Jesús yachachicami paita sirtu catijcuna “mana cai pachamanda” anguichi nisha (Juan 15:19). Cai nisha nin ñucanchi mana satirinchichu politicagunai guerragunais. Cai mundu rurashcaunai mana satiringahua shinzhimi. Ñucanchi mana cai mundu parti tucushcamanda huaquin runauna ñucanchira burlanungami. ¿Imasnara cai mundui mana satirisha Jehová Diosta chuyaj shunguhua sirvina ushanchi?

1. Diosta sirtu sirvijcuna ashcaraigu ¿imasnara runa gobiernogunara ricunchi?

Diosta sirvijcuna gobiernogunara respetanchimi. Jesús nicami: “Cesarbajta Cesarma cuichi” nisha. Caita ruranchi, llactai tiaj leygunara casusha impuesto paganaras pagasha (Marcos 12:17). Diospa Shimi yachachinmi runauna mandanunmi Dios saquishcaraigu (Romanos 13:1). Chiraigu yachanchimi runa gobiernoguna, Diospa gobiernomanda mana mas ushai charinunzhu. Ñucanchi Dios ahua pachai tiaj mandanalla ñucanchi problemagunara sirtu pacha tucuchina ushashcara quirinchimi.

2. ¿Imasnara ricuchinchi mundu rurashcaunai mana satirishcara?

Jesús cuinta politicagunai mana satirinchichu. Jesús shu milagro rashcara ricusha runauna cai allpaibi rey tucuchu munanuca. Shinajpis Jesús mana saquicachu (Juan 6:15). ¿Imarasha? Huasha paillara casna nica: ‘Ñuca mandana pacha mana cai pachamanda’ ashcaraigu (Juan 18:36). Jesusta ñucanchi sirtu catijcuna ashcamanda mana cai mundu partimanda anchichu, chiraigu guerragunama mana rinchichu (leai Miqueas 4:3). Bandera, escudo, himno nacional nishcaunara respetashas chigunara mana ahuayachisha aduranchichu (1 Juan 5:21). Politicahua mana cuntra anchi shinajpis paigunahua mana satirinchichu. Casna rurasha chuyaj shunguhua Diospa Reinora sirvishcara ricuchinchi.

 MAS YACHAI

3. Diosta sirtu sirvijcuna cai mundu rurashcaunai mana satirinchichu

Jesús, paita catijcunas ñucanchira ali ruranara yachachinuca. Leaichi Romanos 13:1, 5-7; 1 Pedro 2:13, 14. Cai VIDEORA ricuichi, huasha catij tapuigunamanda rimaichi:

• ¿Imarasha mandajcunara respetana anchi?

• ¿Imasnara mandajcunara casushcara ricuchinchi?

Guerra timpui maican llactauna mana chibi satirinchichu ninun, shina ashas ishquindi macanuj llactaunara yanapanun. Shina yanapasha ¿sirtuchu chi guerraibi mana satirinun? Leaichi Juan 17:16. Cai VIDEORA ricuichi, huasha catij tapuimanda rimaichi:

• ¿Imara nisha nin cai mundu rurashcaunai mana satirina?

Maicambi autoridadguna mandanun Dios mandashcara mana casuchu, shina mandanujpi ¿imara rurana anchi? Leaichi Hechos 5:28, 29. Cai VIDEORA ricuichi, huasha catij tapuigunamanda rimaichi:

• Runa gobierno Dios munashca shina ama ruraichi nijpi ¿maicanda casuna anchi?

• ¿Ima huraspi Diosta sirvijcuna autoridadgunara mana casuna anchi?

 4. Camba iyanai camba ruranais cai mundu rurashcaunai ama satirichu

Leaichi 1 Juan 5:21. Cai VIDEORA ricuichi, huasha catij tapuigunamanda rimaichi:

• ¿Imarasha Ayenge huauqui ajllaca mana politicai satirinara banderaras mana saluranaras?

• ¿Alichu pai ajllashca?

Shuj pasashcaunai ¿imasna mundu rurashcaunai mana satirishcara ricuchina ushanchi? VIDEORA ricuichi, huasha catij tapuigunamanda rimaichi:

• Caran llactamanda pujllaj muntunguna pujllanujpi ¿imasnara cai mundu rurashcaunai mana satirinchi?

• Politicoguna rurashca ñucanchira yanapajpi o turmindachijpis ¿imasnara politicai mana satirinchi?

• Radioibi televisiombi politicamanda noticiagunara o politicamanda rimashcaunara yapajta uyajpi ¿ñucanchira imara tucunga?

 IMARA YACHASHCANGUI

Jesusta catijcuna politicai mana satiringaj ashcara ursarinun, caita ricuchinun paiguna rimanai iyanai ruranais.

Iyaringaj

• ¿Ima rurashara runa gobiernogunara respetanchi?

• ¿Imarasha política rurashcaunai mana satirinchi?

• Shuj pasashcaunai ¿imasna mundu rurashcaunai mana satirishcara ricuchina ushanchi?