Yesu a dondzrise valandzreli vake akuva va nga vi ‘va misava’. (Yohan 15:19) Leswi swi patsra ku nga vi wa tlhelo dzra kukazri dzra politika ni le ka tiyimpi ta misava. Ku hlaya ntiyiso, a hi minkama hinkwayu swi nabyalaka ku kala hi nga yimi ni tlhelo ka swone. Hi nga ha hlekiwa hi kola ka swone. Xana hi nga swi kotisa kuyini ku kala hi nga yimi ni tlhelo ka swone ni ku tsrhama hi dumbekile ka Yehovha Xikwembu Nkulukumba?

1. Xana vakriste va ntiyiso va yi vonisa kuyini mimfumu ya vhanu?

Vakriste va yi hlonipha mimfumu. Hi yentxa leswi Yesu a swi hlayiki hi tlhela hi ‘tlhelisela swa Khezari ku Khezari’ hi ku va hi yingiseta milawu ya tiko, ya ku fana ni ku hakela tinemba. (Marka 12:17) Bibele dzri dondzrisa leswaku mimfumu ya vhanu yi fuma ntsena hi leswi yi pfumeleliwaka ha Yehovha. (Ba-le-Roma 13:1) Kambe ha swi twisisa leswaku a mimfumu ya vhanu yi ni ntamu lowu pimiwiki. Hi dumba leswaku Xikwembu Nkulukumba wezru a ta tizrisa Mfumu wake wa le tilweni akuva a helisa swikazratu swa vhanu.

2. Hi nga swi kombisa hi ndlela yini leswaku a hi hlawuli tlhelo?

Ku fana na Yesu, a hi patsreki ka politika. Loko vhanu va vone dzrin’we dzra mahlolana ya Yesu, va dzringise ku mu yentxa hosi yavu, kambe a nga pfumelanga. (Yohan 6:15) Ha yini a yalile? Hi kola ka leswi a gamiki a swi hlaya a ku: ‘A mfumu wanga a hi wa misava leyi.’ (Yohan 18:36) Ku fana ni vadondzrisiwa va Yesu, hi kombisa leswaku a hi yimi ni tlhelo dzra kukazri hi tindlela tinyingi. Hi xikombiso, a hi yi a yimpini. (Dondzra Mika 4:3.) Hi hlonipha mimfungu ya tiko ya ku fana ni bandera kambe a hi yi gandzreli. (1 Yohan 5:21) A hi seketeli kumbe ku lwisana ni xiyenge xa kukazri xa politika kumbe lava djulaka ku hlawuliwa akuva va fuma. Hi tindlela leti ni timbeni hi kombisa leswaku hi dumbeka hi ku helela ka Mfumu wa Xikwembu Nkulukumba.

 KELISISA

3. Vakriste va ntiyiso a va hlawuli tlhelo

Yesu ni valandzreli vake va hi siyele xikombiso. Dondzrani Ba-le-Roma 13:1, 5-7 na 1 Petros 2:13, 14. Ntsrhaku, vonani VHIDIYU mi gama mi bulisana hi swivutiso leswi landzrelaka.

• Ha yini hi fanela ku hlonipha mimfumu?

• He tini tindlela leti hi nga kombisaka ha tone leswaku hi tibeka hansi ka yone?

Hi nkama wa yimpi, matiko mambeni ma nga ha hlaya leswaku a ma hlawuli tlhelo, kambe ma seketela matlhelo ha mabidzri lama lwaka. Kasi i yini wukalatlhelo bya kakunene? Dondzrani Yohan 17:16. Ntsrhaku, vonani VHIDIYU mi gama mi bulisana hi xivutiso lexi landzrelaka.

• Swi tlhamuxela yini ku va ni wukalatlhelo?

Xana hi ta yentxa yini loko wulawuli byi hi zruma ku yentxa leswi hi swi tivaka leswaku swi lwisana ni nawu wa Xikwembu Nkulukumba? Dondzrani Amintiṛo 5:28, 29. Ntsrhaku, vonani VHIDIYU mi gama mi bulisana hi swivutiso leswi landzrelaka.

• Loko ku va ni ku lwisana ka milawu ya vhanu ni ya Xikwembu Nkulukumba, xana he wini nawu lowu hi fanelaka ku wu landzrela?

• Ku ni swiyimu swa kukazri leswi u swi yanakanyaka lani vakriste va nga fanelangakiki ku yingiseta wuhosi?

 4. Vana ni wukalatlhelo hi miyanakanyu ni hi mintizro

Dondzrani 1 Yohan 5:21. Ntsrhaku, vonani VHIDIYU mi gama mi bulisana hi swivutiso leswi landzrelaka.

• Ka vhidiyu, ha yini Ayenge a hlawule kuva a nga yimi ni xiyenge xa kukazri xa politika kumbe minkhuvu ya tiko, ya ku fana ni ku losa bandera?

• U vona leswaku a teke xiboho lexinene?

He swini swiyimu swimbeni swi nga ha dzringaka wukalatlhelo byezru? Vonani VHIDIYU, mi gama mi bulisana hi swivutiso leswi landzrelaka.

• Hi nga kombisa hi ndlela yini leswaku a hi yimi ni tlhelo loko hi hlalela mintlawa yibidzri ya ntlangu wa kukazri?

• Xana hi nga swi kombisa hi ndlela yini leswaku hi ni wukalatlhelo nambiloko hi khumbeka hi swiboho leswi tekiwiki hi vapolitika?

• Xana a madzrungula ni lava hi hungataka na vone va nga byi khumbisa kuyini wukalatlhelo byezru?

 NKATSRAKANYU

Vakriste va tikazratela kuva va nga hlawuli tlhelo ka politika hi miyanakanyu, mazritu ni hi mintizro yavu.

Mpfuxeto

• Xana hi fanela ku yi nyika yini mimfumu ya vhanu?

• Ha yini hi hlayisa wukalatlhelo byezru?

• He swini swiyimu leswi nga ha dzringaka wukalatlhelo byezru?