Sises ketin padahkihong sapwellime tohnpadahk kan me irail “kaidehn kisehn sampah.” (Sohn 15:19) Met kin pidada soupoupali, me wehwehki sohte uhki palien politik kan oh mahwen. Ni mehlel, soupoupali sohte kin mengei ahnsou koaros. Aramas akan kakete kapailoke kitail pwehki atail kin soupoupali. Ia duwen atail kak kolokolete atail soupoupali oh loalopwoatohngete Siohwa Koht?

1. Dahme Kristian mehlel kan kin medewehki koperment en aramas kan?

Kristian kan kin wauneki koperment. Duwehte me Sises mahsanih, kitail en “pwainohng Sihsar mehkan me ahn Sihsar,” me wehwehki, kitail en peikiong kosonned en sahpw kan me duwehte pwain daksis. (Mark 12:17) Paipel kin padahngki me koperment en aramas akan kin kakaun pwehki Siohwa ketin mweidohng irail en kakaun. (Rom 13:1) Eri kitail wehwehki me en koperment kan manaman tikitiksang sapwellimen Koht manaman en kaunda. Kitail kin koapworopworki atail Kohto oh sapwellime Wehio me mi nanleng en kamwahwihala en aramas akan kahpwal kan.

2. Ia duwen atail kak kasalehda me kitail kin soupoupali?

Duwehte Sises, kitail sohte kin utung palien politik kan. Ni aramas ako ar kilang ehu sapwellimen Sises manaman ko, re song wiahkihla ih ar nanmwarki nin sampah ahpw e sohte dukiong irail. (Sohn 6:15) Dahme kahrehda? Pwehki, mwuhr e mahsanih, “ei wehi kaidehn kisehn sampah wet.” (Sohn 18:36) Nin duwen sapwellimen Sises tohnpadahk, kitail kin soupoupali ni soangen ahl kei. Karasepe, kitail sohte kin iang mahwen. (Wadek Maika 4:3.) Kitail kin wauneki kilel en wehi kan, me duwehte pilaik kan, ahpw kitail sohte kin kaudokiong mepwukat. (1 Sohn 5:21) Oh kitail sohte kin uhki de uhwong pwihnen politik kan de kandedeid kan. Ih soangen ahl pwukat oh ahl teikan me kitail kin kasalehda me kitail uhdahn loalopwoatohng koperment en Koht me iei sapwellime Wehi.

 KALAUDEHLA OMW ESE MET

3. Kristian mehlel kan kin soupoupali

Sises oh sapwellime tohnpadahk ko wiahda mehn kahlemeng ong kitail. Wadek Rom 13:1, 5-7 oh 1 Piter 2:13, 14. Mwuri, kilang KISIN KASDO oh koasoiapene peidek pwukat.

• Dahme kahrehda kitail anahne wauneki koperment kan?

• Ia duwen atail kak kasalehda me kitail kin peikiong irail?

Ni ahnsoun mahwen, ekei wehi kan kin nda me dene re soupoupali, ahpw re kin sewese pali riauwo me uhpene. Ia uhdahn wehwehn soupoupali? Wadek Sohn 17:16. Mwuri, kilang KISIN KASDO oh mwuri koasoiapene peidek wet.

• Ia wehwehn en kin soupoupali?

Ia duwen ma koperment kan men kitail en wia mehkot me sohte pwungiong kosonned en Koht? Wadek Wiewia 5:28, 29. Mwuri, kilang KISIN KASDO oh koasoiapene peidek pwukat.

• Ma kosonned en aramas sohte pwungiong kosonned en Koht, mehnia kosonned me kitail pahn peikiong?

• Ke kak medewehla soangen ahnsou dah me Kristian kan sohte pahn peikiong koperment kan?

 4. Soupoupali ni madamadau oh wiewia

Wadek 1 Sohn 5:21. Mwuri, kilang KISIN KASDO oh koasoiapene peidek pwukat.

• Dahme kahrehda Ayenge pilada en dehr iang pwihnen politik de iang kasarawien wehi, me duwehte kawauwih pilaik?

• Ke medewe me e wiahda pilipil mwahu?

Soangen ahnsou dah kan me pil kak kasonge atail soupoupali? Kilang KISIN KASDO, oh mwuri koasoiapene peidek pwukat.

• Ia duwen atail kak kolokolete atail soupoupali ni ahnsou me wehi kan siaipene nan mwadong kan?

• Ia duwen atail kak kolokolete atail soupoupali ma pilipil kan me pwihnen politik kan wiahda kin mwahu de suwed ong kitail?

• Dahme palien rohng kan de aramas akan me kitail kin patehng kak wiahiong atail soupoupali?

 DAHME KE SUKUHLKIER

Kristian kan kin nantihong en dehr uhki palien politik kan nan ar madamadau, lokaia oh wiewia kan.

Kousapahl

• Dahme kitail anahne wiahiong koperment kan?

• Dahme kahrehda kitail en kolokolete atail soupoupali?

• Soahng dah kan me kak kasonge atail soupoupali?