Jesu o ile a bolela gore barutiwa ba gagwe ga se ba swanela go ba “karolo ya lefase.” (Johane 15:​19) Tsela e nngwe ye e bontšhago gore ga re karolo ya lefase ke ka go se tšee karolo dipolotiking le dintweng. Eupša go bolela nnete, ka dinako tše dingwe ga go bonolo go dira bjalo. Ka gore batho ba ka re kwera goba ba re sega ge ba bona re sa tšee karolo dilong tšeo. Re ka dira’ng gore re dule re tshepagalela Jehofa ka go se tšee karolo dilong tša lefase le?

1. Na Bakriste ba nnete ba hlompha mebušo ya batho?

Bakriste ba nnete ba hlompha mebušo ya batho. Re dira seo Jesu a boletšego gore re se dire. O itše: “Neang Kesara tša Kesara.” Se se ra gore re kwa melao ya naga e bjalo ka go patela metšhelo. (Mareka 12:​17) Beibele e re lebaka letee feela leo le dirago gore mebušo ya batho e buše mo lefaseng ke gore Modimo o e dumeletše. (Baroma 13:1) Se se ra gore mebušo ya batho ga e na matla go swana le Mmušo wa Modimo. Ke ka baka leo re tshepilego Mmušo wa Modimo gore ke wona o tlago go fediša mathata ka moka a lefase.

2. Re ka bontšha bjang gore ga re tšee karolo dilong tša lefase?

Re ekiša Jesu ka go se tšee karolo dipolotiking. Ka mohlala, ge batho ba be ba bona Jesu a dira mohlolo ba ile ba leka go mo dira kgoši ya bona, eupša Jesu ga se a ka a dumela ba mo dira kgoši. (Johane 6:​15) Ke ka baka la’ng a ile a gana? Ke ka gobane ka moragonyana o ile a bolela gore: “Mmušo wa ka ga se karolo ya lefase le.” (Johane 18:​36) Le rena ka ge re le barutiwa ba Jesu, go na le dilo tšeo re sa di dirego go bontšha gore ga re tšee karolo dilong tša lefase le. Ka mohlala, ga re ye dintweng. (Bala Mika 4:3.) Re hlompha maswao a naga a bjalo ka difolaga, eupša ga re a hlomphe ka tsela e feteletšego ka gobane go dira bjalo go no swana le ge re a rapela. (1 Johane 5:​21) Le gona, ga re thekge mokgatlo le ge e le ofe wa dipolotiki goba go ganetšana le ona, e bile ga re ye dikgethong. Ge e ba re sa dire dilo tše le tše dingwe, re bontšha gore re tshepagalela Mmušo wa Modimo.

 ITHUTE KA MO GO TSENELETŠEGO

3. Bakriste ba nnete ga ba tšee karolo dilong tša lefase

Jesu le balatedi ba gagwe ba re beetše mohlala o mobotse tabeng ye. Balang Baroma 13:​1, 5-7 le 1 Petro 2:​13, 14. Ke moka le bapaleng BIDIO ye, gomme le boledišaneng ka dipotšišo tše di latelago:

• Ke ka baka la’ng re swanetše go hlompha mebušo ya batho?

• Ke dilo dife tše dingwe tšeo re ka di dirago go bontšha gore re a e hlompha?

A re re dinaga tše pedi di a lwa, dinaga tše dingwe di ka ipotša gore ga di eme le e tee ya tšona, eupša di thuša dinaga tšeo tše pedi di lwago. Eupša go se tšee lehlakore go ra gore’ng? Balang Johane 17:​16. Ke moka le bapaleng BIDIO ye, gomme le boledišaneng ka potšišo e latelago:

• Go se tšee lehlakore go ra gore’ng?

Re swanetše go dira’ng ge e ba mmušo o re re dire selo seo se sa dumelelanego le melao ya Modimo? Balang Ditiro 5:​28, 29. Ke moka le bapaleng BIDIO ye, gomme le boledišaneng ka dipotšišo tše di latelago:

• Ge e ba melao ya mebušo ya batho e sa dumelelane le melao ya Mmušo wa Modimo, re swanetše go kwa efe?

• Na o ka nagana ka maemo goba dilo tšeo di ka dirago gore Bakriste ba kgethe go kwa Mmušo wa Modimo go e na le go kwa mebušo ya batho?

 4. O se ke wa tšea lehlakore ka pelong ya gago goba dilong tšeo o di dirago

Balang 1 Johane 5:​21. Ke moka le bapaleng BIDIO ye, gomme le boledišaneng ka dipotšišo tše di latelago:

• Bidiong ye, ke ka baka la’ng ngwanabo rena Ayenge a ile a kgetha go se tsenele mekgatlo ya dipolotiki goba go se tšee karolo meletlong ya dipolotiki e bjalo ka go hlompha folaga?

• Na o nagana gore o dirile phetho e botse?

Ke maemong afe a mangwe ao o naganago gore go ka ba thata gore re se tšee karolo dilong tša lefase? Bapalang BIDIO ye, gomme le boledišaneng ka dipotšišo tše di latelago:

• Re ka bontšha bjang gore ga re tšee lehlakore dipapading ge go bapala dinaga tša go fapafapana?

• Re ka bontšha bjang gore ga re tšee lehlakore ge boradipolotiki ba tšere diphetho tšeo di re nyamišago goba tšeo di re holago?

• Dilo tšeo re di kwago ditabeng goba tšeo re di kwago go batho di ka dira bjang gore re feleletše re tšea lehlakore?

 O ITHUTILE ENG?

Bakriste ba šoma ka thata gore ba se tšee lehlakore dilong tša dipolotiki ka dilo tšeo ba di naganago, ba di bolelago, le tšeo ba di dirago.

Dipotšišo

• Bakriste ba swanetše go dirišana bjang le mebušo ya batho?

• Ke ka baka la’ng re sa tšee karolo dipolotiking?

• Ke maemong afe moo go ka bago thata gore re se tšee lehlakore?