Nivola tamy ty mpanori-dia azy Jesosy mba ‘tsy hiharo amy zao tontolo zao.’ (Jaona 15:19) Tsy manoha ani-tontolo toy zany tsika, le tsy mandramby anjara amy politiky na aly. Tsy mora raha zay kindraiky satria mety hikizakizaky antsika ty olo. Akory ty ampisehoantsika fa tsy manoha ani-tontolo toy tsika sady tsy mivaliky amy Jehovah Ndranahary?

1. Akory ty fiheverani-Kristiana ty fanjakàn’olombelo?

Manaja ty fanjakàn’olombelo ty Kristiana. Nivola Jesosy hoe: “Aloavo amy Kaisara ze ani-Kaisara.” (Marka 12:17) Manoriky ani-zay tsika, le miezaky manara-dalàna. Mandoa hetra na haba, ohatsy, tsika laha misy raha tokony handoava ani-zay. Mivola koa ty Baiboly fa kanao mbo misy ty fandaisan’olombelo, le Jehovah ro mbo manenga an-drozy handay. (Romanina 13:1) Haintsika zany fa voafetra avao ty fandaisan’olombelo. Mino noho matoky tsika fa Jehovah Ndranahary noho Fanjakàny an-danitsy any iny avao ro hahavita hamaha ty problemo iaby mahazo ty olombelo.

2. Akory ty ampisehoantsika fa tsy manoha ani-tontolo toy tsika?

Manahaky ani-Jesosy tsika ka tsy militsy amy politiky mihintsy. Lafa nahita ani-fahagagà nataony rey, ohatsy, ty olo le nanao forosè azy ho mpanjaka an-tany etoa, fe tsy naneky ie. (Jaona 6:15) Ino ty antony? Satria hoy ty asany: “Tsy miharo amy tontolo toy ty Fanjakàko.” (Jaona 18:36) Mpianatsini-Jesosy tsika ka tsy manoha ani-tontolo toy. Maro ty fomba ampisehoantsika ani-zay, ohatsy hoe tsy mandeha mialy. (Vakio Mika 4:3.) Manaja ty mariky amantara ty firenenantsika tsika, anatini-zay ty sainam-pirenena, fe tsy mandrengy ani-raha rey tsika. (1 Jaona 5:21) Tsy manoha sady tsy manohitsy antoko politiky na kandidà koa tsika. Raha vitsivitsy azontsika ampisehoa reo hoe ty Fanjakà-Ndranahary avao ro tohanantsika.

 DINIHO LALIKY

3. Tsy manoha ani-tontolo toy ty tena Kristiana

Modely ho antsika Jesosy noho mpanori-dia azy rey. Vakio Romanina 13:1, 5-7 noho 1 Petera 2:13, 14. Alefaso VIDEO toy, le iaraho midiniky fanontanea reo.

• Manino tsika ro tokony hanaja ty manam-pahefà?

• Ino ohatsy ty raha ataontsika mampiseho hoe manaja ty manam-pahefà tsika?

Lafa misy ty aly, le mivola ty firenena sisany fa tsy militsy amy aly iny. Fe hita amy ty raha ataon-drozy fa manampy ani-firenena mialy rey rozy. Zay va ty atao hoe tsy poro ndre ia ndre ia? Vakio Jaona 17:16. Alefaso VIDEO toy, le iaraho midiniky fanontanea toy.

• Ino ty dikani-hoe tsy manoha ani-tontolo toy?

Ka akory laha ampanaovini-manam-pahefà raha mifanohitsy amy fitsipikini-Jehovah tsika? Vakio Asan’ny Apostoly 5:28, 29. Alefaso VIDEO toy, le iaraho midiniky fanontanea reo.

• Lafa mifanohitsy amy ty lalàna-Ndranahary ty lalànan’olombelo. Aia ty tokony horihintsika?

• Lafa amin’ino ohatsy ty Kristiana ro tsy tokony hanoriky ty raha volanini-manam-pahefà?

 4. Ka manoha ani-tontolo toy mihintsy ndre an-tsainao any, ndre amy ty raha ataonao

Vakio 1 Jaona 5:21. Alefaso VIDEO toy, le iaraho midiniky fanontanea reo.

• Manino Ayenge ro tsy naneky hilitsy amy antoko politiky na hanao fombafomba mampiseho fitiava tanindraza, ohatsy hoe fananganan-tsaina?

• Akory ty hevitsinao, nahay nanapa-kevitsy va ie?

Amy raha manao akory koa ro mety ho sarotsy amintsika ty tsy hanoha ani-tontolo toy? Alefaso VIDEO toy, le iaraho midiniky fanontanea reo.

• Akory ty ampisehoantsika hoe tsy manoha ani-tontolo toy tsika lafa manenty sporo iraisam-pirenena?

• Akory ty ampisehoantsika hoe tsy manoha ani-tontolo toy tsika, lafa misy vokany amy fiainantsika manoka ty fanapahan-kevitsini- mpanao politiky?

• Ino ty mety ho vokany laha zatsy manaraky vaovao politiky tsika na minama amin’olo tea miresaky politiky?

 FAMINTINA

Miezaky mafy ty Kristiana mba tsy ho poro ndre ia ndre ia amy resaky politiky, na an-tsainy any zay, na amy ty raha ataony noho volaniny.

Famerena

• Akory ty fiheverantsika ty fanjakàn’olombelo?

• Manino tsika ro tsy tokony ho poro ndre ia ndre ia amy resaky politiky?

• Amy raha manao akory ro mety ho sarotsy amintsika ty tsy hanoha ani-tontolo toy?