Ne akoako mai a Iesu me i ana soko “e se ne vaega o te lalolagi.” (Ioane 15:19) E aofia i te mea tenei—a te sē ‵kau ki se feitu i mea fakapolitiki mo taua a te lalolagi. A te ‵tonuga loa, e sē se mea faigofie a te sē kau ki se feitu. E mafai o fakatauemu mai a tino ki a tatou ona ko te mea tenei. E mafai pefea o sē ‵kau tatou ki se feitu kae fakamaoni ki a Ieova te Atua?

1. E ‵tau o pefea a te kilokiloga a Kelisiano ‵tonu ki malo o tāgata?

E āva a Kelisiano ki malo o tāgata. E fai ne tatou a mea ne fai mai ne Iesu kae “toe ‵togi atu a mea a Kaisala ki a Kaisala”—ko tena uiga, e faka‵logo tatou ki tulafono o te fenua, e pelā mo te manakoga ke ‵togi ‵tou lafoga. (Maleko 12:17) E akoako mai te Tusi Tapu me i malo o tāgata e pule mai fua ona ko te taliaga a Ieova. (Loma 13:1) Tela la, e iloa ne tatou, me i malo o tāgata e isi se tapulā ki te lotou pulega. E ‵kilo atu tatou ki te ‵tou Atua mo tena Malo faka-te-lagi ke faka‵lei ne ia a fakalavelave o tino.

2. E fakaasi atu pefea ne tatou a te ‵tou sē ‵kau ki se feitu?

E pelā mo Iesu, e se aofia tatou i mea fakapolitiki. I te taimi ne lavea ei ne tino a vavega a Iesu, ne taumafai latou ke fai a ia mo fai te lotou tupu i te lalolagi, kae ne seki talia ne ia. (Ioane 6:15) Kaia? Me ne fai fakamuli mai a ia penei, “a toku Malo e sē se vaega o te lalolagi tenei.” (Ioane 18:36) E pelā me ne soko o Iesu, e fakaasi atu ne tatou a te ‵tou sē ‵kau ki se feitu i auala e uke. E pelā mo te sē ‵kau atu o tatou ki taua. (Faitau te Mika 4:3.) E āva tatou ki fakailoga o atufenua—e pelā mo te fuka—kae se tapuaki tatou ki mea konā. (1 Ioane 5:21) Kae e se ‵kau io me e ‵teke atu tatou ki se potukau fakapolitiki io me ko sui ki te palamene. I auala konei mo nisi auala aka, e fakaasi atu i ei ne tatou me e fakamaoni katoatoa tatou ki te pulega a te Atua—tena Malo.

 KELI MALOSI IFO

3. E se ‵kau ki se feitu a Kelisiano ‵tonu

Ne tuku mai ne Iesu mo ana soko se fakaakoakoga mō tatou. Faitau te Loma 13:1, 5-7 mo te 1 Petelu 2:13, 14. Ka oti, pei te VITIO ko sau‵tala ei ki fesili konei.

• Kaia e ‵tau ei o āva tatou ki malo o tāgata?

• Ne a nisi auala e fakaasi atu ei a te ‵tou faka‵logo ki a latou?

I taimi o taua, e fai mai a nisi atufenua me e se ‵kau latou ki se feitu kae fesoasoani atu eiloa latou ki potukau taua e lua. Se a te uiga tonu o te sē kau ki se feitu? Faitau te Ioane 17:16. Ka oti, pei te VITIO ko sau‵tala ei ki te fesili tenei.

• Se a te uiga o te sē kau ki se feitu?

Kae e a māfai ko fakatonu mai a malo o tāgata ke fai se mea telā e ‵teke atu ki te tulafono a te Atua? Faitau te Galuega 5:28, 29. Ka oti pei te VITIO ko sau‵tala ei ki fesili konei.

• Kafai ko fe‵paki a te tulafono a te tagata mo te tulafono a te Atua, i a ai te tulafono e ‵tau o faka‵logo tatou ki ei?

• E mafai o mafaufau koe ki fakanofonofoga kolā ka fai ei ke se faka‵logo a Kelisiano ki malo o tāgata?

 4. Ke se ‵kau ki se feitu i mafaufauga mo faifaiga

Faitau te 1 Ioane 5:21. Ka oti, pei te VITIO ko sau‵tala ei ki fesili konei.

• I te vitio, kaia ne fakaiku aka ei ne Ayenge ke se kau a ia ki se potukau fakapolitiki io me ko aso fakamanatu o te atufenua, e pelā mo te saluti ki te fuka?

• Se a tau faka‵tau, ne ‵lei tena fakaikuga?

Ne a nisi tulaga e mafai o tofotofo ei te ‵tou sē ‵kau ki se feitu? Pei te VITIO, ko sau‵tala ei ki fesili konei.

• E mafai pefea o tumau tatou i te sē ‵kau ki se feitu māfai ko onoono ki tafaoga fakatau‵fai i va o atufenua?

• E mafai pefea o tumau tatou i te sē ‵kau ki se feitu faitalia me e pokotia tatou i fakaikuga a te kau politiki?

• E mafai pefea o pokotia te ‵tou sē ‵kau ki se feitu ona ko tala fakasalalau io me ko tino e fesokotaki sāle mo tatou?

 MANATU AOGA

E taumafai malosi a Kelisiano ke mo a ma ‵kau ki se feitu i mea fakapolitiki i olotou mafaufauga, pati, mo faifaiga.

Fesili

• Ne a mea e ‵tau o ‵togi atu ne tatou ki malo o tāgata?

• Kaia e ‵tau o tumau tatou i te sē ‵kau ki se feitu i mea fakapolitiki?

• Ne a tulaga e mafai o tofotofo aka ei te ‵tou sē ‵kau ki se feitu?