Jesusca paita caticcunata nira: “Canguna mana cai mundu parti changuichi” nisha (Juan 15:19, TNM). Chiraicu, politicaibi, guerragunaibi mana chapurinchichu. Pero imasaibi cai mundu rashcagunaibi mana chapuringahuaga sinzhi man. Ñucanchi mana cai mundu parti ashcamanda, maican runagunaga piñaitucunchichari. Imasata Jehovahua Gobiernollata casushcata ricuchinchi.

1. Jesusta sirtu caticcunaga gobiernogunamanda imatata yuyanchi

Jesusta caticcunaga gobiernogunata respetanchimi. Jesusca nira: “Roma llactamanda reyta pagana ashcata, paita pagaichi”. Chiraicu, ñucanchi llactaibi apugunahua leygunata casusha, impuestogunatas paganchi (Marcos 12:17, TNM). Bibliaibiga, Jehova lugar saquishcamanda, runa gobiernoguna mandaushcata yachachin (Romanos 13:1). Chasna ashahuas, runa gobiernogunaga Diospa Gobiernomanda mana mas ushaita charinaunzhu. Chiraicu, runa gobiernogunata casushahuas, Diostami masta casunchi. Ñucanchi Diosca paiba Gobiernohuan tucui runagunahua turmintugunata tucuchinga.

2. Imasata cai mundu rashcagunaibi mana satirishcata ricuchinchi

Jesus shinallata, ñucanchiga politicaibi mana satirinchichu. Runaguna Jesus milagrota rashcata ricusha, pai rey tucuchun munanaura. Pero paiga chita ranauchun mana saquirachu (Juan 6:15). Imahuata caita mana munara. Huasha, paiga nira: ʻÑuca mandanaga mana cai mundumanda parti chanʼ (Juan 18:36). Ñucanchiga Jesusta caticcuna ashcamanda mana cai mundumanda parti chanchi. Chiraicu, guerragunama mana rinchichu (Miqueas 4:3​ta leipai). Banderata, escudota, himno nacionalta respetashahuas, chigunata mana jatunyachisha adoranchichu (1 Juan 5:21). Maican politicoguna partima mana tucunchichu. Paigunamanda alitahuas mana alitahuas mana rimanchichu. Caita rashami, Dios churashca Gobiernollata casushcata ricuchinchi.

 CAIMANDA MASTA YACHAI

3. Jesusta sirtu caticcunaga cai mundu rashcagunahuan mana chapurinchichu

Jesus, paita caticcunahuas, imashina rana ashcata ricuchitucuranchi. Romanos 13:1, 5-7 y 1 Pedro 2:13, 14​ta leichi. Chimandas, VIDEOTA ricuichi, huasha cai tapuigunamanda cuintanacuichi:

• Imahuata autoridadcunata respetana anchi.

• Imasata paigunata casushcata ricuchinchi.

Guerra tiacpiga, maican gobiernoguna chibi mana satirinchichu ninaun. Chasna acpihuas, guerraibi macanacuc ishcandi llactagunatami yanapanaun. Chita rashaga, cai guerraibi chapuriungunachu. Juan 17:16​ta leichi. Chimandas, VIDEOTA ricuichi, huasha cai tapuimanda cuintanacuichi:

• Imata rashata cai munduibi mana chapurinchi.

Imasaibi autoridadcuna Dios mana gustashcata raichi ninaun. Chasna nicpi, imatata rana anchi. Hechos 5:28, 29​ta leichi. Chimandas, VIDEOTA ricuichi, huasha cai tapuigunamanda cuintanacuichi:

• Runa gobierno Dios mana munashcata raichi nicpi, pitata casuna anchi.

• Jesusta caticcunaga imagunallatata runa gobiernogunata mana casuna anchi.

 4. Can yuyashcagunahuan, can rashcagunahuan cai mundu rashcagunaibi ama chapurichu

1 Corintios 10:14​ta leichi. Chimandas, VIDEOTA ricuichi, huasha cai tapuigunamanda cuintanacuichi:

• Imahuata cai huauquiga cai politica partima mana tucusha, banderatas mana jatunyachira.

• Canga, pai ali rashcatachu yuyangui.

Imagunata rashata imasaibi munduhuan chapurinata ushanchi. VIDEOTA ricuichi, huasha cai tapuigunamanda cuintanacuichi:

• Chican llactagunapura gananacungahua pugllaushcaibi, imata rashata cai mundu rashcagunahuan mana chapurinchi.

• Politicoguna rashca, ñucanchita yanapacpi o turmintachicpihuas, imata rashata politicaibi mana satirinchi.

• Caran uras politicamanda noticiagunata ricusha o politicamanda rimangahua munac runagunahuan apanacusha, imashi tucushun.

 IMATA YACHASHCANGUI

Jesusta caticcunaga politica partima mana tucungahua sinzhita ursarinaun. Ñucanchi yuyashcahuan, rimashcahuan, rashcagunahuan cai munduibi mana chapurishcata ricuchinchi.

Yachashcata cuintai

• Imata rashata runa gobiernogunata respetanchi.

• Politicaibi imahuata mana satirinchi.

• Imata rashata imasaibi mundu rashcagunahuan chapurinata ushanchi.