O Ježiš phenďa, hoj leskere učeňika ena aver, bo na džana le svetoha. (Ján 15:19) So oda hin? Na džas le svetoha akor, te na ľikeras ňisavi politicko sera a aňi na džas pro slugadžipen. Aľe nane furt loko, te na kerel avka, sar o svetos. Vaš kada amen šaj anen pro asaben. So amenge pomožinela, te na poddel pes le svetoske a te ačhel verna le Jehovaske?

1) Sar dikhen pre manušikane vladi o čačikane kresťana?

Amen nane ňič proťi o vladi. Keras avka, sar phenďa o Ježiš: „Poťinas, so hin le cisariskero, le cisariske.“ Sar? Avka, hoj šunas o zakoni a tiš poťinas oda, so amendar o štatos užarel, či o daňi, vaš o šmeci, abo vaš varesoske avreste. (Marek 12:17) E Biblija phenel, hoj o vladi vladňinen ča vašoda, bo o Jehovas lenge oda domukhel. (Rimanom 13:1) Le vladen nane pre oda te odčhivel savore pharipena. Aľe le Devles hin ajsi zor. Vašoda pes zmukhas ča pre leste the pre leskero kraľišagos.

2) Sar sikavas, hoj pes na thovas andre politika, aľe aňi hoj na džas proťi late?

Le Ježiš ňigda ňič na chalas la politikaha a vašoda oda na keras aňi amen. Oda pes sikaďa akor, sar kerďa jekh zazrakos. O manuša les kamle te kerel kraľiske, aľe ov oda lenge na domukhľa. (Ján 6:15) Soske? Ov korkoro phenďa: „Miro kraľišagos nane andal ada svetos.“ (Ján 18:36) Amen, le Ježišoskere učeňika, pes tiš na thovas andre politika, aľe aňi na džas proťi late. Na džas pro slugadžipen. (Pregen Micheáš 4:3) Na čhungaras pre vlajka, aňi la na labaras, aľe aňi pes ke late na modľinas. (1. Jána 5:21) Na ľikeras ňisava politickona serake, ňisave politikoske, aľe aňi len na košas. Oda sas ča vareso, soha sikavas, hoj vlada, savake sam verna, hin le Devleskero kraľišagos.

 DODŽAN TUT BUTER

3) Na džas le svetoha aňi proťi leste

O Ježiš the leskere učeňika amenge sikade, sar pes oda kerel. Pregen Rimanom 13:1, 5–7 the 1. Petra 2:13, 14. Paľis mukh o VIDEJO a vakeren jekhetane.

• Soske kampel te šunel o vladi?

• Sar sikavas, hoj šunas o vladi?

Prekal e vojna varesave narodi phenen, hoj na ľikeren sera ňisava phuvake. A the te lenca na džan andro mariben, bičhaven lenge love abo lenge bikenen o pištoľa. Čačes ola narodi na chal ňič la vojnaha? Pregen Ján 17:16. Paľis mukh o VIDEJO a vakeren jekhetane.

• So oda hin, hoj na džas le svetoha aňi proťi leste?

So te kerel akor, te o vladi amendar kamen vareso, so hin proťi o Del? Pregen Skutky 5:28, 29. Paľis mukh o VIDEJO a vakeren jekhetane.

• Te o vladi amendar užaren, hoj na šunaha le Devleskero zakonos, akor kas šunaha? Le Devles abo o vladi?

• Džanes andre soste o kresťana na mušinen te šunel le uradňiken, le žandaren, abo varekas, kas hin ajsi zor?

 4) Andre tiro jilo mi dičhol, hoj na chal tut ňič ale svetoha

Pregen 1. Jána 5:21. Paľis mukh o VIDEJO a paľis vakeren jekhetane.

• Soske pes amaro phral o Ayenge na kamľa te pridel andre politika aňi te del paťiv la vlajkake?

• Sas mišto, hoj avka kerďa?

Kana šaj el phares, hoj aňi andro jilo na ľikeraha ňikaske sera? Mukh o VIDEJO a paľis vakeren jekhetane.

• Sar šaj sikavas, hoj na ľikeras ňisava serake, te e phuv, kaj dživas, bavinel varesavo športos?

• O politika kamen te kerel vareso, sostar tut šaj el chasna, abo pre aver sera, sostar ela tiro dživipen phareder. Sar akor šaj sikaves, hoj tut na chal ňič la politikaha?

• Te furt dikhľalas spravi pal e politika abo uľalas le manušenca, so furt vakeren pal e politika, so pes šaj ačhiľahas?

 SO SIKHĽIĽAM

Le kresťanen na chal ňič la politikaha. Aňi andro jilo, aňi le lavenca, aňi oleha, so keren.

So bi phenehas

• Andre soste šunas o vladi?

• Soske na ľikeras ňisava politickona serake?

• Kana šaj el phares aňi andro jilo te na džal le svetoha?