О Исусес сикавелас пе ученикиен, кай на требе те овен „част таро светос“. (Йоан 15:19) Ов мангелас те пхенел, кай на требе те заачшовас никхаскере ригатар анди политика тай андо войни. Ама и истина си, кай подекхана нанай лесно, соскето о мануша ащи те керен амен лажаке или те аракхен аменге махана, кай на лас риг. Со ащи те помагинел аменге те на лас риг андо букя, колато ачшон андо светос, тай те ачшовас верна е Йеховаске?

1. Со мислинен о християня е манушенге, колато управлинен?

О християня сикавен уважение кариг о правителства. Аме керас со пхенгяс о Исусес тай платинас „е цариеске, о букя, колато си е цариескере“, демек спазвинас о законя анди държава, колате живинас, тай платинас данъкя. (Марко 12:17) И Библия сикавел, кай о мануша управлинен само соскето о Йехова мукел лен те управлинен. (Римляни 13:1) Аке соске ленгери власт нанай зомкха бари сар е Девлескери. Аме верувинас, кай само о Дел тай лескоро Царство ка решинен амаре проблемя.

2. Сар ащи те сикавас, кай на лас риг андо букя, колато ачшон андо светос?

Аме-да сар о Исусес, на ехминас амен анди политика. Кана о мануша дикхле сар о Исусес кергяс йекх чудо, он мангле те керен лес цари, ама ов на мангляс. (Йоан 6:15) Соске? По-късно о Исусес пхенгяс: „Моро царство нанай калке светостар.“ (Йоан 18:36) Аме синям лескере ученикя тай мангас те сикавас, кай на лас риг андо букя, колато ачшон андо светос. Например на жас ко войни. (Четине Михей 4:3.) Аме сикавас уважение кариг и държава тай кариг десаве букиенде сар о знамес, ама на поклонинас амен ленге. (1 Йоан 5:21) Тай на пхенас дали харешинел аменге десаво политики или на-а. Като керас калка тай авер букя, сикавас кай синям верна само е Девлескере Царствоске.

 РОДЕ ПО-ХОРЕСТЕ

3. О истинска християня на лен риг андо букя, колато ачшон андо светос

О Исусес тай лескере ученикя сикавде аменге со те керас. Четинен Римляни 13:1, 5-7 тай 1 Петър 2:13, 14. После дикхен о КЛИПИ тай хоратинен калке въпросиенге:

• Соске требе те сикавас уважение кариг о мануша, колен иси власт?

• Сар ащи те сикавас, кай уважинас лен тай шунас лен?

Кана иси война, десаве държавес пхенен, кай на заачшовен никхаскере ригатар, соскето на марен пес, ама бичшален парес тай оръжия. Со наистина означинел те на заачшовас никхаскере ригатар? Четинен Йоан 17:16. После дикхен о КЛИПИ тай хоратинен калке въпросиеске:

• Со означинел те на лас риг андо букя, колато ачшон андо светос?

Со требе те керас, ако о мануша, колен иси власт, траден амен те керас букя, колато о Дел на мангел? Четинен Деяния 5:28, 29. После дикхен о КЛИПИ тай хоратинен калке въпросиенге:

• Ако о мануша, колен иси власт, манген амендар йекх, а о Дел мангел авер, кас ка шунас?

• Например кана о християня нанай те шунен е манушен, колен иси власт?

 4. Сикав, кай на лес риг е букиенца, колато мислинес тай керес

Четинен 1 Йоан 5:21. После дикхен о КЛИПИ тай хоратинен калке въпросиенге:

• Соске о Айенге решингяс те на дел анди партия тай те на поклонинел пес е знамеске?

• Мислинес ли, кай ов лиляс лачшо решение?

Саве авер букя ащи те ачшон тай те овел аменге трудно те на лас риг? Дикхен о КЛИПИ тай хоратинен калке въпросиенге:

• Сар те на заачшовас никхаскере ригатар, кана дикхас мачи, колесте кхелен отборя до различноне държавендар?

• Сар те на лас риг даже кана о политикя лен решения, колато керен амаро животос по-пхаро или по-локо?

• Соске ащи те овел аменге трудно те на заачшовас никхаскере ригатар, ако постоянно дикхас ко новини со ачшол анди политика или ако кидас амен манушенца, колато дехен те хоратинен салке букиенге?

 СО СИКЛИЛЯМ

О християня ден всичко пестар те на лен риг анди политика е букиенца, колато мислинен, хоратинен тай керен.

О най-важна букя таро уроки

• Со требе те мислинас е манушенге, колато управлинен?

• Соске на лас риг андо букя, колато ачшон андо светос?

• Кана ащи те овел аменге трудно те сикавас, кай на лас риг?