Hesus a bisa cu su discipelnan “no ta parti di mundo.” (Juan 15:19) Esey ta encera cu nan ta neutral, esta, cu nan no ta tuma parti pa ningun partido politico ni ningun partido den guera. Sinembargo, e realidad ta cu no ta semper facil pa keda neutral. Hende por haci cherche di nos debi cu nos ta neutral. Con nos por keda neutral y leal na Jehova Dios?

1. Con cristian berdadero ta mira gobierno humano?

Cristian berdadero ta respeta gobierno humano. Nos ta obedece Hesus y ta “duna Cesar loke ta di Cesar.” (Marco 12:17) Esey ta encera cu nos ta obedece e leynan caminda nos ta biba, manera e leynan cu ta exigi pa nos paga belasting. Bijbel ta mustra cu Jehova ta esun cu ta permiti gobierno humano goberna. (Romanonan 13:1) Esey ta laga nos compronde cu e autoridad cu gobierno humano tin ta limita, esta, nan tin menos autoridad cu Dios. Pues, nos ta pone nos confianza den Dios y su Reino den cielo pa soluciona e problemanan di humanidad.

2. Con nos por mustra cu nos ta neutral?

Mescos cu Hesus, nos no ta mete den asunto politico. Ora hende den tempo di Hesus a mira Hesus haci milager, nan a purba di hacie rey riba Tera, pero e no a laga nan haci esey. (Juan 6:15) Dicon no? Wel, mas despues Hesus a bisa: “Mi reino no ta parti di e mundo aki.” (Juan 18:36) Como siguidor di Hesus, nos ta mustra cu nos ta neutral den varios manera. Por ehempel, nos no ta participa den guera. (Lesa Mikeas 4:3.) Nos ta mustra respet pa simbolo nacional, manera bandera, pero nos no ta duna nan honor ya cu esey lo ta un acto di adoracion. (1 Juan 5:21) Ademas, nos no ta apoya ni bay contra niun partido politico of hende cu ta riba lista di partido politico. Esaki ta djis algun manera cu nos por demostra cu nos ta leal na Dios su gobernacion of Reino.

 KICO MAS NOS POR SIÑA?

3. Cristian berdadero ta keda neutral

Hesus y su siguidornan semper a keda neutral. Nan a pone bon ehempel pa nos. Lesa Romanonan 13:1, 5-7 y 1 Pedro 2:13, 14. Despues, pasa e VIDEO y analisa e siguiente preguntanan:

• Dicon nos tin cu respeta autoridad?

• Con ta algun manera cu nos por mustra cu nos ta sumiso na autoridad?

Den tempo di guera, aunke algun nacion ta bisa cu nan ta neutral, toch nan ta apoya tur dos banda. Kico realmente ta nifica keda neutral? Lesa Juan 17:16. Despues, pasa e VIDEO y analisa e siguiente pregunta:

• Kico ta nifica keda neutral?

Kico nos mester haci si autoridad pidi nos haci algo cu ta bay contra ley di Dios? Lesa Echonan 5:28, 29. Despues, pasa e VIDEO y analisa e siguiente preguntanan:

• Si nos tin cu scoge entre obedece ley di Dios y obedece ley di hende, ken nos tin cu obedece?

• Bo por menciona algun situacion den cua un cristian lo no obedece gobierno humano?

 4. Keda neutral den loke bo ta pensa y haci

Lesa 1 Juan 5:21. Despues, pasa e VIDEO y analisa e siguiente preguntanan:

• Dicon Ayenge no a apoya e partido politico di su pais ni no a participa den ceremonia patriotico manera saluda bandera?

• Bo ta haya cu loke el a scoge pa haci tabata sabi?

Den ki otro situacion por ta dificil pa nos keda neutral? Pasa e VIDEO. Despues, analisa e siguiente preguntanan:

• Con nos por keda neutral ora nos ta wak deporte caminda tin atleta di diferente pais ta competi contra otro?

• Con nos por keda neutral ora gobierno tuma decision cu ta cumbini nos of tuma decision cu no ta cumbini nos?

• Ki efecto loke nos ta tende den noticia of di hende rond di nos por tin riba nos decision pa keda neutral?

 RESUMEN

Ora ta trata di asunto politico, un cristian ta haci esfuerso pa keda neutral den loke e ta pensa, papia y haci.

Repaso

• Kico nos mester duna gobierno humano?

• Dicon nos ta keda neutral den asunto politico?

• Den ki situacion por ta dificil pa nos keda neutral?