Jesúsi uandaspti eskaksï imeeri chúxapaticha “nóteru parhakpini anapueskia” (Juanu 15:19). Ini ambe jingoni uandaxapti eskaksï no nema jingoni úkuarhisïnga, enga arhikuekajka eskaksï no inchamukusïnga politikarhisï ni guerrecharisï. Joperu no méntkisï fásiliisïndi no nema jingoni úkuarhini. Jamberijtsïni teresmarhuati ini ambe jimbo. ¿Nénachi uaa no nema jingoni úkuarhini ka Jeobantku kurhajchani?

1. ¿Nénachi exeasïni jucha parhakpinirhu anapu juramutichani?

Kristianuechachi janhanharhiasïnga juramutichani. Jesúsi uandaspti: “Íntskunta je Sésarini ambe enga Sésaririika”. Ka ísïchi úsïnga: kurhajchaasïngachi paisirhu anapu juramukuechani, komu impuestuechani maiampiani (Markusʌ 12:17). Biblia jorhentpisïndi eskaksï kʼuiripuecha juramuxaka solu jimboka Jeoba jurajkuaxaka (Roma 13:1). Ísï jimbo, míteskachi eskaksï juramuticha no iámu juramukua jatsiska, Tata Diosï sánderu juramukua jatsisti. Seguruchi jarhaska eska juchaari Tata Diosï ka imeeri Reinu enga auandarhu jaka sési peentauaka iámindu problemechani engaksï jaka.

2. ¿Nénachi xarhatasïni eskachi no nema jingoni úkuarhisïnga?

Májkueni eska Jesúsi, juchachi no inchamukusïnga politikarisï. Engaksï kʼuiripuecha exepka Jesúsini enga milagru ma úpka, uékasïreendiksï eska ima juramutipiringa ixú Echerirhu, peru ima no uékaspti ísï úni (Juanu 6:15). ¿Andisï no uékapi? Ima mismu uandaspti ísï tátsekua: “Juchiiti Juramukua no ini parhakpini jimboesti” (Juanu 18:36). Jesúsiri chúxapatichachi mámaru ambe jimbo xarhatasïnga eskachi no nema jingoni úkuarhisïnga. Ma jindeesti eskachi no nirasïnga guerrecharhu (arhinta je Miqueas 4:3). Nájkirukachi janhanharhijka imani ambe enga paisiriika—komu bandera—, nóchi ísï kʼéri ambe exesïnga eska Tata Diosïni (1 Juanu 5:21). Nóchi ma partiduni apoiarisïnga ni kʼuiripuni ma enga uéjka juramutini. I jindeesti ma ambe engachi jimbo xarhatajka eskachi solu Tata Diosïri Reinuni apoiarisïnga, enga ima uaxastaka.

 JORHENGUARHI JE SÁNDERU AMBE

3. Jurhimbiti kristianuechachi no nema jingoni úkuarhisïnga

Jesúsi ka imeeri chúxapatichajtsïni ambakiti ejemplu ma jurajkuchesti. Arhinta je Roma 13:1, 5-7 ka 1 Pedru 2:13, 14. Tátsekua exe je BIDEUNI ka uandontskuarhi je íri ambe:

• ¿Andichisï jatsi para janhanharhiani juramutichani?

• ¿Nákiski máru ambe engachi jimbo xarhatajka eskachi kurhajchaasïnga juramutichani?

Jiáni enga guerra úkuarhini jarhajka, máru paisichaksï uandasïndi eskaksï no nema jingoni úkuarhisïnga, joperu ambe ma jimboksï apoiariuani jarhasïndi imeechani engaksï jupiperajka. ¿Meru i ambesï arhikuekajki no nema jingoni úkuarhini? Arhinta je Juanu 17:16. Tátsekua exeje BIDEUNI ka uandontskuarhi je íri ambe:

• ¿Ambe jindeeski no nema jingoni úkuarhini?

¿Ambechi jatsiski para úni jiáni engaksï juramuticha uékaaka eskachi imani ambe uaaka enga Tata Diosï no jaiapanhentajka? Arhinta je Ukuecha 5:28, 29. Tátsekua exe je BIDEUNI ka uandontskuarhi je íri ambe:

• Enga kʼuiripueri juramukua ma no terukuntapiringa Tata Diosïri juramukua ma jingoni, ¿nákinchi kurhajchapirini?

• ¿Náki jindeepirini ma ambe engachi jimbo kristianuecha no kurhajchaapiringa juramutichani?

 4. Asï nema jingoni úkuarhi je imani ambe jimbo engajtsï újka ka eratseni

Arhinta je 1 Juanu 5:21. Tátsekua exe je BIDEUNI ka uandontskuarhi je íri ambe:

• ¿Andisï Ayenge no uékapi politikarhu inchamukuni ni banderani saludarini?

• ¿Chá exesïni eska sési jarhaspka ambe enga erakupka úni?

¿Ambe máteru ambe jimbo úpirini úkua jukani parachi no nema jingoni úkuarhini? Exe je BIDEUNI ka uandontskuarhi je íri ambe:

• ¿Nénachi uaa xarhatani eskachi no nema jingoni úkuarhisïnga engaksï chʼanakuecha jarhajka para interu parhakpinirhu anapuecha?

• ¿Nénachi uaa no nema jingoni úkuarhini asta jiáni engaksï politikuecha imani ambe erakuaka úni engajtsïni marhuacheaka ojtsïni no sési úchini?

• ¿Nénaksï úpirini notisiecha ka ima ambe engaksï kʼuiripuecha uandajka úni eskachi úkua jukanchaaka no nema jingoni úkuarhini?

 AMBE ENGACHI JORHENGUARHIKA

Kristianuechachi jánguarhintasïnga no inchamukuni politikarisï, ka xarhatasïngachi ini ambe imani ambe jingoni engachi újka, eratseni ka uandani.

Ambejtsï jorhenguarhiski

• ¿Náchi xáni jatsiski para kurhajchaani parhakpinirhu anapu juramutichani?

• ¿Andichisï no nema jingoni úkuarhijki enga politikeri ambeejka?

• ¿Ambe úpirini úni eskachi úkua jukanchapiringa parachi no nema jingoni úkuarhini?