O Isus vakergja kaj leskere sledbenikija na valjani te oven „delo taro sveto“ (Jovan 15:19). Adava značinela kaj mora te oven neutralna — te na mešinen pe ki politika hem ko vojne. Ama, adava nane sekogaš lokho. O manuša šaj ka asan amenge hem ka kritikujnen amen adaleske so siem neutralna. Sar šaj te ačhova neutralna hem te sikava kaj siem verna e Jehovaske?

1. Sar dikhena o čačutne hristijanja ko manušikane vlade?

O hristijanja sikavena poštovanje sprema i vlada. Sar so vakergja o Isus, amen daja e Cezareskoro e Cezareske (Marko 12:17). Adava značinela kaj amen poštujnaja o zakonija ki phuv kote so živinaja, sar na primer o zakoni te platinen pe o danokija. I Biblija sikavela kaj o manušikane vlade postojnena samo adaleske so o Jehova dozvolinela lenge te vladinen (Rimjanite 13:1). Amen haljovaja kaj o manušikane vlade isi len samo relativno ili ograničimo avtoriteti. Džanaja kaj samo amaro Devel preku plo nebesno Carstvo ka rešinel sa o manušikane problemija.

2. Sar šaj te sikava kaj siem neutralna?

Isto sar o Isus, amen da na mešinaja amen ki politika. Keda o manuša dikhle sar o Isus kergja jekh čudo, ola mangle te keren le cari, ama o Isus na dozvolingja lenge adava (Jovan 6:15). Soske? Ov ki jekh javer prilika vakergja: „Mlo Carstvo nane delo taro akava sveto“ (Jovan 18:36). Amen sar e Isuseskere sledbenikija sikavaja kaj siem neutralna ko but načinija. Na primer, na džaja ki vojna. (Čitin Mihej 4:3.) Amen poštujnaja o nacionalna simbolija sar soj o zname, ama na obožavinaja le (1. Jovanovo 5:21). Amen na poddržinaja nijekh političko partija ili političare, a ni na siem protiv lende. Ko akala hem ko but javera načinija, amen sikavaja kaj siem celosno verna e vladake so postavingja la o Devel — leskoro Carstvo.

 DOZNAJN POVIŠE

3. O čačutne hristijanja tane neutralna

O Isus hem leskere sledbenikija dengje amenge primer bašo akava. Čitin Rimjanite 13:1, 5-7 hem 1. Petrovo 2:13, 14, a palo adava dikh o VIDEOKLIPI hem keren lafi bašo akala pučiba:

• Soske valjani te poštujna e manušikane vladen?

• Ko save načinija šaj te sikava kaj siem lenge podložna?

Keda isi vojna, nesave države vakerena kaj tane neutralna, ama ola poddržinena o solduj strane soj tane ki vojna. Na primer, ola kerena adava agjaar so dena pare ili oružje. Ama, akaja nane čačutni neutralnost. Čitin Jovan 17:16, a palo adava dikh o VIDEOKLIPI hem keren lafi bašo akava pučibe:

• So čače značinela te ove neutralno?

So bi kerea ako i vlada rodela tutar te kere nešto soj tano protiv e Devleskoro zakoni? Čitin Dela 5:28, 29, a palo adava dikh o VIDEOKLIPI hem keren lafi bašo akala pučiba:

• Ako o manušikano zakoni rodela nešto soj tano protiv e Devleskoro zakoni, kaske valjani te ova poslušna?

• So mislinea, ko kola situacie o hristijanja na bi ovena poslušna e manušikane vladenge?

 4. Ov neutralno ko misle hem ko postapke

Čitin 1. Jovanovo 5:21, a palo adava dikh o VIDEOKLIPI hem keren lafi bašo akala pučiba:

• Soske o phral Ajenge odlučingja te na ovel členi ki političko partija ili te učestvujnel ko nesave nacionalna ceremonie, sar na primer te pozdravinel pe o zname?

• So mislinea tu baši leskiri odluka?

Kola javera situacie šaj te keren amenge pharo te ačhova neutralna? Dikh o VIDEOKLIPI, a palo adava keren lafi bašo akala pučiba:

• Sar šaj te ačhova neutralna ko megjunarodna sportska nastanija?

• Sar šaj te ačhova neutralna keda siem lično pogodime taro odluke so anena o političarija, čak keda adala odluke tane baši amari korist?

• Sar šaj o vestija hem amaro društvo te vlijajnen upri amari neutralnost?

 SO SIKLILEM

O hristijanja but trudinena pe te ačhoven političko neutralna ko pumare misle, lafija hem postapke.

Sar ka odgovorine?

• Sar valjani te dikha ko manušikane vlade?

• Soske siem političko neutralna?

• Kola situacie šaj te keren amenge pharo te ačhova neutralna?