Jesus sei olketa follower blo hem shud “no olsem pipol long world.” (John 15:19) For neutral hem minim for no teksaed lo politik and olketa war wea gohed lo world. Bat hem no evritaem isi for neutral. Maet pipol mekfani lo iumi bikos iumi duim olsem. Wat nao iumi savve duim for gohed neutral and loyal lo Jehovah God?

1. Hao nao olketa tru Christian ting lo olketa gavman?

Olketa Christian respectim gavman. Iumi duim samting wea Jesus talem for “givim go bak long King samting wea hem bilong King,” wea hem nao for obeyim olketa law blo kantri, olsem for peim tax. (Mark 12:17) Bible sei Jehovah nao letem olketa gavman for rul. (Rome 13:1) So iumi luksavve God garem bigfala paoa winim olketa gavman. Iumi trustim God and Kingdom blo hem lo heven nao for stretem olketa problem blo iumi.

2. Wat nao iumi savve duim for showim iumi neutral?

Iumi no laek join insaed politik olsem Jesus. Taem pipol lukim wanfala lo olketa mirakol blo Jesus and trae for mekem hem king for olketa lo earth, Jesus no letem olketa for duim datwan. (John 6:15) Why nao olsem? Bikos bihaen hem sei, “Kingdom bilong mi hem no bilong disfala world.” (John 18:36) From iumi olketa disaepol blo Jesus, iumi neutral lo samfala samting. Example nao, iumi no go faet lo war. (Readim Maeka 4:3.) Iumi respectim olketa symbol blo kantri, olsem olketa flag, bat iumi no worshipim. (1 John 5:21) And iumi no teksaed and no againstim tu eni politikol party or man wea candidate for stand lo gavman. Taem iumi neutral lo olketa samting hia and lo olketa nara samting tu, iumi showim iumi loyal lo gavman blo God, wea hem Kingdom blo hem.

 DIG GO MOA

3. Olketa tru Christian olketa neutral

Jesus and olketa follower blo hem showim gud example for iumi. Readim Rome 13:1, 5-7 and 1 Peter 2:13, 14. Then pleim VIDEO and discussim tugeta olketa kwestin hia.

• Why nao iumi shud respectim olketa gavman?

• Wat nao samfala samting wea iumi savve duim wea showim iumi stap anda lo olketa?

Lo taem blo war, maet samfala kantri sei olketa neutral, bat olketa helpem tufala kantri wea faetem each other. Wat nao hem minim for neutral? Readim John 17:16. Then pleim VIDEO and discussim tugeta kwestin hia.

• Wat nao hem minim for neutral?

Hao if olketa gavman talem iu for mas duim samting wea againstim law blo God? Readim Acts 5:28, 29. Then pleim VIDEO and discussim tugeta olketa kwestin hia.

• If law blo gavman hem againstim law blo God, law blo hu nao iumi shud obeyim?

• Iu savve tingim eni situation wea olketa Christian bae no obeyim law blo gavman?

 4. Mas neutral lo toktok and akson blo iumi

Readim 1 John 5:21. Then pleim VIDEO and discussim tugeta olketa kwestin hia.

• Olsem iumi lukim lo video, why nao Ayenge disaed for no joinim politikol party and eni celebration wea mekhae lo kantri, olsem for salutim flag?

• Iu tingse hem mekem gud disison?

Wat nao samfala situation wea mekem hem no isi for iumi neutral? Pleim VIDEO, then discussim tugeta olketa kwestin hia.

• Hao nao iumi savve gohed neutral, taem iumi watchim olketa man from olketa difren kantri pleim sports and compete againstim each other?

• Hao nao iumi savve gohed neutral, nomata if olketa disison wea olketa bigman lo gavman mekem hem spoelem or helpem iumi?

• Hao nao olketa samting wea iumi herem lo nius and from olketa nara pipol savve mekem hem no isi for iumi neutral?

 MAIN POINT

Olketa Christian waka hard for neutral lo tingting, toktok, and akson blo olketa lo eni samting wea join witim politik.

Review

• Wat nao olketa gavman fit for kasem from iumi?

• Why nao iumi mas gohed neutral lo politik?

• Wat nao samfala situation wea savve mekem hem no isi for iumi neutral?