj niman ika tlen tiknemiliaj

Xkitakan 1 Juan 5:21. Aman xkitakan VIDEO niman xtlajtokan itech yejuin:

• ¿Tleka Ayenge xokinek nokalaktis ipan política nion kitlajpalos bandera?

• ¿Tiknemilia ika kuajli tlen okichiuj?

¿Tlenon noijki ueliskia kichiuas maka san iTekiuajyo toTajtsin matikpaleuikan? Xkitakan VIDEO niman xtlajtokan itech yejuin:

• Kemantika akin kichiuaj se deporte notlatlanij niman ijkon kitaskej katlejua país más ueli nauiltia. ¿Kenijki uelis tikteititiskej ika tejuamej nion se xtikpaleuiyaj?

• ¿Kenijki uelis tikteititiskej ika xtikinpaleuiyaj nion xtikimixnamikij políticos maski tla tlen kichiuaj ueliskia techpaleuis noso techijtlakos?

• ¿Tlenon ueliskia topan nochiuas tla tejuamej melak tikitaj noticias itech política noso tla peua tikuelitaj titlajtoskej imiuan akin kuelitaj tlajtoskej itech política?

 TLEN OTIUEL

Akin kichiuaj ken Cristo kiteititiaj ika xnokalaktiaj ipan política ika tlen kinemiliaj, ika tlen kijtouaj niman ika tlen kichiuaj.

¿Kenon titlanankiliskia?

• ¿Tlenon tiknemiliaj intech tekiuajkej?

• ¿Tleka xtokalaktiaj ipan política?

• ¿Tlenon ueliskia kichiuas maka san iTekiuajyo toTajtsin matikpaleuikan?