Jesu wakayiisya batobeli bakwe kuti ‘tabali banyika.’ (Johane 15:19) Eezi zyaamba kuti tatweelede kutola lubazu mulizyapolitikisi amunkondo. Kwaamba choonzyo, teekuuba pe kutatola lubazu. Tulakonzya kusekwa akaambo kakuti tatutoli lubazu muzintu zyanyika. Niinzi chikonzya kutugwasya kuti tutatoli lubazu muzintu zyanyika akuzumanana kusyomeka kuli Jehova Leza?

1. MaKristu bakasimpe bazibona biyeni mfulumende zyabantu?

MaKristu balazilemeka mfulumende. Tuchita kweendelana anzyaakaamba Jesu kwiinda mukupa “Kaisara zintu zya Kaisara,” chaamba kulemeka milawu yamuchisi mutukkala mbuli wakubbadala mitelo. (Marko 12:17) Bbayibbele liyiisya kuti beendelezi baliwo mazubaano balikweendelezya akaambo kakuti Jehova ulibazumizizye kuti beendelezye. (Baroma 13:1) Nkinkaako, tulizi kuti mfulumende zyabantu kuli mpuzigolela. Tulangilila kuti Leza kabelesya Bwaami bwakwe, mfulumende yakujulu uzoomaninsya mapenzi woonse aali munyika.

2. Kujana twatondeezya biyeni kuti tatutoli lubazu muzintu zyanyika?

Tatunjilili pe mulizyapolitikisi mbuli mbaakachita Jesu. Chiindi bantu nibakabona chigambyo nchaakachita Jesu, bakeezya kuyanda kumubikka kuti abe mwaami wabo pesi Jesu wakakaka. (Johane 6:15) Wakakakilaanzi? Wakaamba kuti: “Bwami bwangu tabuli bwanyika eeyi.” (Johane 18:36) Mbukunga tuli basikwiiya baJesu, tulakonzya kutondeezya kuti tatutoli lubazu mulizyanyika munzila zisiyene-siyene. Muchikozyano, tatutoli lubazu pe munkondo. (Bala Mika 4:3.) Tulazilemeka zintu zili mbuli mafuleegi pesi tatuzikotamini pe naakuti kuzisaluta. (1 Johane 5:21) Taakwe paati yapolitikisi njitujoyina pe naakuti kuvootela muntu. Kuchita zintu eezi azimwi, kutondeezya kuti tusyoma Bwaami bwaLeza.

 YIYA ZYIINGI

3. MaKristu bachoonzyo tabatoli lubazu mulizyanyika

Jesu abatobeli bakwe bakatusiila chikozyano chibotu loko. Bala Baroma 13:1, 5-7 a 1 Petro 2:13, 14. Kuzwa waawo, mweebele KAVIDIYO, mpawo musandule mibuzyo iitobela.

• Nkamboonzi nitweelede kulemeka balupati-pati bamfulumende?

• Kujana twatondeezya biyeni kuti tulabalemeka?

Chiindi chankondo, zimwi zisi ngazyaamba kuti tazitoli lubazu pe pesi ngazilikugwasilizya munkondo. Kutatola lubazu mulizyanyika nkuchitaanzi loko? Bala Johane 17:16. Kuzwa waawo, mweebele KAVIDIYO, mpawo musandule mubuzyo uutobela.

• Kutatola lubazu mulizyanyika nkuchitaanzi?

Tweelede kuchitaanzi kuti balupati-pati bamfulumende batubuzya kuti tuchite zintu zikazyania aamulawu waLeza? Bala Milimo 5:28, 29. Kuzwa waawo, mweebele KAVIDIYO mpawo musandule mibuzyo iitobela.

• Kuti balupati-pati bamfulumende batubuzya kuti tuswiilile mulawu uukazyania aamulawu waLeza, ngwani ngutweelede kuswiilila?

• Ubonaanga muzyiimo zilibiyeni maKristu mubateelede kuswiilila balupati-pati bamfulumende?

 4. Utatoli lubazu muzintu nzuyeeya anzuchita

Bala 1 Johane 5:21. Kuzwa waawo, mweebele KAVIDIYO mpawo musandule mibuzyo iitobela.

• Niinzi chakapa kuti Ayenge atajoyini zyapolitikisi naakuti kutola lubazu muzintu zyanyika mbuli kusaluta fuleegi?

• Ubonaanga wakasala kabotu na?

Nziizili zimwi zyiimo zikonzya kupa kuti kutuyumine kutatola lubazu mulizyanyika? Mweebele VIDIYO, mpawo musandule mibuzyo iitobela.

• Kujana twatondeezya biyeni kuti tatutoli lubazu chiindi nitweebela misobano iiswaanizya bantu bazisi zisiyene?

• Kujana twachita biyeni kuti tukkale katutatoli lubazu chiindi bazyapolitikisi nibasala zintu zitujatikizya?

• Nzitumvwa mumanyuzi anzibaambuula bantu kujana zyatusunka biyeni kunkani yakutatola lubazu?

 CHIFWIINSYO

MaKristu babeleka changuzu kuti batatoli lubazu mulizyapolitikisi muzintu nzibayeeya, nzibaambuula anzibachita.

Mibuzyo Yakwiindulula

• Tweelede kubachitilaanzi balupati-pati bamfulumende?

• Niinzi chipa kuti tutatoli lubazu mulizyapolitikisi?

• Nziizili zyiimo zikonzya kupa kuti kutuyumine kutatola lubazu mulizyanyika?