Yesus něněntiro manga murite tawe wotonge makoạ ”bageang bọu dunia”. (Yohanes 15:19) Ini mangal᷊ene i sire harusẹ̌ netral arau tawe měnumběka su politikẹ̌ arau perang. Sěběnarẹ̌e, makoạ netral ene tawe sěntiniạ gampang. Taumata aramanung měheghesẹ̌ si kitẹ. Kerea carane tadeạu i kitẹ tatapẹ̌ netral dingangu tatapẹ̌ masatia su Mawu Yehuwa?

1. Kerea pěndangu tau Kristen tutune su pěmamarentang taumata?

Tau Kristen měngẹ̌ngadatẹ̌ pěměrenta. I kitẹ tumol᷊e apa niul᷊ị i Yesus kụ ’měgělị su kaisarẹ̌ hakẹ̌u kaisarẹ̌’, ene mangal᷊ene i kitẹ tumuhụ hukung su sěmbaụ negeri, kere měmaehẹ̌ pajakẹ̌. (Markus 12:17) Alkitapẹ̌ něněntiro pěměrentang taumata nẹ̌parenta ual᷊ingu Yehuwa němala si sire nẹ̌parenta. (Roma 13:1) Hakị u ene, i kitẹ nakaěna pěmamarentang taumata ene piạ batase. I kitẹ měngampal᷊ẹ̌ Mawu dingangu Kararatuang’E su sorga gunang mapakailang masalang kěbị taumata.

2. Kerea i kitẹ měnodẹ i kitẹ netral?

Kere i Yesus, i kitẹ tawe tumol᷊e politikẹ̌. Su tempong taumata nakasilo sěmbaụ mukjizat i Yesus, kụ mapulu měhengkẹ si sie makoạ datung i sire, i Yesus madiri. (Yohanes 6:​15) Kawe nụe? Yesus naul᷊ị, ”Kararatuangku bal᷊inẹbe bageang bọu dunia ini.” (Yohanes 18:36) Ual᷊ingu i kitẹ muriti Yesus, i kitẹ měnodẹ i kitẹ netral bọu piram baụ cara. Contone, i kitẹ tawe mẹ̌pěrang. (Basa Mikha 4:3.) I kitẹ měngadatẹ̌ lambang negara, kere baneha, katewe i kitẹ tawe měněmbah ene. (1 Yohanes 5:​21) Kụ i kitẹ lai tawe měnumběka arau lumawang haghing partai politik arau calon su partai ene. Dingangu cara ini lai cara wal᷊inẹ, i kitẹ něnodẹ i kitẹ kahěngang-hěngang masatia su pěmamarentang Kararatuangu Mawu.

 BANGKA PAKARAL᷊UNG

3. Tau Kristen tutune kai netral

Yesus dingangu manga murite nakoạ pẹ̌tatěnoěng si kitẹ. Basa Roma 13:​1, 5-7 dingangu 1 Petrus 2:​13, 14. Bọu ene, putarẹ̌ VIDEONE kụ bisarai manga kakiwal᷊o ini.

• Kawe nụe i kitẹ harusẹ̌ měngadatẹ̌ pěměrenta?

• Apa piram baụ cara něnodẹ i kitẹ tụtuhụ si sire?

Su tempong perang, piram baụ negara maul᷊ị i sire netral, katewe i sire mětẹ̌tul᷊ung negara apang nẹ̌pěrang. Sěběnarẹ̌e, apa mangal᷊ene netral? Basa Yohanes 17:16. Bọu ene, putarẹ̌ VIDEONE kụ bisarai kakiwal᷊o ini.

• Apa mangal᷊ene netral?

Kerea mạeng pěměrenta měnuntụ i kitẹ měkoạ barang tawe nẹ̌tatahino dingangu hukungu Mawu? Basa Kisah 5:​28, 29. Bọu ene, putarẹ̌ VIDEONE kụ bisarai manga kakiwalo ini.

• Mạeng hukungu pěměrenta tawe nẹ̌tatahino dingangu hukungu Mawu, hukung i sai sarung tuhụkang i kitẹ?

• Tumuhụ si kau, su situasi kerea i kitẹ tawe harusẹ̌ tumuhụ su pěměrenta?

 4. Tatapẹ̌ netral su tiněna dingangu kakanoạ

Basa 1 Yohanes 5:​21. Bọu ene, putarẹ̌ VIDEONE kụ bisarai manga kakiwal᷊o ini.

• Su video ene, kawe nụe Ayenge němutusẹ̌ tawe timol᷊e politikẹ̌ arau něhormatẹ̌ baneha?

• Tumuhụ si kau, apa putusange ene nihino?

Situasi apa lai botonge makasal᷊ukạ kenetralan i kitẹ? Putarẹ̌ VIDEONE, bọu ene bisarai manga kakiwal᷊o ini.

• Kerea i kitẹ botonge tatapẹ̌ netral su tempong piạ acara olahraga internasional?

• Kerea i kitẹ botonge tatapẹ̌ netral mạeng putusangu politikẹ̌ ene piạ pěngarune si kitẹ?

• Kerea berita arau pẹ̌dal᷊ahapị ene piạ pěngarune su kenetralan i kitẹ?

 RINGKASAN

Soal u politikẹ̌, tau Kristen harusẹ̌ sěbạe mẹ̌tawakal᷊i tatapẹ̌ netral su tiněna, bawera, dingangu kakanoạ i sire.

Apa seng nikaěndungangu?

• Kerea pěndang i kitẹ su pěmamarentang taumata?

• Kawe nụe i kitẹ harusẹ̌ tatapẹ̌ netral su politikẹ̌?

• Piram baụ situasi apa botonge makasal᷊ukạ kenetralan i kitẹ?