LISAUN 45
Neutrál katak sá?
Jesus hanorin katak ninia dixípulu sira “laʼós mundu neʼe nian”. (João 15:19) Neʼe inklui sira mantein sira-nia pozisaun neutrál, katak la apoia buat polítiku ka funu. Dala ruma la fasil ba ita atu neutrál, no karik ema sei goza ita. Oinsá mak ita bele neutrál no laran-metin nafatin ba Maromak Jeová?
1. Ema Kristaun hanoin oinsá kona-ba ema nia governu?
Ema Kristaun sira hatudu respeitu ba governu. Hanesan Jesus hatete, ita “fó ba César buat neʼebé César nian”. Neʼe katak, ita halo tuir governu nia lei, inklui mós lei kona-ba selu taxa. (Marcos 12:17) Bíblia hanorin katak ema nia governu iha tanba Jeová mak husik sira ukun. (Roma 13:1) Tan neʼe, ita hatene katak ema nia governu nia kbiit mak limitadu, no Maromak nia pozisaun mak aas liu fali ema nia pozisaun. Ita fiar katak ita-nia Maromak no ninia Ukun iha lalehan mak sei rezolve problema hotu neʼebé ita hasoru.
2. Oinsá mak ita bele hatudu katak ita neutrál?
Hanesan Jesus, ita la envolve an iha polítika. Bainhira ema haree Jesus halo milagre no koko halo nia sai liurai iha mundu neʼe, nia lakohi simu. (João 6:15) Tanbasá? Liutiha tempu balu, nia hatete: “Haʼu-nia Ukun laʼós husi mundu neʼe.” (João 18:36) Nuʼudar Jesus nia dixípulu, ita mós hatudu katak ita neutrál iha dalan oioin. Porezemplu, ita la hola parte iha funu. (Lee Miqueias 4:3.) Ita respeitu símbolu nasaun nian hanesan bandeira, maibé ita la kontinénsia, tanba neʼe hanesan deʼit ho ita adora ida-neʼe. (1 João 5:21) Ita mós la apoia no la kontra partidu polítiku ka kandidatu sira. Liuhusi dalan hanesan neʼe no dalan seluk, ita hatudu katak ita laran-metin deʼit ba Maromak nia governu, ka ninia Ukun.
KEʼE KLEʼAN
Haree toʼok situasaun balu neʼebé koko ita-nia pozisaun neutrál, no oinsá mak Ita bele foti desizaun neʼebé halo Jeová kontente.
3. Ema Kristaun neʼebé loos nafatin neutrál
Jesus no ninia dixípulu sira hatudu ezemplu mai ita. Lee Roma 13:1, 5-7 no 1 Pedro 2:13, 14. Depois, loke VÍDEO no koʼalia hamutuk kona-ba pergunta tuirmai.
-
Tanbasá mak ita presiza hatudu respeitu ba autoridade sira?
-
Oinsá mak ita bele hatudu katak ita hakruʼuk ba autoridade sira?
Iha tempu funu, maski nasaun balu fó sai katak sira neutrál, maibé sira nafatin apoia parte rua neʼe hotu neʼebé halo konflitu. Loloos neutrál katak sá? Lee João 17:16. Depois, loke VÍDEO no koʼalia hamutuk kona-ba pergunta tuirmai.
-
Neutrál katak sá?
Oinsá se autoridade sira haruka Ita atu halo buat neʼebé kontra Maromak nia ukun-fuan? Lee Apóstolu 5:28, 29. Depois, loke VÍDEO no koʼalia hamutuk kona-ba pergunta tuirmai.
-
Se ema nia lei ruma mak kontra Maromak nia ukun-fuan, ida-neʼebé mak ita presiza halo tuir?
-
Tuir Ita-nia hanoin, iha situasaun hanesan saida mak ema Kristaun sei la halo tuir ema nia lei?
4. Neutrál liuhusi hanoin no hahalok
Lee 1 João 5:21. Depois, loke VÍDEO no koʼalia hamutuk kona-ba pergunta tuirmai.
-
Iha vídeo neʼe, tanbasá mak Ayenge deside atu la hola parte iha partidu polítiku no la tuir serimónia nasionál hanesan kontinénsia ba bandeira?
-
Tuir Ita-nia hanoin, desizaun neʼebé nia halo matenek ka lae?
Situasaun saida tan mak bele koko ita-nia pozisaun neutrál? Loke VÍDEO, depois koʼalia hamutuk kona-ba pergunta tuirmai.
-
Oinsá mak ita bele mantein neutrál bainhira haree desportu entre nasaun ida ho nasaun seluk?
-
Oinsá mak ita bele mantein neutrál maski desizaun polítika ruma fó impaktu aat ka benefísiu mai ita?
-
Oinsá mak notísias ka ema neʼebé ita ransu bele halo susar ba ita atu mantein neutrál?
Iha situasaun saida deʼit mak ema Kristaun presiza neutrál nafatin liuhusi hanoin no hahalok?
KARIK EMA SEI HUSU: “Tanbasá mak ó la kontinénsia ba bandeira no la kanta inu nasionál?”
-
Ita sei hatán oinsá?
PONTU IMPORTANTE
Ema Kristaun hakaʼas an atu neutrál nafatin kona-ba buat polítiku liuhusi sira-nia hanoin, liafuan no hahalok.
Rezumu
-
Ema Kristaun presiza hatudu hahalok saida ba ema nia governu?
-
Tanbasá mak ita neutrál nafatin kona-ba buat polítiku?
-
Situasaun saida deʼit mak bele halo susar ba ita atu mantein neutrál?
BUKA-HATENE LIUTÁN
Karik ita presiza halo sakrifísiu saida deʼit hodi bele neutrál nafatin?
Família sira bele halo saida atu prepara nanis ba situasaun neʼebé halo susar ba sira atu mantein neutrál?
Ema barak hanoin katak defende sira-nia nasaun mak buat neʼebé halo sira sente orgullu liu. Maibé neʼe loos ka lae?
Hanoin toʼok oinsá atu hatudu katak ita laʼós mundu neʼe nian bainhira halo desizaun kona-ba serbisu.
“Ema ida-idak sei lori ninia todan rasik” (Livru Haklaken, 15 Marsu 2006)